LUIMBOIMBO 2 - BIVHILI KHETHWA Mafhungo Madifha

¹ Nṋe ndi dzuvha ḽa Sharoni, ndi phendephende ya magovhani a dzithavha.

Muṱhannga:

² Mufunwa wanga, ní vhukati ha vhasidzana, ni nga phendephende vhukati ha mipfa.

Musidzana:

³ Mufunwa wanga, ní vhukati ha vhaṱhannga, ni nga muapula u vhukati ha miri ya ḓaka. Ndi tama u dzula murunzini wawo; mitshelo yawo i a nnḓifhela.

Musidzana: “Ndi lwadzwa nga lufuno!”

⁴ No nnyisa nḓuni ya munyanya, na ntsireledza nga lufuno lwaṋu.

⁵ Mpheni mpale wa nḓirivhe, ndi ḽe ndi wane nungo; nnzivhuluseni nga maapula; ndi lwadzwa nga lufuno.

⁶ Ngavhe ndi tshi siamela tshanḓa tshaṋu tsha monde, tshauḽa tsho nkuvhatedza!

⁷ Inwi vhasadzi vha Jerusalema, mpfulufhedziseni! Anani nga tsephe na tholo dzi na ṱhoni, ni ri a ni nga rithi lufuno lwanga kana na lu vusa. Lu litsheni lu vuwe nga lwoṱhe!

“Vhuriha ho fhela!” Musidzana:

⁸ Ndi khou pfa ipfi ḽa mufunwa wanga; ngouḽaa, u khou ḓa a tshi dadamala nṱha ha dzithavha; u buḓekanya zwivhanga a tshi godimela kha nṋe.

⁹ Mufunwa wanga u nga tsephe, u nga tholwana. Ngouḽa o ima tsini ha luvhondo; u ṱodzimela nga fasiṱere; u tou hali nga kubuli.

¹⁰ Mufunwa wanga ngoyu, u khou amba na nṋe. Mufunwa wanga, takuwani! Kha ri ṱuwe roṱhe, tshinakaho wanga!

Muṱhannga:

¹¹ Vhuriha ho fhela: a hu tshee na mvula.

¹² Ngei shangoni maluvha a khou fhufhuma; tshino ndi tshone tshifhinga tsha u imba; ngei tsimuni hu pfala luimbo lwa maivha.

¹³ Mahuyu a vho thoma u aṋwa; muya u nukhelela u ḓifha nga minḓirivhe i fhufhumaho. Mufunwa wanga, takuwani! Iḓani-ha! Kha ri ṱuwe roṱhe, nyamunaka wanga!

¹⁴ Ni songo nnzumbama unga ḽiivha ḽi no dzumbama mapakoni a dzinngwa. Edzonu ri ndi vhone tshifhaṱuwo tshaṋu; tsho naka hani! Ndi pfe ipfi ḽaṋu: ḽi takadza hani!

¹⁵ Farani dziphunguhwe; dziphunguhwana dzi tshinya masimu ashu a minḓirivhe a fhufhumisaho.

Musidzana:

¹⁶ Mufunwa wanga ndi wanga fhedzi, na nṋe ndi wawe fhedzi. U fulisa sambi ḽawe vhukati ha phendephende

¹⁷ u swika nga madekwana hu tshi vho rotholela, mirunzi i tshi vhuya. Vhuyani unga tsephe, mufunwa wanga, u tshi gidima unga tholwana i pharani dza thavha!