LUIMBOIMBO 8 - BIVHILI KHETHWA Mafhungo Madifha

Musidzana: “Ngavhe ni khaladzi anga!”

¹ Ngavhe ni khaladzi anga we a ntsiela ḓamu, ndo vha ndi tshi ḓo ri u ṱangana na inwi gondoni nda ni khisa, ha si vhe na a nnyadzaho.

² Ndo vha ndi tshi ḓo ṱuwa na inwi ra ya muṱani wa mme anga, hune na ḓo kona u nngudisa zwa lufuno. Ndo vha ndi tshi ḓo ni fha waini yo vangwaho, na nwa tuvhu ḽanga.

³ Ngavhe ndi tshi siamela tshanḓa tshaṋu tsha monde, tshauḽa tsho nkuvhatedza!

⁴ Inwi vhasadzi vha Jerusalema, mpfulufhedziseni! Ni ri a ni nga rithi lufuno lwanga kana na lu vusa. Lu litsheni lu vuwe nga lwoṱhe!

Vhasadzi:

⁵ Ndi nnyi uyu ane a bva phangani ó ḓitika nga mufunwa wawe? Ni kha ḓi elelwa uri ndo ni vusa fhasi ha uyu muapula he mme aṋu vha ni ṱanganedza muvhilini wavho, he na bebwa hone?

Musidzana:

⁶ Nkungeleni mbiluni yaṋu unga vhulungu he na kungela mukuloni, unga rinngi ya luswayo ye na ambara tshanḓani. Lufuno lu na maanḓa a no nga a lufu: tshiṱuvho tshalwo tshi na maanḓa a no nga a tshalo; lu fhisa unga khavhu ya mulilo, khavhu i sa konadzei.

⁷ Maḓi mahulu a nga si dzime lufuno; a hu na milambo ine ya nga lu kumba. Naho muthu a bvisa lupfumo lwawe lwoṱhe a tshi ri a renge lufuno, tshine a ḓo wana ndi u nyadzea fhedzi.

Khaladzi dza musidzana (zwe vha amba kale):

⁸ Khaladzi ashu u tshee muṱuku, ha athu tunga maḓamu; uyu khaladzi ashu ri ḓo mu itelani musi a tshi ambiswa?

⁹ Arali a tshi fulufhedzea ó khwaṱha unga mutsheṱo, ri ḓo mu tonda ra nga ro fhaṱa thawara ya siliva nṱha hawe. Arali a sa koni u ḓifara a tshi nga muṋango wo vuleaho, ri ḓo mu linda ra nga ro mu vala nga vothi ḽa mukedara.

Musidzana:

¹⁰ Nṋe ndi mutsheṱo u sa gonyiwi, maḓamu anga a nga thawara dzawo; ndi zwine nda takadza mufunwa wanga.

Muṱhannga: Mashudu a no fhira a Solomoni

¹¹ Solomoni u na tsimu ya minḓirivhe fhethu hu no pfi Baali Hamoni. Iyo tsimu o i adzima vhalimi; muṅwe na muṅwe u bvisa mangwende a tshigidi a siliva.

¹² Vho-Solomoni, vhone vha nga ḓi wana zwavho mangwende a zwigidi, vhashumi vha wana zwavho mangwende a maḓana mavhili, nṋe ndi na tsimu yanga ya minḓirivhe, ndi yanga ndi ndoṱhe!

¹³ Inwi mufunwa wanga ni dzulaho tsimuni ya miri, kha ndi pfe ipfi ḽaṋu; khonani dzanga dzo lindela u ni pfa ni tshi amba!

Musidzana:

¹⁴ Mufunwa wanga, ṱavhanyani u ḓa ha nṋe ni tshi tou gidima unga tsephe, ni tshi nga tholo nṱha ha dzithavha dzi melaho zwilungalungane.