LUKASI 10 - BIVHILI KHETHWA Mafhungo Madifha

Yesu a tshi ruma vha 72

¹ Ndi hone Muṋe washu a tshi ta vhaṅwe vha 72, a vha ruma nga vhavhili-vhavhili uri vha mu range phanḓa, vha ye miḓini yoṱhe na hoṱhe he a vha a tshi khou ṱoḓa u ya hone.

² A amba navho a ri, “Zwikaṋwa ndi zwinzhi, hone vhakaṋi ndi vha si gathi. Humbelani-ha Muṋe wa tsimu uri a rume vhashumi masimuni awe.

³ Tshimbilani; tshi re hone ndi a ni ruma zwa nga muthu a tshi khadela ngwana vhukati ha maṱalerwa.

⁴ “Ni songo vhuya na fara tshipatshi tsha tshelede naho u mukhwama kana navhula zwadzo; nahone ni songo fhedza tshifhinga nga u resha muthu nḓilani.

⁵ Muṱani muṅwe hune na dzhena ni thome nga u ri, ‘Mulalo!’

⁶ Arali henefho hu na mudziamulalo, u resha haṋu hu ḓo mu ḓisela mulalo; arali muthu o raloho a siho, mulalo u ḓo humela kha inwi vhaṋe.

⁷ Ni dzule henefho muṱani wonoyo, ni ḽe ni nwe zwenezwo zwine vha ni ṋea; mushumi o fanela u ṋewa malamba awe. Ni songo fhiruludza na bva khawo na ya kha muṅwe.

⁸ Arali na ri ni tshi dzhena muḓini vhathu vha henefho vha ni ṱanganedza, ni ḽe zwine vha ni avhela;

⁹ ni fhodze na vhalwadze vhane vha vha henefho, ni konou vha vhudza ni ri, ‘Zwino ndi hone tshifhinga tsho sendela tsha uri ni vhuswe nga Mudzimu.’

¹⁰ Arali na ri ni tshi dzhena muḓini vhathu vha henefho vha si ni ṱanganedze, ni bvele nnḓa zwiṱaraṱani ni ri,

¹¹ ‘Ri khou tou fhufhura na buse ḽa muḓini wa haṋu ḽi re kha milenzhe yashu uri ni vhone uri zwi kha inwi; hone ni zwi ḓivhe uri muvhuso wa Mudzimu wo no tou vha tsini-tsini!’

¹² A vha Nṋe ndi ri nga ḓuvha ḽa khaṱhulo ṱhamu ine Mudzimu a ḓo rwa ngayo uyo muḓi i ḓo vhavha u fhira na i no ḓo rwa Sodoma.

Khombo ine ya ḓo wela miḓi i sa tendi

¹³ “U ḓo zwi vhona iwe Khorazini! U ḓo zwi vhona iwe Betsaida! Ngavhe maḓembe e a itwa kha inwi a vhe o itwa Tiro na Sidoni ndi musi vhathu vha iyo miḓi vha tshi ḓo vha vho no rembuluwa kale, vho vha vha tshi ḓo vha vho no ambara madzanganda, vha tshi khou ḓimbulumbudza milorani nga u ḓisola.

¹⁴ Nga ḓuvha ḽa khaṱhulo ṱhamu ine na ḓo rwiwa ngayo i ḓo vhavha u fhira na i no ḓo rwa Tiro na Sidoni.

¹⁵ Iwe-vho Kapernaumi, u vhona unga u ḓo huliswa wa swika makoleni naa? Matsina zwiḽa, u ḓo tou tsiselwa fhasi-fhasi dindini.”

¹⁶ A dovha a amba na vhafunziwa vhawe a ri, “Ane a thetshelesa inwi u thetshelesa Nṋe; hone ane a ni landula u landula Nṋe; huno uyo ane a landula Nṋe u landula o nthumaho.”

Vhaḽa vha 72 vha tshi vhuya

¹⁷ Vhaḽa vha 72 vha vhuya vho tou takala, vha ri, “Muṋe washu, thuṅwa dza Saṱhane na dzone dzi a ri pfa musi ri tshi dzi kaidza nga dzina ḽavho.”

¹⁸ Yesu a konou amba navho a ri, “Ndo vhona Saṱhane a tshi wa unga nḓadzi i tshi bva makoleni.

¹⁹ Inwi ndo ni fha maanḓa a u kandekanya dziṋowa na dziphame, na u kunda maanḓa oṱhe a swina, hu si vhe na tshine tsha ni ita tshithu.

²⁰ Tshi re hone ni songo sokou takadzwa nga u kona u pandela thuṅwa dza Saṱhane, takalani nge madzina aṋu a ṅwalwa ṱaḓulu.”

Dakalo ḽa Yesu

²¹ Zwenezwo a amba o ḓadzwa dakalo nga Muya Mukhethwa, a ri, “Ndi a u renda Khotsi, Iwe Muṋe wa ḽiṱaḓulu na ḽifhasi, ngauri hezwi zwithu wo zwi dzumbela vho funzwaho na vha vhuṱali wa zwi dzumbululela vhaṱoma. Iina Khotsi, iṱali wo vha wo ḓi zwi funa nga u ralo.

²² “Zwithu zwoṱhe Khotsi anga o zwi kumedza Nṋe; a hu na ane a ḓivha Murwa arali e si Khotsi; nahone a hu na ane a ḓivha Khotsi arali e si Murwa, na onoyo ane Ene Murwa a takalela u mu dzumbululela.”

²³ Ndi hone a tshi rembuluwa a lavhelesa vhafunziwa vhawe a ri, “Vha na mashudu vhe vha vhona nga maṱo zwine inwi na zwi vhona.

²⁴ Ndi vhaporofita vhanzhi na mahosi manzhi o tamaho u vhona zwine inwi na zwi vhona, hone vha kundwa; na zwine na zwi pfa vho ḓi funa u zwi pfa, hone vha kundwa.”

Tshifanyiso tsha Musamaria wa mbilutshilidzi

²⁵ Ha mbo takuwa muṅwe muḓivhi wa Mulayo a mu vhudzisa hu u mu linga a ri, “Vhafunzi, ndi fanela u ita tshithu-ḓe uri ndi fhiwe vhutshilo vhu sa gumi?”

²⁶ Yesu a mu vhudzisa-vho a ri, “Nṋa Mulayoni ho ṅwaliwa upfi mini? Ni tshi vhala ni ri mini?”

²⁷ Uyo munna a tshi fhindula a ri, “Hu pfi, ‘Funa Muṋe washu Mudzimu wau nga mbilu yoṱhe, nga zwoṱhe zwine wa vha zwone, nga nungo dzoṱhe, nga ṱhalukanyo yoṱhe; funa wa hau unga iwe muṋe.’ ”

²⁸ Yesu a mu fhindula a ri, “Ni amba zwone. Itani zwenezwo, ndi hone ni tshi ḓo tshila.”

²⁹ Hone uyo munna a tshi ṱoḓa u ḓiṱamba, a ri, “Nṋa hone wa hanga ndi nnyi?”

³⁰ Yesu a fhindula a ri, “Muṅwe munna o vhuya a fara lwendo a tshi bva Jerusalema a tshi tsela Jerikho. Nḓilani a tshenuwa o wela zwanḓani zwa mavemu; a mu ṱangula zwiambaro, a mu rwa, a mu sia o dzidzivhala.

³¹ Zwa ṱangana na muṅwe tshifhe o fara gondo ḽeneḽo, a ri a tshi vhona yeneyo khuvhabvu, a bva nga thungo.

³² Muṅwe Mulivi a tshi swika-vho henefho, na ene a ri u mu vhona a ḓi fhira nga thungo.

³³ Hone muṅwe Musamaria we a vha o fara nḓila yeneyo, a mbo ḓi ṱangana na uyo muthu. “A tshi mu vhona a khathuwa mbilu.

³⁴ A ya khae a ṱanzwa mbonzhe dzawe nga waini, a dzi ḓodza mapfura a dzi pomba; a konou mu namedza kha mbelesa yawe a mu isa nḓuni ya vhaeni, a mu onga henefho.

³⁵ Nga matshelo a bvisa maseṱha mavhili a ṋea muṋe wa nnḓu ya vhaeni a ri, ‘Vha sale vha tshi mu onga. Arali tshelede ya ṱahela, ndi ḓo i vhumba ndi tshi vhuya.’

³⁶ Zwino inwi ni vhona unga ri nga ri uyo o welaho zwanḓani zwa mavemu u ḓo ri wa hawe ndi ufhio kha avho vhararu?”

³⁷ Muḓivhi wa Mulayo a fhindula a ri, “Ndi uyo we a mu pfela vhuṱungu.” Ndi hone Yesu a tshi ri, “Na inwi tshimbilani ni yo ita nga u ralo.”

Yesu e mueni ha Marita na Maria

³⁸ Musi vhe lwendoni, vha swika muḓini, muṅwe musadzi a no pfi Marita a mu swielela muṱani wa hawe.

³⁹ Zwino Marita o vha e na murathu wawe a no pfi Maria. Onoyo Maria a ya a dzula milenzheni ya Muṋe washu a tshi khou thetshelesa zwine a funza.

⁴⁰ Marita ene o vha e khakhathini ya u bikela vhaeni. A ḓa a ri, “Muṋe wanga, vha vhona zwi zwone zwenezwi zwine murathu wanga a nndaṱedza nda shuma ndi ndoṱhe? Kha vha mu vhudze a ḓe a mpfarise.”

⁴¹ Muṋe washu a tshi fhindula a ri, “Nṋa zwino ndi mini Marita? Khezwi ni tshi ṱolou ḽa mbilu na u ḓidina nga zwithu zwinzhi-zwinzhi!

⁴² Zwi ṱoḓeaho a zwi gathi, tshililelwa tshone tshi tshithihi. Hoyu Maria o nanga tshone tsha khwiṋe, ndi mukovhe une a sa ḓo vhuya a dzhielwa nga muthu.”