LUKASI 22 - BIVHILI KHETHWA Mafhungo Madifha

Vhathu vha tshi langana u vhulaha Yesu

¹ Ha sendela tshifhinga tsha vhuṱambo vhu no pfi Paseka, ha Vhurotho vhu si na mbilisa.

² Vhotshifhe vhahulwane na vhaḓivhi vha Mulayo vho vha vha tshi khou ṱoḓa nḓila ya u vhulaha Yesu nga tshiphiri ngauri vho vha vha tshi ofha vhathu.

Judasi a tshi fheṱa Yesu

³ Zwenezwo Saṱhane a dzhena kha Judasi a no pfi Iskariote, muṅwe wa vha 12.

⁴ Onoyo a ṱuwa a yo sola na vhotshifhe vhahulwane na vhalangi vha vhalindathembele uri ene a nga vha sumbedza nḓila ya u fara Yesu.

⁵ Vhone vha takala, vha ita na u fulufhedzisa uri vha ḓo mu ṋea tshelede.

⁶ Judasi a tendelana navho a dzula o lindela tshifhinga tshine a nga fheṱa Yesu ngatsho vhathu vha sa zwi ḓivhi.

Yesu a tshi lugiselwa Paseka

⁷ Ha swika ḓuvha ḽa vhuṱambo ha Vhurotho vhu si na mbilisa ḽine ha fanela u ṱhavhiwa ngwana dza Paseka.

⁸ Yesu a ruma Pitrosi na Johanisi a ri, “Iyani u ri lugisela Paseka, ri i ḽe.”

⁹ Vhone vha mu vhudzisa vha ri, “Ndi ngafhi hune vha funa ri tshi i lugisa hone?”

¹⁰ Ene a ri, “Vhonani, ni ḓo ri u dzhena afho Jerusalema na ṱangana na munna o hwala mvuvhelo ya maḓi. Ni mu tevhele nḓuni ine a dzhena khayo,

¹¹ ni ambe na muṋe wa muṱa ni ri, ‘Vhafunzi vha khou vhudzisa iḽa kamara ine vha nga ḽela khayo Paseka na vhafunziwa vhavho.’

¹² Ene u ḓo ni sumbedza kamara khulwane ya tshitizi yo lugiswaho; ni i lugise henefho.”

¹³ Vha tshi ya vha wana zwe Yesu a amba zwo tou ralo, vha mbo lugisa Paseka.

Yesu a tshi ḽa Tshilalelo na vhafunziwa vhawe

¹⁴ Tshifhinga tshi tshi swika Yesu a lalela na vhaapostola.

¹⁵ A amba navho a ri, “Ndo tama hani u ḽa Paseka iyi na inwi ndi sa athu tambudzwa!

¹⁶ Ndi a ni vhudza ndi ri, a thi tsha ḓo dovha nda i ḽa zwi vhuye zwi khunyelele muvhusoni wa Mudzimu.”

¹⁷ Ndi hone Yesu a tshi dzhia tshinwelo a livhuha Mudzimu a konou ri, “Dzhiani ni nwe ni tshi tou sielisana,

¹⁸ ngauri ndi a ni vhudza ndi ri, a thi tsha ḓo dovha nda nwa waini u bva zwino muvhuso wa Mudzimu u vhuye u ḓe.”

¹⁹ A konou dzhia na vhurotho, a livhuha Mudzimu a vhu ṅwatekanya a vha ṋea a tshi khou ri, “Hoyu ndi muvhili wanga [une wa khou kumedzwa hu u itela inwi. Ni ḓi ita hezwi, hu vhe u nnyelelwa.”

²⁰ A ḓi ralo na musi a tshi vha ṋea tshinwelo vho no ḽa tshilalelo; a ri, “Tshinwelo itshi ndi malofha anga ane a khou shululelwa inwi, a khwaṱhisa mulanga muswa.]

²¹ “Huno vhonani! Muthu ane a ḓo mpheṱa u ḓi vha-vho henefhano zwiḽiwani na Nṋe.

²² Mubebwa-nga-muthu u ḓo fara nḓila ye Mudzimu a mu dzudzanyela, hone ane a mu fheṱa u ḓo zwi vhona!”

²³ Ndi hone vha tshi thoma u vhudzisana nga tshavho uri a nga vha e nnyi wavho a no ḓo ita zwo raloho.

Khani nga ḽa uri muhulwane ndi nnyi

²⁴ Zwino ha vuwa khani vhukati ha vhafunziwa ya uri ane a nga pfi muhulwane khavho a nga vha e nnyi.

²⁵ Yesu a amba navho a ri, “Mahosi a dzitshakha ndi one a no langa vhathu nga tshiṱuhu, vhavhusi vha ri ri pfi vhafuwi.

²⁶ Kha inwi a zwo ngo ralo; muhulwane kha inwi nga a nge ene muṱuku; a re murangaphanḓa a vhe mushumeli.

²⁷ Nṋa hone muhulwane ndi ufhio? Ndi uyo o dzulaho zwiḽiwani kana ndi a no khou ḓisa zwiḽiwa? A si o dzulaho zwiḽiwani kani? Huno vhonani-ha, Nṋe ndi khou nga mushumeli waṋu.

²⁸ Ndi inwi vhe na konḓelela na Nṋe kha u tambula hanga,

²⁹ ndi ni ita maḽaifa a vhuhosi honoho he nda ṋewa nga Khotsi,

³⁰ ni ḓo ḽa muthathe na Nṋe muvhusoni wanga, na dzula kha khuluṋoni ni tshi vhusa matsinde a 12 a Israele.

Yesu a tshi porofita uri Pitrosi u ḓo mu laṱa

³¹ “Simoni! Simoni! Vhonani! Mudzimu o tendela Saṱhane u ni fhefhera noṱhe sa goroi.

³² Nṋe-ha Simoni ndo ni rabelela uri ni si gunee. Huno inwi musi no no vhuya kha Nṋe ni khwaṱhise vharathu vhaṋu.”

³³ Pitrosi a fhindula a ri, “Muṋe wanga, nṋe ndo ḓiimisela u valelwa dzhele na u fa navho!”

³⁴ Yesu a fhindula a ri, “Ndi tshi tou ni vhudza Pitrosi, mukukulume u sa athu lila vhusiku ha ṋamusi ni ḓo vha no no landula luraru na ri a ni nnḓivhi.”

Tshipatshi na mukhwama na banga

³⁵ Zwenezwo Yesu a vha vhudzisa a ri, “Nṋa tshiḽa tshifhinga ndi tshi ni ruma ni si na tshipatshi na mukhwama na navhula no vhuya na lila tshithu naa?” Vhone vha fhindula vha ri, “Na tshithihi.”

³⁶ Yesu a amba navho a ri, “Hone zwino ane a vha na tshipatshi kana mukhwama u fanela u tshimbila nazwo; huno na a si na banga nga a tou rengisa badzhi yawe a ḽi renge.

³⁷ Ndi a ni vhudza ndi ri: he ha ṅwalwa ha pfi, ‘O baḓekanywa na vhavhi’, zwo fanela u khunyelela kha Nṋe, ngauri zwe zwa ṅwalwa zwi tshi amba Nṋe zwi khou khunyelela.”

³⁸ Vhone vha ri, “Muṋe washu, ri na mapanga mavhili ngea!” Ene a fhindula a ri, “Mafhungo ayo kha ri a litshe.”

Yesu a tshi rabela Thavhani ya Miolivi

³⁹ Yesu a bva a ya Thavhani ya Miolivi sa misi; vhafunziwa vhawe vha bva nae.

⁴⁰ Vha tshi swika henefho a amba navho a ri, “Rabelani uri ni si ungwe.”

⁴¹ Ene a mbo ḓi vha sia henefho a swika hune muthu a tshi posa tombo ḽa swika, a gwadama a rabela a ri,

⁴² “Khotsi anga, arali zwi tshi konea uri tshinwelo itshi ndi si tshi nwe, a tshi mphiri zwanga naa? Naho ndi tshi ralo, hu songo itwa zwine Nṋe nda funa, hu itwe zwi funwaho nga Iwe.”

⁴³ [A vhona muruṅwa a tshi bva ṱaḓulu a tshi ḓa u mu khwaṱhisa.

⁴⁴ A rabela o tou fhelela nga u pfa vhuṱungu, biko ḽawe ḽa rothela mavuni ḽi tshi nga marotha a malofha.]

⁴⁵ O no rabela a vhuelela ha vhafunziwa, a wana vho eḓela vho tou ṋoka nga u ṱungufhala.

⁴⁶ A amba navho a ri, “No eḓela! Vuwani ni rabele uri ni sa ḓo xedzwa nga Saṱhane.”

Yesu a tshi farwa

⁴⁷ A tshi kha ḓi amba ha mbo swika tshigwada tsho rangwa phanḓa nga muṅwe wa vha 12, uḽa Judasi. Onoyo a ri u swika a mbo ḓi ya kha Yesu a mu kuvhatedza.

⁴⁸ Hone Yesu a amba nae a ri, “A, Judasi, ni vhuya na tou swika kha u fheṱa Mubebwa-nga-muthu nga u tou mu kuvhatedza naa?”

⁴⁹ Khonani dza Yesu dzi tshi vhona zwine zwa ṱoḓa u itea dza ri, “Muṋe washu, a si khwiṋe ri tshi vha dzhena nga mapanga?”

⁵⁰ Muṅwe wavho a rema mushumi wa tshifhe muhulu nga banga a mu tumula nḓevhe ya tshauḽa.

⁵¹ Hone Yesu a ri, “Litshani zwa nndwa.” A konou kwama nḓevhe ya munna uyo a mu fhodza.

⁵² Yesu a mbo ḓi amba na vhotshifhe vhahulwane na vhalangi vha vhalindathembele na vhahulwane vha lushaka vhe vha vha vho ḓa u mu fara a ri, “Ni tou vhuya na ḓa no hwala mapanga na dzithonga nda nga ndi ḽivemu?

⁵³ Hufha ndo vha ndi tshi ṱwa na inwi thembeleni ḓuvha ḽiṅwe na ḽiṅwe; no kundwa ngani u mpfara? Tshino-ha ndi tshifhinga tshaṋu tsha musi hu tshi vhusa swiswi.”

Pitrosi a tshi landula Yesu

⁵⁴ Ndi hone vha tshi fara Yesu vha ṱuwa nae vha mu isa muṱani wa tshifhe muhulu, Pitrosi ene a tshi khou tevhela nga kule.

⁵⁵ Vha vhasa mulilo muṱani vha ora, na Pitrosi a ḓa a dzula navho.

⁵⁶ Muṅwe mushumi wa musidzana a tshi mu vhona nga tshedza tsha mulilo a mu sedzesa a ri, “Hoyu na ene ndi muṅwe ngae.”

⁵⁷ Pitrosi ene a hanedza a ri, “Khaladzi, nṋe hoyo muthu a thi vhuyi nda mu ḓivha.”

⁵⁸ Hu si kale muṅwe munna a mu vhona-vho a ri, “Na inwi ni muṅwe ngavho!” Pitrosi a ri, “Wa hashu, nṋe a thi muṅwe ngavho lini!”

⁵⁹ Ho no fhela tshifhinga tshine tsha nga vha awara muṅwe munna na ene a amba o tou khwaṱhisa a ri, “Vhukuma hoyu munna ndi muṅwe ngae, hufha e Mugalelia?”

⁶⁰ Pitrosi a ri, “Wa hashu, nṋe a thi ḓivhi uri ni khou amba mini.” A tshi kha ḓi ralo mukukulume wa vha u a lila.

⁶¹ Muṋe washu a rembuluwa a ṱanganya maṱo na Pitrosi, ha vha hu hone Pitrosi a tshi elelwa zwe Muṋe washu a mu vhudza a tshi ri, “Mukukulume u sa athu vhuya wa lila vhusiku ha ṋamusi ni ḓo vha no no landula luraru na ri a ni nnḓivhi.”

⁶² Pitrosi a bvela nnḓa a lila lu ṱungufhadzaho.

U goḓwa na u rwiwa ha Yesu

⁶³ Vhanna vhe vha vha vho linda Yesu vha tamba ngae vha tshi ita na u mu likita.

⁶⁴ Vha mu thivha maṱo vha konou ri, “Porofita-ha, ndi nnyi o u rwaho?”

⁶⁵ Vha mu sema na nga maṅwe maṱamba manzhi.

Yesu a tshi sengiswa nga khoro ya Majuda

⁶⁶ Nga matshelonitsheloni ha mbo dzula khoro ya vhahulwane vha lushaka na vhotshifhe vhahulwane na vhaḓivhi vha Mulayo, Yesu a ḓiswa phanḓa havho,

⁶⁷ vha amba nae vha ri, “Arali ni Mesia, ri vhudzeni.” Ene a fhindula a ri, “Arali nda ri, ‘Ndi Nṋe,’ a ni nga tendi;

⁶⁸ hu ḓi nga nda ni vhudzisa mbudziso, a ni nga fhinduli.

⁶⁹ Hone u bva zwino Mubebwa-nga-muthu u vho ḓo dzula thungo ya tshauḽa tsha Mudzimu Ramaanḓa a vhusa nae.”

⁷⁰ Vhoṱhe vha ri, “Izwo zwi amba uri ni Murwa wa Mudzimu?” Ene a vha fhindula a ri, “Inwi ni amba zwone; ndi Nṋe.”

⁷¹ Vhone vha ri, “Ri kha ḓi ṱoḓa ṱhanzi dza mini, hufha zwe a amba ro tou ḓipfela nga roṱhe?”