LUIMBOIMBO 7 - BIVHILI KHETHWA Mafhungo Madifha

Solomoni:

¹ Ṋayo dzaṋu dzo naka hani dzó ambara navhula, inwi mukololo! Zwirumbi zwaṋu zwo vhumbwa unga vhulungu, wone mushumo wa mutsila makone!

² Mukombo waṋu u nga ndilo ya tshikulungu i no dzula i na waini yo vangwaho; tshiḽelo tshaṋu tshi nga thulwi ya goroi yo tangwaho nga phendephende;

³ maḓamu aṋu a nga tholo mbili, a nga tshephe dza mafhaṱa;

⁴ mutsinga waṋu u nga thawara ya ṋanga dza nḓou; maṱo aṋu a penya unga maisha a muḓi wa Hesheboni tsini ha khoro ya muḓi hoyo muhulu; ningo yaṋu yo naka unga muṱumba wa Libanoni yo lavhelesanaho na Damasko;

⁵ ṱhoho yaṋu yo ni nakisa unga thavha ya Kharamele; mavhudzi aṋu a nembelelaho a nga muridili, u naka hao ho fasha khosi!

⁶ Iwe lufuno, wo naka hani! U takadza u fhira zwoṱhe zwi tamisaho.

⁷ Mufunwa wanga, no ima unga mutshevho; maḓamu a nga khula dzawo.

⁸ Ndi ri ndi ḓo gonya mutshevho nda fula mitshelo yawo! Ngavhe maḓamu aṋu a tshi nga tshiṱokola tsha munḓirivhe, mufemo waṋu u nukhelelaho u ḓifha wa nga maapula,

⁹ mulomo waṋu wa nga waini i ḓifhaho ndi tshi ni khisa. Aiwa, waini nga i ele i tshi ya ha mufunwa wanga! I elele kha milomo yawe na kha maṋo awe!

Musidzana:

¹⁰ Nṋe ndi wa mufunwa wanga, na ene u ṱulutshela nṋe fhedzi!

¹¹ Iḓani mufunwa wanga, nga ri bve ri ye masimuni, ḽi tshe ri miḓini!

¹² Ri ḓo fhindutshela masimuni a minḓirivhe, ra vhona arali yo no ṱuma lurere, arali yo no kulukusha, arali miri yo no fhufhumisa; ndi hone hune nda ḓo ni ṋea tshifhiwa tsha lufuno lwanga.

¹³ Marumbuḓane a nukhelela u ḓifha, mitshelo i si nongo vha hone i muṋangoni washu. Mufunwa wanga, ndo ni vhulungela yone – miswa na ya kale.