LUIMBOIMBO 6 - BIVHILI KHETHWA Mafhungo Madifha

Vhasadzi:

¹ Inwi no nakaho u fhira vhasadzi vhoṱhe, mufunwa waṋu o yafhi? Ri vhudzeni uri o fara ifhio, ri ḓo ni ṱoḓisa.

Musidzana:

² Mufunwa o tsela tsimuni yawe, o ya zwidimani zwa zwilungalungane; u khou fulisa sambi ḽawe tsimuni, u ita a tshi ka na phendephende.

³ Mufunwa wanga ndi wanga fhedzi, na nṋe ndi wawe fhedzi, wa onoyo a no fulisa sambi ḽawe phendephendeni.

Solomoni a tshi ambisa musidzana:

⁴ Mufunwa wanga, no naka u fana na muḓi wa Thiritsa, ni takadza unga Jerusalema, ni na vhugala vhu no nga ha vhahali vho hwala tshiphuga.

⁵ Ni songo nndavhelesa nga u ralo, maṱo aṋu a a nnḓaḓisa; mavhudzi aṋu a nga sambi ḽa mbudzi dzi tshi tsa thavha ya Giliadi.

⁶ Maṋo aṋu o tshena unga sambi ḽa phwidzi dzi tshi kha ḓi bva u ṱamba; dzoṱhe dzi dzwala mafhaṱa, a hu na i no tshedza.

⁷ Ṱhaha dzaṋu dzo tswuka unga thungulu hezwi no khurumela.

Muṱhannga:

⁸ Vhamusanda vha na vhafumakadzi vha mahumi maṱanu na ḽithihi, na vhasadzi vha mahumi maṱanu na mararu, na vhasidzana vha si na mbalo,

⁹ hone nṋe ndi funa muthihi fhedzi; o naka unga ḽiivha, ha na tsho ṱahelaho; ndi ene musidzana e eṱhe wa mme awe, ndi ene a funeswaho nga mme awe; vhasidzana vhoṱhe vha a mu sedza vha mu khoḓa, vhafumakadzi na vhasadzi vha a mu renda.

Vhasadzi vha tshi vhona muṱhannga:

¹⁰ Ndi nnyi uyu ane u tshi mu sedza a nga ḓuvha ḽi tshi bva, o naka sa ṅwedzi, u penya sa ḓuvha ḽi kombodzaho, u na vhugala vhu no nga ha vhahali vho hwala tshiphuga?

Musidzana:

¹¹ Ndo vha ndo tsela tsimuni ya miri ya thebvu u yo vhona miri i fhufhumisaho ngei govhani, na minḓirivhe i tshi kulukusha, na miri i titimaho i tshi ṱuma lurere.

¹² Ndo ri ndi sa athu ḓivha tshithu nda tshenuwa ndo hwalwa nga gariki ya musanda!

Vhasadzi:

¹³ Vhuyani, vhuyani, inwi musidzana wa Shulamu! Vhuyani, vhuyani, ri ni ṱalele! Ndi mini ni tshi ṱalela musidzana wa Mushulamu, a tshi nga u khou tshina vhukati ha vhaṱaleli?