MALAKIA 2 - BIVHILI KHETHWA Mafhungo Madifha

Vhutshifhe ha ngoho na ha khole-khole

¹ Muṋe washu Mulangazwoṱhe u ri, “Inwi vhotshifhe, zwino ndi khou laya inwi.

² Zwe na pfi ni zwi thetshelese, ni zwi sedze nga vhuronwane, ndi u hulisa dzina ḽanga. Zwino na sa zwi ita ndi ḓo ni teketela, ndi ḓo shandukisa mashudu aṋu a vha u teketelwa. Vhukuma ndo no ḓi ni teketela ngauri a no ngo sedza nga vhuronwane uri ni nkhulise.

³ Ndi ḓo pfisa vhana vhaṋu vhuṱungu nga mulandu waṋu; ndi ḓo ni shata khofheni nga muswane wa zwiṱhavhelo zwa vhuṱambo haṋu, nahone ndi ḓo bvisa Livi tshiimoni tshawe.

⁴ Ndi hone ni tshi ḓo zwi ḓivha uri o ni ṋeaho ndaela iyi ndi Nṋe, nge nda vhofha mulanga na Livi. Hu amba Nṋe Yahavee Mulangazwoṱhe.

⁵ Ndo vhofha mulanga nae: ndo mu ṋea vhutshilo na mulalo, o vha a tshi nkhulisa a nnyofha, a dzula a tshi tetemela dzina ḽanga.

⁶ Mulomoni wawe ho vha hu na ndayo ya ngoho, ho ngo vhuya a wanala a tshi amba zwa vhufhura. O tshila a tshi konana na Nṋe nga mulalo, a si na vhufhura, a rembulusa vhanzhi vha laṱa vhuvhi.

⁷ Ndi uri mulomo wa tshifhe wo fanela u funza vhathu vha nnḓivhe, a laya vhathu zwine nda funa, ngauri ndi ene muḓinḓa wa Nṋe Yahavee Mulangazwoṱhe.

⁸ Hone inwi no pambuwa nḓilani, na khukhula vhathu vhanzhi nga pfunzo yaṋu; no pfuka mulanga we nda vhofha na Livi.

⁹ Ndi zwe nda ita uri ni nyadziwe, vhathu vhoṱhe vha vhone ni si tshithu, nge na si tshimbile nḓilani dzanga tshaṋu ha vha u ita tshiṱalula musi ni tshi ḓa kha zwa mulayo wanga.”

Mudzimu a tshi vhona vhathu vha sa fulufhedzei

¹⁰ Roṱhe a ri na Khotsi muthihi naa? A ro ngo vhumbwa nga Mudzimu muthihi naa? Ndi mini ri tshi shata mulanga wa vhokhotsi tshika nga u shandukelana?

¹¹ Vhathu vha Juda vho shandukela Muṋe washu; ho itwa zwi nengisaho kha ḽa Israele na Jerusalema: Vhathu vha Juda vho kumadza hukhethwa hune ha funwa nga Muṋe washu nga u funana na vhasadzi vha no luvha midzimu isili, vha ita na u vha vhinga.

¹² Munna ane a ita zwenezwo ngavhe Muṋe washu a tshi mu bvisa kha vhathu vha Jakopo, khathihi na vhana vhawe na vhaḓuhulu, naho a tshi ṋekedza Muṋe washu Mulangazwoṱhe nduvho.

¹³ Tshiṅwe tshine na ita ngetshi: Ni ḓadza aḽiṱari ya Muṋe washu nga miṱodzi. Ni tsengisa miṱodzi na honḓa ngauri nduvho dzaṋu ha tsha dzi londa, ha tsha dzi ṱanganedza kha inwi o takala.

¹⁴ Zwino na vhudzisa na ri, “Ndi ngani?” Ndi uri Muṋe washu u a u haṱulela zwe wa ita musadzi we wa mu vhinga u tshi kha ḓi vha muṱhannga, wa sala u tshi mu shandukela naho e mufarisi wau, e musadzi we wa vhofha nae mulanga wa mbingano.

¹⁵ Muṋe washu ho ngo ni ita muthihi lwa muvhili na muya naa? Ndi mini o ni ita muthihi? Ndi uri u ṱoḓa ni tshi beba vhana vha re vhana vha Mudzimu. Zwenezwo ḓilondole, u songo shandukela musadzi we wa mu vhinga u tshi kha ḓi vha muṱhannga.

¹⁶ Muṋe washu Mudzimu wa Israele u ri, “U ṱalana ndi a hu vhenga, ndi a zwi vhenga arali muṅwe waṋu a tshi itela musadzi wawe tshiṱuhu tsho raloho.” Hu amba Muṋe washu Mulangazwoṱhe. Zwenezwo ḓilondole, ni songo shandukelana.

Ḓuvha ḽa khaṱhulo ḽi tsini

¹⁷ No dina Muṋe washu nga zwiambo zwaṋu. Ni vhudzisa na ri, “Ro mu dina nga zwifhio?” No mu dina nga u ri, “Vhane vha ita vhuvhi Muṋe washu u ḓi vhona vhe vhavhuya, u a vha takalela,” kana na ri, “Mudzimu a sa ṱaluli u ngafhi?”