LUKASI 23 - BIVHILI KHETHWA Mafhungo Madifha

Yesu a tshi sengiswa nga Pilato

¹ Ndi hone khoro yoṱhe i tshi takuwa vha isa Yesu ha Pilato;

² vha thoma u mu hwelela vha tshi ri, “Hoyu munna ro mu wana a tshi khou fhiriṱanya vhathu vha hashu, a tshi vha dzivhisa na u thela muthelo wa Khisara, a tshi ḓiita Mesia, u ralo ha vha u ḓiita khosi.”

³ Pilato a mu vhudzisa a ri, “Nṋa inwi ni khosi ya Majuda?” Ene a fhindula a ri, “Vha amba zwone.”

⁴ Pilato a amba na vhotshifhe vhahulwane na gogo ḽoṱhe a ri, “Nṋe hoyu muthu a thi vhoni mulandu wawe.”

⁵ Vhone vha tou oma kha ḽa uri, “U khou fhiriṱanya vhathu vhoṱhe kha ḽa Judia nga pfunzo yawe. O thoma Galelia, zwino o no swika na fhano.”

Yesu a tshi iswa ha Herude

⁶ Pilato a tshi pfa zwenezwo a vhudzisa a ri, “Nṋa uyu muthu ndi wa Galelia?”

⁷ A tshi pfa uri Yesu u bva shangoni ḽa Herude a mu fhirisela khae, ngauri na ene Herude o vha e Jerusalema nga tshifhinga tshenetsho.

⁸ Herude a tshi vhona Yesu a takala nga maanḓa, ngauri o vha o no pfa ngae huno hu kale a tshi tama u mu vhona. O vha a tshi ri khamusi u ḓo vhona Yesu a tshi ita maḓembe.

⁹ Ndi zwe a vhudzisa Yesu tshino na tshiḽa, hone Ene a si mu fhindule.

¹⁰ Vhotshifhe vhahulwane na vhaḓivhi vha Mulayo vho vha vho ima henefho vha tshi khou mu hwelela vho tou tandisa tsinga.

¹¹ Herude na maswole awe vha tamba nga Yesu vha tshi tou mu nyadza vha mu ambadza phuraphura ya maṱeleṱele, vha mu humisela ha Pilato.

¹² U thomani Pilato na Herude vho vha vhe maswina, hone u bva ḓuvha ḽeneḽo vha vho anḓana.

Yesu a tshi haṱulelwa lufu

¹³ Pilato a kuvhanganya vhotshifhe vhahulwane na vhahulwane vha lushaka na vhathu vhoṱhe,

¹⁴ a vha vhudza a ri, “Uyu muthu no mu ḓisa ha nṋe na ri u khou fhiriṱanya vhathu. Nṋe ndo mu sengisa ni tshi zwi pfa, hone a thi wani e na mulandu na muthihi kha zwoṱhe zwe na mu hwelela.

¹⁵ Hu ḓi nga Herude, na ene o wana a si na mulandu, ndi zwone zwe a mu humisela kha riṋe. A hu na tshe hoyu muthu a ita tsho eḓanwaho nga lufu.

¹⁶ Nazwino ndi ḓo tou ri a rwiwe nga nnzi nda konou mu vhofholola.”

¹⁷ [Nga Paseka Pilato o vha o fanela u ḓi vha vhofhololela muthu muthihi.]

¹⁸ Gogo ḽoṱhe ḽi tshi tou pfa Pilato a tshi ralo, ḽa zhamba mazha ḽa ri, “Kha a vhulawe, ri vhofhololelwe Barabasi!”

¹⁹ (Barabasi onoyo o vha o farelwa mufhirifhiri we wa vuwa henefho Jerusalema, ha vhulawa na muthu.)

²⁰ Pilato a dovha a amba navho a tshi tama u vhofholola Yesu.

²¹ Vhone vha zhamba vha ri, “Kha a vhambiwe! Kha a vhambiwe kha tshifhambano!”

²² Pilato a amba navho lwa vhuraru a ri, “Nṋa o tshinyani? Nṋe ndi vhona a si na mulandu wo eḓanwaho nga lufu! Ndi ḓo ri a wane nnzi ndi mu vhofholole.”

²³ Vhone vha tou ṋaṋa u zhamba vha tshi ḓi ri a vhambiwe, Pilato a vhuya a neta,

²⁴ a vho sokou haṱula uri hu itwe nga he vha humbela ngaho.

²⁵ A vhofholola we vha vha vho tou oma kha u mu humbela, uḽa we a vha o hoṋelwa dzhele nga mulandu wa mufhirifhiri na vhupondi, a vha kumedza Yesu uri vha ite zwine vha funa ngae.

Yesu a tshi vhambiwa kha tshifhambano

²⁶ Musi vha tshi khou ṱuwa nae vha fara muṅwe munna a no pfi Simoni wa Kirene a tshi khou dzhena muḓini, vha mu hwesa tshifhambano a tevhela Yesu.

²⁷ A tevhelwa nga gogo ḽihulu ḽe khaḽo ha vha hu na vhasadzi vhe vha vha vha tshi khou mu lilela vha tshi tou ḓiṱhukukanya.

²⁸ Yesu a rembuluwa a amba navho a ri, “Inwi vhasadzi vha Jerusalema! Ni songo lilela nṋe; ḓilileleni inwi vhaṋe ni lilele na vhana vhaṋu.

²⁹ Ḓivhani uri hu ḓo ḓa maḓuvha ane vhathu vha ḓo ri, ‘Vha na mashudu vha re vhaumba, vha ṋowa dzi songo vhuyaho dza fara, na maḓamu a songo vhuyaho a mamisa!’

³⁰ Ndi hone “ ‘vha tshi ḓo amba na thavha vha ri: Ri zhakeni! Vha amba na zwikwara vha ri: Ri tibeni!’

³¹ “Ndi uri arali thanda nṋu vha tshi tou i rali, yo omaho zwi ḓo tou ngani-ha?”

³² Ha dzhiwa na vhaṅwe vhanna vhavhili vha zwigevhenga uri vha yo vhambiwa na Yesu.

³³ Vha tshi swika fhethu hune ha pfi Dethele vha vhamba Yesu kha tshifhambano, na vhaḽa vhatshinyi vhavhili vha pfalwo; muṅwe thungo ya tshauḽa tshawe, muṅwe thungo ya tshamonde. [

³⁴ Yesu a ri, “Khotsi anga, vha hangwele; a vha ḓivhi zwine vha khou zwi ita.”] Vha kovhekana nguvho dzawe nga u tou ita madeṅwa.

³⁵ Vhathu vha ima vha tshi khou lavhelesa, vhahulwane vha lushaka vhone vha tshi tou ita na u mu nzhonzhowedza vha tshi ri, “Hufha vhaṅwe o vha tshidza; kha a ḓitshidze-vho arali e ene Mesia, munangiwa wa Mudzimu.”

³⁶ Maswole na vhone vha mu ṋea waini yo vhiluluwaho vha tshi khou mu kolela

³⁷ vha tshi ri, “Arali vhe vhone khosi ya Majuda muhali, kha vha ḓitshidze!”

³⁸ Nga nṱha ha ṱhoho yawe ho vha ho ṅwalwa upfi, “Hoyu ndi khosi ya Majuda.”

³⁹ Muṅwe wa zwiḽa zwigevhenga zwo vhambiwaho a mu holedza a ri, “Hufha u Mesia – ḓitshidze-ha u tshidze na riṋe!”

⁴⁰ Hone uḽa muṅwe a mu kaidza a ri, “Matsina na Mudzimu a ni mu ofhi? Hufha na inwi no haṱulwa u fana na onoyu?

⁴¹ Hone riṋe zwo ri fanela, ri khou tou wana ṱhamu ya mishumo yashu. A vha uyu ha na tshe a tshinya.”

⁴² A konou amba na Yesu a ri, “Yesu, vha nkhumbule-vho musi vha tshi dzhena vhuhosi!”

⁴³ Yesu a amba nae a ri, “Zwino ipfani-ha: ṋamusi ni ḓo vha na Nṋe Pharadisoni.”

Lufu lwa Yesu

^44-45 Masiari tshivhangalala nga 12 ḓuvha ḽa dzima, shango ḽoṱhe ḽe nzwii u swika nga tsha vhuraru tsha masiari. Sila ḽa lupila ḽe ḽa vha ḽi nḓuni ya Mudzimu ḽa kheruwa nga vhukati ḽa bva mbemba mbili.

⁴⁶ Zwo no ralo Yesu a vhidzelela nga ipfi ḽihulu a ri, “Khotsi, muya wanga ndi u kumedza zwanḓani zwau!” A ri u ralo a dzama.

⁴⁷ Mulangagomane a tshi vhona zwo iteaho a renda Mudzimu a ri, “Nangoho uyu muthu o vha e muvhuya!”

⁴⁸ Na vhathu vhanzhi-vhanzhi vhe vha vha vho kuvhanganela u tou vhona, vha tshi vhona zwo iteaho vha humela mahayani vha tshi khou ḓirwa dzikhana nga u pfa vhuṱungu.

⁴⁹ Khonani dza Yesu khathihi na vhaḽa vhasadzi vhe vha vha vha tshi khou ḓi tshimbila nae u bva Galelia vho vha vho ima kule vha tshi khou vhona zwithu hezwo zwoṱhe.

U swiṱwa ha Yesu

^50-51 Henefho ho vha hu na muṅwe munna a no pfi Josefa we a vha a tshi bva kha muṅwe muḓi wa Judia u no pfi Arimathia. Onoyo o vha e muthu muvhuya a pfaho Mudzimu, o dzulaho o lindela u ḓa ha muvhuso wa Mudzimu. Ndi zwe naho o vha e muraḓo wa khoro a si pfane na zwe vha langana na zwe vha ita.

⁵² A ya ha Pilato a mu humbela tshitumbu tsha Yesu.

⁵³ A konou tshi fhahulula a tshi putela nga lukhaha lwavhuḓi a mu swiṱa tshaloni tsho korwaho kha tombo tshe tsha vha tshi sa athu swiṱa muthu.

⁵⁴ Ḽo vha ḽi ḓuvha ḽa u lugisela Sabatha, yone i tshi vho ṱoḓou thoma.

⁵⁵ Vhasadzi vhe vha ḓa na Yesu a tshi bva Galelia, vha tevhela vha ya u vhona tshalo na kuswiṱelwe kwa Yesu;

⁵⁶ vha konou humela hayani u lugisa mishonga na zwiḓolo zwa mufu. Nga Sabatha vha awela hu u tevhedza Mulayo.