MARKOSI 1 - BIVHILI KHETHWA Mafhungo Madifha

Pfunzo ya Johanisi Mulovhedzi

¹ Haya ndi mafhungo maḓifha a Yesu Khristo Murwa wa Mudzimu.

² O thoma nga he zwa ṅwalwa buguni ya muporofita Yesaya hu tshi pfi, “Muḓinḓa wanga ngoyu-ha; ndi khou mu ruma phanḓa hau uri a u lugisele nḓila.

³ Ndi a huwelelaho sogani. U ri, ‘Lugiselani Muṋe washu nḓila, i tou tswititi, i tshimbilee.’ ”

⁴ Ndi zwe Johanisi Mulovhedzi a ḓa sogani a tshi ḓivhadza mafhungo a Mudzimu a uri vhathu vha laṱe vhuvhi havho vha lovhedzwe, Mudzimu a vha hangwele vhutshinyi havho.

⁵ Shango ḽoṱhe ḽa Judia na muḓi woṱhe wa Jerusalema wa ya u mu thetshelesa, vha bula vhutshinyi havho, a konou vha lovhedza mulamboni wa Jorodani.

⁶ Johanisi o vha o ambara nguvho ya vhukuse ha gamela, khunduni o i vhofha nga bannda ya mukumba, zwiḽiwa zwawe zwi nzie na ṋotshi dza ḓaka.

⁷ A vha vhudza a ri, “Hu si kale hu ḓo ḓa ane a mphira kule, lune ndi si vhuye nda fanela na u kotama nda vhofholola navhula dzawe.

⁸ Nṋe ndi ni lovhedza nga maḓi, hone Ene u ḓo ni lovhedza nga Muya Mukhethwa.”

U lovhedzwa na u lingwa ha Yesu

⁹ Misi iyo Yesu a ṱuwa Nazaretha, shangoni ḽa Galelia, a yo lovhedzwa nga Johanisi mulamboni wa Jorodani.

¹⁰ Musi Yesu a tshi bva maḓini, kathihi fhedzi a vhona lutombo lu tshi fhanduwa, Muya Mukhethwa a tshi khou tsela khae e kha tshivhumbeo tsha ḽiivha.

¹¹ Ha pfala ipfi ḽi bvaho ṱaḓulu ḽi tshi ri, “U Murwa wanga muthihi fhedzi, u a ntakadza.”

¹² Muya a mbo ḓi mu hwala a mu isa sogani.

¹³ Henengei a fhedza maḓuvha a 40 e vhukati ha zwivhanda, Saṱhane a tshi khou mu linga. Zwo no ralo ha ḓa vharuṅwa vha mu shumela.

Yesu a tshi vhidza vharei vha khovhe vhaṋa

¹⁴ Musi Johanisi o no hoṋelwa dzhele Yesu a ya Galelia u ḓivhadza mafhungo maḓifha a Mudzimu

¹⁵ a ri, “Tshifhinga ndi tshone, ni ḓo ṱuwa ni tshi vhuswa nga Mudzimu. Laṱani-ha vhuvhi haṋu ni tende mafhungo maḓifha.”

¹⁶ Huno Yesu a tshi khou tshimbila khunzikhunzini ya Dzivha ḽa Galelia, a vhona vharei vha khovhe vhavhili, Simoni na murathu wawe Andrisi, vha tshi khou rea khovhe nga mambule;

¹⁷ a amba navho a ri, “Iḓani ni vhe vhafunziwa vhanga, ndi ni funze u vha vhafashi vha vhathu.”

¹⁸ Vhone vha ṱutshela mambule avho na zwenezwo, vha vha vhafunziwa vhawe.

¹⁹ A tshi fhirela phanḓa, a wana Jakopo ṅwana wa Zebedia e na Johanisi murathu wawe, hu hone vha tshi khou dzudzanya mambule avho tshikepeni tshavho.

²⁰ Yesu a vha vhidza, vha mbo ḓi sia khotsi avho na vhashumi tshikepeni vha vha vhafunziwa vhawe.

Munna we a vha e na thuṅwa ya Saṱhane

²¹ Vha swika muḓini wa Kapernaumi. Nga Sabatha Yesu a dzhena sinagogoni a funza.

²² Vhathu vha kanuka pfunzo yawe, ngauri o vha a sa funzi sa vhaḓivhi vha Mulayo, a tshi tou pfala e Ene Muṋe wa mafhungo.

²³ Zwenezwo muṅwe munna we a vha e na thuṅwa ya Saṱhane, a ṱavha mukosi a ri,

²⁴ “U ṱoḓani fhano Iwe Yesu wa Nazaretha? Kani-ha ndi hone wo ḓa u ri lozwa? Iwe ndi a u ḓivha: U muḓinḓa mukhethwa wa Mudzimu.”

²⁵ Yesu a i kaidza a ri, “Fhumula iwe, u bve kha hoyu muthu!”

²⁶ Iyo thuṅwa ya khwiḓukanya uyo munna, ya ṱavha mukosi muhulu ha mbo ḓi vha u bva hayo.

²⁷ Zwa akhamadza vhathu vhoṱhe lwe vha thoma u vhudzisana vha ri, “Nṋa ndi mini izwi? Kani ndi yone pfunzo ntswa i no tou vha na maanḓa mangafha? Henefha hune a kaidza na thuṅwa dza mu pfa!”

²⁸ Zwi tshi ralo bvumo ḽa Yesu ḽa mbo ḓi pfala hoṱhe-hoṱhe shangoni ḽa Galelia.

Yesu a tshi fhodza vhathu vhanzhi

²⁹ U bva henefho sinagogoni ha vha u ya hayani ha Simoni na Andrisi vhe na Jakopo na Johanisi.

³⁰ Makhulutshisadzi wa Simoni vho vha vho rwelwa fhasi nga biso, muvhili woṱhe u tshi tou duga. Yesu a mbo vhudzwa eneo mafhungo.

³¹ A ya a mu fara nga tshanḓa a mu vusa, a mbo ḓi fhola a vha bikela.

³² Nga madekwana ḽi tshi vho swifhala, vha ḓisa vhalwadze vhoṱhe ha Yesu, na vha na thuṅwa dza Saṱhane.

³³ Muḓi woṱhe wa kuvhangana muṱani wonoyo.

³⁴ Yesu a fhodza vhanzhi vha malwadze o fhambanaho, a pandela na thuṅwa nnzhi kha vhathu. Huno vhunga dzo vha dzi tshi ḓivha uri ndi Ene nnyi, ho ngo vhuya a dzi tendela dzi tshi zwi bula.

Yesu a tshi funza shangoni ḽa Galelia

³⁵ Nga matshelo Yesu a fhinduwa hu tshee vhusiku a yo rabela sogani.

³⁶ Simoni na vhaḽa vhaṅwe vha bva vha yo mu ṱoḓa.

³⁷ Vha tshi mu wana vha ri, “Vhathu vhoṱhe vha khou vha lila.”

³⁸ Yesu a mbo ri, “Hafhu ri kha ḓi ḓo dzhena na kha miṅwe miḓi henefhano, ndi vha ḓivhadze-vho mafhungo maḓifha, vhunga ndo ḓela zwone.”

³⁹ Ndi zwe Yesu a ṱanganya ḽoṱhe ḽa Galelia, a tshi ri u funza sinagogoni, a dovha a pandela na thuṅwa dza Saṱhane.

Yesu a tshi fhodza muthu a lwalaho lukanda

⁴⁰ Ha ḓa munna khae a lwalaho vhulwadze ha lukanda vhu kumadzaho; onoyo a gwadama a mu losha a ri, “Muṋe wanga, hufha vhe na maanḓa a u mphodza; a thi fhodzwi-vho?”

⁴¹ Yesu a mu pfela vhuṱungu, a isa tshanḓa tshawe a mu kwama a ri, “Na zwino, fholani zwaṋu.”

⁴² A mbo ḓi fhola na zwenezwo, a sala o tou swoto.

⁴³ Yesu a mu pandela a tshi amba o tou halifha a ri,

⁴⁴ “Ni a vhona, ni songo vhuya na zwi vhudza muthu, tshaṋu ni mbo ḓi ya ha tshifhe uri a ni vhone, ni konou ṋekedza tshipfumelo tshe ra laedzwa nga Mushe, tshi vhe hone vhuṱanzi kha nnyi na nnyi ha uri no fhola.”

⁴⁵ Hone uyo munna u ṱuwa henefho ha mbo ḓi vha u thoma u anḓadza ayo mafhungo, lwe Yesu zwa vho mu konḓela u tshimbila vhathuni; a vho tou dzula masogani; hone na henefho vhathu vha ḓi mu tevhela vha tshi bva thungo dzoṱhe.