LIVITIKO 9 - BIVHILI KHETHWA Mafhungo Madifha

Aroni a tshi ṋekedza zwiṱhavhelo

¹ Musi ho khunyeledzwa mushumo wa u vhumba vhotshifhe, hó fhela maḓuvha aḽa maṱanu na mavhili, nga matshelo Mushe a vhidza Aroni na vhana vhawe na vharangaphanḓa vha Israele.

² Mushe a vhudza Aroni a ri, “Kha vha dzhie mbohwana na thutha dzi si na luvhadzi vha dzi ṋekedze Muṋe washu, mboho i vhe nduvho ya tshipfumelo, thutha i vhe nduvho i fhiswaho.

³ Vho no ralo vha vhudze vhathu vha Israele vha bvise mbokoṱo ya nduvho ya tshipfumelo na ṋamana ya ṅwaha muthihi na ngwana ya ṅwaha muthihi dzi si na badzi dza nduvho i fhiswaho,

⁴ na mbohwana na thutha dza nduvho ya u konana na Mudzimu. Nga vha dzi ṋekedze Muṋe washu dzi na nduvho ya thoro yo vangiwaho mapfura. Vho fanela u ita nga u ralo, ngauri Muṋe washu u ḓo ḓisumbedza vhone ṋamusi.”

⁵ Zwoṱhe zwe Mushe a vha vhudza vha zwi ḓisa phanḓa ha dennde ya u ṱangana na Mudzimu, tshivhidzo tshoṱhe tsha kuvhangana henefho uri tshi luvhe Muṋe washu.

⁶ Mushe a ri, “Muṋe washu o ni laya uri ni ite zwoṱhe hezwi, uri ni vhone vhugala hawe.”

⁷ Ndi hone a tshi vhudza Aroni a ri, “Nga vha ye aḽiṱarini vha ṋekedze nduvho ya tshipfumelo na nduvho i fhiswaho uri vha hangwelwe vhutshinyi havho vhone vhaṋe na ha vhathu. Nga vha ṋekedza nduvho heyo uri vhathu vha hangwelwe vhutshinyi havho, nga he Muṋe washu a laya.”

Aroni a tshi ḓipfumelela

⁸ Aroni a ya aḽiṱarini a ṱhavha mbohwana ya tshipfumelo tsha u ḓipfumelela.

⁹ Vhana vhawe vha mu ḓisela malofha, a longa munwe wawe ngomu malofhani, a ḓodza ṋanga dzi re khuḓani dza aḽiṱari, o salaho a a shululela tsindeni ḽa aḽiṱari.

¹⁰ Kha aḽiṱari a fhisa mapfura na tswio na phudwane ya tshivhindi nga he Muṋe washu a laya Mushe.

¹¹ Hone ṋama na mukumba a zwi fhisela nnḓa ha mishasha.

¹² Aroni a ṱhavha tshifuwo tshe tsha vha tshi tsha nduvho ya u fhiswa ya ene muṋe. Vhana vhawe vha mu ḓisela malofha, ene a handulula masia oṱhe maṋa a aḽiṱari ngao.

¹³ Vha mu ṋekedza ṱhoho na miṅwe miraḓo ya itsho tshifuwo, a zwi fhisa kha aḽiṱari.

¹⁴ Ndi hone a tshi ṱanzwa miraḓo ya nga ngomu na khwanḓa dza murahu a zwi fhisa kha aḽiṱari nṱha ha nduvho yoṱhe i fhiswaho.

Aroni a tshi pfumelela vhathu

¹⁵ A ri o no ralo, a ṋekedza nduvho ya vhathu. A dzhia mbudzi ine ya vha nduvho ya tshipfumelo tsha vhathu a i ṱhavha, a i ṋekedza, sa zwe a ita a tshi ṋekedza nduvho ya tshipfumelo tsha u ḓipfumelela.

¹⁶ A ḓisa na tshifuwo tsha nduvho i fhiswaho, a i ṋekedza a tshi tevhedza ndayo.

¹⁷ A ṋekedza nduvho ya thoro, a ṱusa vhukhopfu nga tshanḓa a i fhisa kha aḽiṱari, ya engedza nduvho ya nga matsheloni i fhiswaho.

¹⁸ A ṱhavha mboho na thutha dza vha nduvho ya vhathu ya u konana na Mudzimu. Vhana vhawe vha mu ḓisela malofha, ene a handulula masia oṱhe maṋa a aḽiṱari ngao.

¹⁹ Aroni a dzhia miraḓo yo nonaho ya mboho na ya thutha, mapfura a mutshila na tswio na mapfura a dzi pilaho na phudwane ya tshivhindi,

²⁰ a zwi vhea nṱha ha zwiakha zwa izwo zwifuwo, a hwala zwoṱhe a isa kha aḽiṱari. A fhisa mapfura kha aḽiṱari,

²¹ a ṋekedza Muṋe washu zwiakha na tshizwa tsha tshauḽa, nga he Mushe a mu laya.

Mulilo u tshi bva ṱaḓulu

²² Musi Aroni o no fhedza u ṋekedza nduvho ya tshipfumelo na ya u fhiswa na ya u konana na Mudzimu, a imisa zwanḓa a shudufhadza vhathu, a konou tsela fhasi.

²³ Mushe na Aroni vha dzhena denndeni ya u ṱangana na Mudzimu, musi vha tshi bva, vha dovha vha shudufhadza vhathu. Ndi hone vhathu vhoṱhe vha tshi vhona vhugala ha Muṋe washu.

²⁴ Muṋe washu a mbo posa mulilo kha aḽiṱari, wa fhisa nduvho i fhiswaho na miraḓo yo nonaho henefho kha aḽiṱari. Musi vhathu vha tshi zwi vhona, vha fhululedza, vha kotama vha wa nga zwifhaṱuwo.