MARKOSI 12 - BIVHILI KHETHWA Mafhungo Madifha

Tshifanyiso tsha vhahiri vha tsimu ya minḓirivhe

¹ Ndi hone Yesu a tshi thoma u amba navho nga zwifanyiso a ri, “Ho vhuya ha vha na muṅwe munna we a lima minḓirivhe, a fhaṱa luhura lwa mutsheṱo, a bwa na dindi ḽa bonḓelo, a fhaṱa na ḓingo ḽilapfu ḽa u linda tsimu. O no ralo a hirisa iyo tsimu, ene a pfulutshela kha ḽiṅwe shango.

² Musi tshifhinga tsha u fula nḓirivhe tshi tshi swika, muṋe wa tsimu a ruma mushumi kha vhalimi uri a yo mu dzhiela mukovhe wawe.

³ Vhahiri vhone vha fara uyo muḓinḓa, vha mu likita, vha fhedza nga u mu pandela a huma fhedzi.

⁴ Muṋe wa tsimu a ruma muḓinḓa wa vhuvhili. Na ene vhalimi vha mu kovhola, vha ita na u tamba ngae.

⁵ A tshi ruma wa vhuraru vha mu vhulaha. Na vhanzhi vhe vha tevhela vha ḓi vha ita zwenezwo, vhaṅwe vha tshi vha rwa, vhaṅwe vha tshi tou vha vhulaha,

⁶ ha vhuya ha sala ṅwana wawe muthihi fhedzi wa mutuka, ene mufunwa. A fhedza nga u ruma onoyo ṅwana ha vhalimi, nge a ri, ‘Ndi vhona uri ṅwananga vha ḓo mu teledza.’

⁷ Hone avho vhalimi vha amba nga tshavho vha ri, ‘Hoyu ndi ene muḽaifa. Iḓani ri mu vhulahe; ndi hone tsimu iyi i tshi ḓo vha ifa ḽashu!’

⁸ Vha mu fara vha mu vhulaha, tshitumbu tshawe vha tshi kudza nnḓa ha tsimu ya minḓirivhe.”

⁹ Yesu a vha vhudzisa a ri, “Zwino muṋe wa tsimu u ḓo itani? Ha nga ḓo ḓa a vha vhulaha, iyo tsimu a i ṋea vhaṅwe vhalimi naa?

¹⁰ Kani a ni athu vhala fhaḽa hune ha pfi, “ ‘Tombo ḽe ḽa laṱwa nga vhafhaṱi ḽa pfi a ḽi na mushumo, ḽo vha ḽone thikho ya tshifhaṱo.

¹¹ Hezwo zwo itwa nga Muṋe washu; vhonani uri zwi kanukisa hani!’ ”

¹² Vharangaphanḓa vha Majuda nga u ḓivha uri itshi tshifanyiso tshi amba vhone vha vho ṱoḓa nḓila ya u fara Yesu, hone nge vha ofha gogo ḽa vhathu vha mu litsha o ralo vha ṱuwa.

U thela muthelo wa Khisara wa Vharoma

¹³ Ha mbo ruṅwa vhaṅwe Vhafarisei na vhaṅwe vha ḽihoro ḽa Herude uri vha ye ha Yesu vha mu fashe nga zwine a amba.

¹⁴ Vha swika khae vha ri, “Vhafunzi, ri a zwi ḓivha uri vhone vha munna a fulufhedzeaho; vha tshi amba a vha thomi u sedza uri hu na nnyi; a vha ṱaluli muthu; tshavho ndi u funza nḓila yone-yone ine Mudzimu a funa vhathu vha tshi tshila ngayo. Kha vha ri vhudze-vho: Nṋa zwo tendelwa u thela muthelo wa Khisara naa? Ro fanela u thela kana a ro ngo fanela naa?”

¹⁵ Yesu a tshi zwi vhona uri hu khou itwa vhukwila a fhindula a ri, “Ni nndingelani? Edzonu ḓisa sheleni ndi i vhone.”

¹⁶ Vho no i ḓisa a vhudzisa a ri, “Nṋa iyi ṱhoho na dzina iḽi ndi zwa nnyi?” Vhone vha tshi fhindula vha ri, “Ndi zwa Khisara.”

¹⁷ Ndi hone Yesu a tshi ri, “Ahaa, Khisara mu ṋeeni zwi re zwawe, na Mudzimu ni mu ṋee zwi re zwawe.” A tshi ralo vha kanuka.

Vhasadukei na u vuwa ha vhafu

¹⁸ Ha dovha ha ḓa Vhasadukei ha Yesu – ndi vhaḽa vha no ri u vuwa ha vhafu a huho – vha ri,

¹⁹ “Vhafunzi, Mushe o ri siela mulayo une wa ri, ‘Arali munna a tshi fa a sia musadzi wawe a sa athu vha na ṅwana, murathu wawe u fanela u mu dzhia uri a bebele mukomana.’

²⁰ Zwino ho vhuya ha vha na vhaṅwe vhaṱhannga vhaṱanu na vhavhili, vhana vha munna. Wa tanzhe a dzea hone a fa a sa athu vha na ṅwana;

²¹ iyo tshilikadzi a dzhiwa nga a mu tevhelaho, na ene a ḓi fa a si na ṅwana. Na kha wa vhuraru zwa ḓi ralo,

²² zwa ḓi vha wela-vho; vhoṱhe vhuṱanu na vhuvhili havho vha dzhia onoyo musadzi, vha fhedza nga u fa vha si na vhana. Tshilikadzi iyo na yone ya fhedza nga u fa.

²³ Zwino-ha musi vhafu vhoṱhe vha tshi vuwa nga ḓuvha ḽa u vuwa ha vhafu, u ḓo vha musadzi wa nnyi? Hufha vhoṱhe vhuṱanu na vhuvhili havho o vha musadzi wavho!”

²⁴ Yesu a vha fhindula a ri, “Nṋa no tou xela tshingafhani! Hone na tsho ni xedzaho ni a tshi ḓivha naa? Ndi uri hu Maṅwalo a ni a ḓivhi, hu maanḓa a Mudzimu a ni a ḓivhi,

²⁵ ngauri musi vhafu vha tshi vuwa vha ḓo nga vharuṅwa vha ngei ṱaḓulu; zwa u dzea na u dzewa a zwi nga vhi hone.

²⁶ Kha zwa u vuwa ha vhafu ndi ri: A ni athu vhuya na vhala fhaḽa Buguni ya Mushe hune ha amba nga tshiṱaka tshi tshi duga? Ndi ralo nge henefho ha vha hone he ha ṅwalwa upfi, ‘Mudzimu o vhudza Mushe a ri: Ndi Nṋe Mudzimu wa Abrahamu, Mudzimu wa Isaka, Mudzimu wa Jakopo.’

²⁷ Zwino hufha Mudzimu e si Mudzimu wa vho faho, e wa vha tshilaho. Ni a zwi vhona-ha uri no tou xela tshoṱhe!”

Mulayo muhulwane kha yoṱhe

²⁸ Henefho ho vha hu na muḓivhi wa Mulayo we a vha o ḓi thetshelesa zwiḽa Yesu a tshi khou amba na Vhasadukei. A tshi vhona uri Yesu o fhindula Vhasadukei zwavhuḓi, ene a ḓa-vho na yawe mbudziso a ri, “Nṋa mulayo u fhiraho yoṱhe ndi ufhio?”

²⁹ Yesu a fhindula a ri, “Une wa fhira yoṱhe khoyu: ‘Thetshelesa Israele: Muṋe washu Mudzimu ndi Muṋe washu e eṱhe.

³⁰ Funa Mudzimu Muṋe wau nga mbilu yau yoṱhe, nga zwoṱhe zwine wa vha zwone, nga ṱhalukanyo yau yoṱhe, nga maanḓa au oṱhe!’

³¹ Une wa tevhela asuyu: ‘Funa muṅwe unga iwe muṋe.’ A hu tshee na muṅwe mulayo une wa fhira yenei mivhili.”

³² Muḓivhi wa Mulayo a ri, “Izwo zwi a pfala Vhafunzi! Vho amba zwone vha tshi ri, ‘Mudzimu ndi muthihi, a hu na muṅwe.’

³³ Zwenezwo-ha muthu u fanela u funa Mudzimu nga mbilu yawe yoṱhe, na nga ṱhalukanyo yawe yoṱhe, na nga maanḓa awe oṱhe, nahone u fanela u funa vhaṅwe unga ene muṋe. U tevhedza heyo milayo mivhili zwi fhira u ḓisa zwiṱhavhelo zwa u fhiswa na u ṋekedza Mudzimu nduvho.”

³⁴ Yesu a tshi vhona uri o fhindula tshihulwane a mu vhudza a ri, “Hu tshee ho tou salanyana uri ni dzhene muvhusoni wa Mudzimu.” Ho ri u itea zwenezwo ha sa tsha dovha ha vha na we a vhuya a linga u vhudzisa Yesu mbudziso.

Mesia a nga vha muḓuhulu wa Dafita naa?

³⁵ Musi Yesu a tshi khou funza thembeleni a vhudzisa a ri, “Nṋa vhaḓivhi vha Mulayo vha amba mini vha tshi ri Mesia u ḓo vha muḓuhulu wa Dafita?

³⁶ Hufha Dafita o amba o ḓala Muya Mukhethwa a ri, “ ‘Muṋe wa vhoṱhe o amba na Muṋe wanga a ri: Dzula hafha thungo ya tshauḽa tshanga ri vhuse roṱhe, ndi vhuye ndi ite maswina au vhukando ha milenzhe yau.’

³⁷ “Asizwo-ha, zwi nga ḓa hani uri Mesia a vhe muḓuhulu wa Dafita? Hufha Dafita ene muṋe a tshi mu amba a tshi tou ri ‘Muṋe wanga.’ ” Vhathu vhanzhi-vhanzhi vho vha vha tshi khou ḓiphiṋa nga u thetshelesa Yesu.

Yesu a tshi ri hu thanyelwe vhaḓivhi vha Maṅwalo

³⁸ A tshi khou vha funza a ri, “Ni thanyele vhaḓivhi vha Mulayo, vhane vha funesa u tshimbila vho ambara phuraphura, na u loshiwa vanḓani,

³⁹ vhadzia-u-nanga zwidzulo zwa phanḓa sinagogoni na vhuṱamboni.

⁴⁰ Vha lapfisa thabelo dzavho vha tshi itela u vhonwa nga vhathu, ngeno vha tshi ḽa thundu dza dzitshilikadzi vha fhedza. Ṱhamu ine vha ḓo i wana a i nga vhavhi zwone!”

Tshifhiwa tsha tshilikadzi

⁴¹ Yesu a dzula thembeleni, tsini ha bogisi ḽa zwifhiwa, a tshi khou lavhelesa vhathu vha tshi khou longa tshelede dzavho. Ha ḓa vhanzhi vho pfumaho vha longa tshelede nnzhi.

⁴² Ha swika na muthu wa tshilikadzi we a vha e mushai vhukuma; onoyo a longa-vho masente mavhili.

⁴³ Ndi hone Yesu a tshi vhidza vhafunziwa vhawe a vha vhudza a ri, “Thetshelesani ndi ni vhudze: Tshilikadzi iyi yo bvisa u fhira vhoṱhe.

⁴⁴ Ndi uri vhaḽa vho ṱusa kha lupfumo lwavho, hu uri ene o bvisa zwoṱhe zwe a vha e nazwo – zwenezwo zwiṱukuṱuku zwe a vha a tshi ḓo ḽa.”