MALAKIA 3 - BIVHILI KHETHWA Mafhungo Madifha

¹ Muṋe washu Mulangazwoṱhe u ri, “Vhonani, ndi ḓo ruma muḓinḓa wanga ane a ḓo nndugisela nḓila. Zwenezwo Muṋe waṋu ane na mu lila u ḓo ḓa thembeleni yawe kathihi fhedzi; Ene Muruṅwa wa mulanga we na mu ṱulutshela. U nḓilani.”

² Huno ane a nga kona u konḓelela ḓuvha ḽa u ḓa hawe ndi nnyi? Ndi nnyi ane a nga ima musi a tshi bvelela? U ḓo nga mulilo wa u bvisa manyelo, u ḓo nga tshisibe tsha u kuvha.

³ U ḓo nga ane a bvisa manyelo a siliva a i kunisa; u ḓo kunisa Vhalivi a vha bvisa manyelo unga musuku na siliva. Zwenezwo Muṋe washu ndi hone a tshi ḓo wana vhanna vhane vha ḓo mu ṋekedza nduvho vha sa solei.

⁴ Ndi hone nduvho dza vhathu vha Juda na Jerusalema dzi tshi ḓo ṱanganedzwa nga Muṋe washu, zwa nga sa misi iḽa ya kale, sa miṅwaha iḽa ya u ranga.

⁵ Muṋe washu Mulangazwoṱhe u ri, “Ndi ḓo ḓa nda ni haṱula. A thi nga lengi u sengisa mingome na dziphombwe na vha anelaho mazwifhi na vhane vha dzima vhashumi vhavho malamba avho na vha no kandeledza tshilikadzi na vha si na vhokhotsi, na vhatsinda, Nṋe vha sa nnyofhi.”

U tswela Mudzimu

⁶ Muṋe washu Mulangazwoṱhe u ri, “Ndi Nṋe Yahavee, NDI ANE NDA VHA ENE, a thi shanduki. Hone inwi-vho ni ḓi dzula ni vhana vha Jakopo, mudziavhufhura muṋe wa dzina.

⁷ U bva misi ya vhokhotsi aṋu no ḓi furalela ndayo dzanga na si dzi tevhedze. Humelani ha Nṋe, na Nṋe ndi ḓo konou humela ha inwi. Hone ni vhudzisa na ri, ‘Ri ḓo huma hani?’

⁸ Ndi ri: Muthu a nga fhura Mudzimu naa? Hone inwi ni a mphura. Na dovha na vhudzisa na ri, ‘Ri u fhura nga zwifhio?’ Ni mphura nga u sa bvisa tshafumi na mitendelo.

⁹ No teketelwa tshoṱhe ngauri ndi Nṋe ane na ḓi mphura, inwi noṱhe.

¹⁰ Ḓisani tshafumi tshoṱhe nḓuni ya u vhulungela uri nḓuni yanga hu vhe na zwiḽiwa. Nṋe Yahavee Mulangazwoṱhe ndi ri: Nndingeni nga zwenezwo; ngoho ndi ḓo vula miṋango ya ṱaḓulu nda tou ni nisela mashudu.

¹¹ Ndi ḓo kaidza nzie dzi si ḽe zwiliṅwa zwaṋu; minḓirivhe masimuni aṋu a i nga moḓisi. Hu amba Nṋe Yahavee Mulangazwoṱhe.

¹² Zwenezwo tshakha dzoṱhe dzi ḓo ri ni na mashudu, ngauri shango ḽaṋu ḽi ḓo vha ḽi tshi takadza.” Ho amba Muṋe washu Mulangazwoṱhe.

Vha no fulufhedzea vha ḓo pfufhiwa

¹³ Muṋe washu u ri, “Ni vho tou ntswetha. Hone inwi ni vhudzisa na ri, ‘Ro u swetha nga zwifhio?’

¹⁴ No ri, ‘U shumela Mudzimu a zwi farisi tshithu. Ro wana mini nga u tevhedza ndayo dzawe, ri tshi tshimbila ro ambara madzanganda sa vha lilaho maṱoni a Yahavee Mulangazwoṱhe?

¹⁵ Hone zwino vhane vha ḓihudza ri ri vha na mashudu. Vhukuma vhaitazwivhi zwi a vha nakela, vhane vha levhela Mudzimu u a vha litsha.’ ”

¹⁶ Vhane vha ofha Muṋe washu vha tshi amba nga tshavho, Muṋe washu a thetshelesa a zwi pfa. A ri hu ṅwalwe bugu ya tshihumbudzo, ya avho vhane vha ofha Muṋe washu vha hulisa dzina ḽawe.

¹⁷ Muṋe washu Mulangazwoṱhe u ri, “Nga ḓuvha heḽo ḽine nda khou ḽi ḓisa, vha ḓo vha vhathu vhanga vhane nda vha takalela. Ndi ḓo vha khathutshela unga khotsi a tshi khathutshela ṅwana wawe ane a mu shumela.

¹⁸ Ni ḓo dovha na vhona phambano vhukati ha vhavhuya na vhavhi, vhukati ha vha no shumela Mudzimu na vha sa mu shumeli.”