LIVITIKO 8 - BIVHILI KHETHWA Mafhungo Madifha

Aroni na vhana vhawe vha tshi vhumbwa vhotshifhe

¹ Muṋe washu a vhudza Mushe a ri,

² “Dzhia Aroni na vhana vhawe u vha ise muṋangoni wa dennde ya u ṱangana na Nṋe, u ḓise zwiambaro zwa vhotshifhe na mapfura a u vha ḓodza na mbohwana ya nduvho ya tshipfumelo na thutha mbili na mufaro wa vhurotho vhu si na mbilisa.

³ Wo no ralo u vhidze tshivhidzo tshoṱhe vha ḓe henefho.”

⁴ Mushe a ita nga he Muṋe washu a mu laya, musi tshivhidzo tsho no kuvhangana henefho muṋangoni wa dennde ya u ṱangana na Mudzimu,

⁵ a vha vhudza a ri, “Zwine nda ṱoḓa u zwi ita zwino ndi zwe nda laiwa nga Muṋe washu.”

⁶ Mushe a ḓisa Aroni na vhana vhawe phanḓa a ri vha ṱambe.

⁷ Mushe a ambadza Aroni hemmbe na phuraphura na bannda khunduni. A mu ambadza bannda ya u pakata, a i vhofha nga u mu ambadza bannda yo lukwaho zwavhuḓi khunduni.

⁸ A mu ambadza tshipilakhana a longa madeṅwa makhethwa ngomu hatsho.

⁹ A mu ambadza muthini ṱhohoni, phanḓa hawo a u ṱama nga musuku, tshone tshiga tshikhethwa tsha u ḓikumedza Mudzimu, nga he Muṋe washu a mu laya.

¹⁰ Ndi hone Mushe a tshi dzhia mapfura a u ḓodza a a shululela nṱha ha dennde ya u ṱangana na Mudzimu, kha zwoṱhe zwe zwa vha zwi ngomu hayo, nga u ralo zwoṱhe a vha o zwi kumedza Muṋe washu.

¹¹ A dzhia maṅwe mapfura a handulula aḽiṱari ngao kaṱanu na kavhili na thundu dzayo na sambelo na tshiraho tshaḽo uri na zwone a zwi kumedze Muṋe washu.

¹² A vhumba Aroni tshifhe nga u shululela maṅwe mapfura ṱhohoni yawe.

¹³ Mushe a ri u fhedza a ḓisa vhana vha Aroni phanḓa, a vha ambadza hemmbe na mabannda khunduni, a vha vhofha mithini ṱhohoni, nga he Muṋe washu a mu laya.

¹⁴ Ndi hone Mushe a tshi ḓisa mbohwana ya nduvho ya tshipfumelo, Aroni na vhana vhawe vha vhea zwanḓa zwavho kha ṱhoho yayo.

¹⁵ Mushe a i ṱhavha a dzhia maṅwe malofha ayo, a a ṋanga nga munwe wawe a ḓodza ṋanga dzi re khuḓani dza aḽiṱari, uri a i kumulule vhutshinyi. Malofha o salaho a a shululela tsindeni ḽa aḽiṱari. Ngauralo a vha o i kumedza Muṋe washu a i pfumelela.

¹⁶ Mushe a bvisa mapfura oṱhe a re kha miraḓo ya nga ngomu, a dzhia na phudwane ya tshivhindi na tswio na mapfura adzo, zwoṱhe a zwi fhisa kha aḽiṱari.

¹⁷ Huno mbohwana khathihi na mukumba wayo na ṋama yayo na vhula hayo, a zwi fhisela nnḓa ha mishasha, nga he Muṋe washu a mu laya.

¹⁸ Ndi hone Mushe a tshi ḓisa thutha ya tshiṱhavhelo tshi fhiswaho, Aroni na vhana vhawe vha vhea zwanḓa zwavho kha ṱhoho yayo.

¹⁹ Mushe a i ṱhavha, a handulula khuḓa nṋa dza aḽiṱari nga malofha ayo.

²⁰ A tumukanya iyo thutha nga miraḓo, a fhisa ṱhoho yayo na zwipiḓa na mapfura a nga ngomu.

²¹ Miraḓo ya nga ngomu na khwanḓa a zwi ṱanzwa nga maḓi, a fhisa thutha yoṱhe kha aḽiṱari, nga he Muṋe washu a mu laya. Tshiṱhavhelo hetsho tshi fhiswaho tsho vha tshi nduvho ya zwiḽiwa i nukhelelaho ine ya takadza Muṋe washu.

²² Mushe zwino a ḓisa thutha ya vhuvhili, yone yo vha i ya u vhumba vhotshifhe, Aroni na vhana vhawe vha vhea zwanḓa zwavho kha ṱhoho yayo.

²³ Mushe a i ṱhavha a dzhia maṅwe malofha ayo a a ḓodza kha ṱhodzi ya nḓevhe ya Aroni ya tshauḽa na kha gunwe ḽa tshanḓa tshawe tshauḽa na kha gunwe ḽa mulenzhe wa tshauḽa.

²⁴ Zwenezwo a dzhia vhana vha Aroni a vha isa phanḓa, a dzhia maṅwe malofha a a ḓodza kha ṱhodzi dza nḓevhe dzavho dza tshauḽa na kha magunwe a tshanḓa tshauḽa na kha magunwe a milenzhe ya tshauḽa. Mushe a dzhia malofha o salaho a handulula khuḓa nṋa dza aḽiṱari ngao.

²⁵ A dzhia mapfura na mapfura a mutshila na mapfura oṱhe o pilaho miraḓo ya nga ngomu na phudwane ya tshivhindi na tswio na mapfura adzo na tshizwa tsha tshauḽa.

²⁶ Ndi hone a tshi dzhia mukonde muthihi wa vhurotho u tshi bva kha mufaro, wa vhurotho vhu si na mbilisa ho kumedzwaho Muṋe washu, na mukonde muthihi wo sukwaho na mapfura, na kokisi ḽithihi, a zwi vhea nṱha ha mapfura na tshizwa tsha tshauḽa.

²⁷ Zwiḽiwa hezwo zwoṱhe a zwi vhea zwanḓani zwa Aroni na vhana vhawe, vhone vha zwi ṋekedza Muṋe washu vha tshi zwi imisela nṱha ya vha nduvho i imiselwaho nṱha.

²⁸ Zwenezwo Mushe a dzhia zwiḽiwa khavho, a zwi fhisa kha aḽiṱari nṱha ha nduvho i fhiswaho, ya vha nduvho ya u vha vhumba vhotshifhe. Heyo yo vha i nduvho ya zwiḽiwa, nduvho i nukhelelaho i takadzaho Muṋe washu.

²⁹ Ndi hone Mushe a tshi dzhia tshiakha a tshi ṋekedza Muṋe washu a tshi tshi imisela nṱha ya vha nduvho i imiselwaho nṱha. Wo vha u mukovhe wa Mushe wa thutha ya u vhumba vhotshifhe. Mushe o ita zwoṱhe nga he Muṋe washu a mu laya.

³⁰ Mushe a dzhia mapfura a u ḓodza na maṅwe malofha e a vha e nṱha ha aḽiṱari a handulula Aroni na vhana vhawe ngao a handulula na zwiambaro zwavho. Ngauralo a vha o vha kumedza Muṋe washu a mu kumedza na zwiambaro zwavho.

³¹ Mushe a vhudza Aroni na vhana vhawe a ri, “Dzhiani ṋama ni ise muṋangoni wa dennde ya u ṱangana na Mudzimu, ni i bike, ni i ḽele henefho na vhurotho vhu re mufaroni wa nduvho dza u vhumba vhotshifhe, nga he Muṋe washu a laya.

³² Ṋama yo salaho kana vhurotho ho salaho ni zwi fhise.

³³ Ni songo ṱuwa muṋangoni wa dennde ya u ṱangana na Mudzimu hu vhuye hu fhele maḓuvha maṱanu na mavhili, maitele a u vhumbwa haṋu vhotshifhe a vhuya a khunyeledzwa.

³⁴ Zwe Muṋe washu a ri laya uri ri zwi ite ṋamusi, ndi zwa u ni pfumelela.

³⁵ Ni dzule muṋangoni wa dennde ya u ṱangana na Mudzimu vhusiku na masiari hu vhuye hu fhele maḓuvha maṱanu na mavhili, ni tshi khou ita zwe Muṋe washu a laya. Arali na sa ralo, ni ḓo fa. Hezwo ndi zwe Muṋe washu a nndaya.”

³⁶ Zwenezwo Aroni na vhana vhawe vha ita zwoṱhe zwe Muṋe washu a laya a tshi vhudza Mushe.