MALAKIA 4 - BIVHILI KHETHWA Mafhungo Madifha

Ḓuvha ḽa Muṋe washu ḽi khou ḓa

¹ Muṋe washu Mulangazwoṱhe u ri, “Vhukuma ḓuvha ḽi khou ḓa; ḽi ḓo fhisa unga ṋanḓo. Vhoṱhe vhadzia-u-ḓihudza na vhaitazwivhi vha ḓo nga maṱanga, ḓuvha heḽo ḽi no khou ḓa ḽi ḓo vha fhisa nga mulilo. A hu nga sali mudzi wavho kana davhi ḽavho.

² Hone inwi vhane na ofha dzina ḽanga ni ḓo penyelwa nga ḓuvha ḽi re u fulufhedzea, ḽa ni fhodza nga maṱalazaza aḽo. Ni ḓo khana unga ṋamana dzi tshi bva dangani.

³ Ndi hone ni tshi ḓo kandekanya vhavhi, vha ḓo nga milora ine na i kanda nga ṋayo musi une nda ita zwithu hezwo.”

Mulayo na vhaporofita ndi zwithihi

⁴ “Ni songo hangwa mulayo wa muḓinḓa wanga Mushe, ndayo na milayo ye nda mu ṋea thavhani ya Horebe uri i vhuse Vhaisraele vhoṱhe.

⁵ Vhonani, ndi ḓo ruma muporofita Elia a ḓa ha inwi, ḓuvha ḽanga iḽo ḽihulu ḽi ofhisaho ḽi sa athu ḓa.

⁶ U ḓo dovha a pfumedzanya vhokhotsi na vhana vhavho, mbilu dza vhana dza livha kha vhokhotsi avho, vha sala vha tshi pfana ndi sa ḓo ḓa nda lozwa shango ḽoṱhe.”