LIVITIKO 7 - BIVHILI KHETHWA Mafhungo Madifha

Nduvho ya ndifho

¹ Ngedzino ndayo dza nduvho dza ndifho, ndi khethwa-khethwa:

² Tshifuwo tsha nduvho heyo tshi ṱhavhiwe sia ḽa devhula ḽa aḽiṱari, henefho hune ha ṱhavhiwa zwifuwo zwa tshiṱhavhelo tshi fhiswaho, malofha atsho a handululwe masia oṱhe maṋa a aḽiṱari.

³ Mapfura atsho oṱhe a bvisiwe, a ṋekedzwe kha aḽiṱari: mapfura a mutshila na mapfura o tibedzaho miraḓo ya nga ngomu

⁴ na tswio na mapfura adzo na phudwane ya tshivhindi.

⁵ Tshifhe nga a fhise mapfura oṱhe kha aḽiṱari i vhe nduvho ya zwiḽiwa ine ya ṋekedzwa Muṋe washu. Ndi nduvho ya ndifho.

⁶ Munna ufhio na ufhio wa muṱa wa vhotshifhe a nga ḓi i ḽa, hone i ḽelwe fhethu hukhethwa, ngauri ndi khethwa-khethwa.

⁷ Hu na ndayo nthihi ine ya langa zwoṱhe, nduvho ya tshipfumelo na nduvho ya ndifho: ṋama ndi ya tshifhe ane a ṋekedza nduvho.

⁸ Mukumba wa tshifuwo tshine tsha ṋekedzwa tsha vha nduvho ndi wa tshifhe ane a ṋekedza iyo nduvho.

⁹ Nduvho ya thoro iṅwe na iṅwe ye ya bagwa ṋanḓoni kana ya bagwa nga pani kana nga ludongo ndi ya tshifhe we a i ṋekedza Mudzimu.

¹⁰ Huno nduvho dza thoro dzoṱhe dzi songo bagwaho, dzi nga vha dzo vangwa mapfura kana dzo oma, ndi dza vhotshifhe vhana vha Aroni, vho fanela u kovhekana.

Nduvho dza u konana na Muṋe washu

¹¹ Ndayo dza nduvho dza vhukonani dzine dza ṋekedzwa Muṋe washu ngedzi:

¹² Arali munna a tshi ṋekedza nduvho heino i tshi vha nduvho ya u livhuha Mudzimu, hezwi a tshi ṋekedza tshifuwo tsha tshiṱhavhelo a ṋekedze na nduvho ya vhurotho vhu si na mbilisa: i nga ḓi vha mikonde midenya ya vhurotho ho itwaho nga vhukhopfu ho vangwaho mapfura a muolivi kana makokisi o ḓodzwaho mapfura a muolivi kana khekhe dzo itwaho nga vhukhopfu ho vangiwaho mapfura a muolivi.

¹³ A dovhe a ṋekedze na mikonde ya vhurotho ho bagwaho vhu si na mbilisa.

¹⁴ Kha nduvho iṅwe na iṅwe a ṋekedze Muṋe washu gaku; izwo ndi zwa tshifhe ane a dzhia malofha a tshifuwo a handulula aḽiṱari ngao.

¹⁵ Ṋama ya itsho tshifuwo i ḽiwe ḽeneḽo ḓuvha ḽine ya ṋekedzwa ngaḽo; hu songo vha na ine ya sala ḽa vhuya ḽa tsha.

¹⁶ Arali muthu a ḓisa nduvho ya u konana na Mudzimu a tshi khunyeledza muano kana i nduvho yawe ine a bvisa nga u tou funa, i ḽiwa yoṱhe musi une ya ṋekedzwa, huno ine ya sala i nga ḓi ḽiwa nga matshelo.

¹⁷ Ṋama ine ya sala ya swika ḓuvha ḽa vhuraru i fhisiwe.

¹⁸ Arali iṅwe yayo ya ḽiwa nga ḓuvha ḽa vhuraru, Mudzimu a nga si ṱanganedze nduvho ya uyo munna. Uyo munna ha nga ḓo vhuelwa nga iyo nduvho, i ḓo pfi yo kumala, ane a vhuya a i ḽa u ḓo vha o ovha mulandu.

¹⁹ Arali iyo ṋama ya kwama tshithu tsho kumalaho, i songo tsha ḽiwa, nga i fhisiwe. Muthu o kumululwaho a nga ḓi ḽa iyo ṋama,

²⁰ hone arali muthu o kumalaho a i ḽa a songo tsha pfi ndi muṅwe wa vhathu vha Mudzimu.

²¹ Naho muthu a ḽa ṋama ya iyo nduvho o ranga u kwama tshithu tsho kumalaho, tshi nga vha tshi tshi bva kha munna kana kha tshifuwo, a songo tsha vhalwa na vhathu vha Mudzimu.

Malofha ha ḽiwi

²² Muṋe washu o ṋea Mushe ndayo hedzino,

²³ a tshi itela Vhaisraele: O ri mapfura a kholomo kana nngu kana mbudzi a songo ḽiwa.

²⁴ Mapfura a tshidu kana tshifuwo tsho tou vhulawaho nga tshivhanda a songo ḽiwa, hone a nga shumiswa u ita zwiṅwe zwithu.

²⁵ Muthu ane a ḽa mapfura a tshifuwo tshe tsha ṋekedzwa Muṋe washu tsha vha nduvho ya zwiḽiwa a songo tsha vhaliwa na vhathu vha Mudzimu.

²⁶ Hoṱhe hune Vhaisraele vha vha hone vha songo ḽa malofha a tshiṋoni kana tshifuwo.

²⁷ Muthu ane a pfuka uyo mulayo a songo tsha vhalwa na vhathu vha Mudzimu.

Zwipiḓa zwa nduvho ya u konana na Mudzimu zwine zwa ḽiwa nga vhotshifhe

²⁸ Muṋe washu o ṋea Mushe ndayo hedzino,

²⁹ a tshi itela Vhaisraele: Muthu ane a ṋekedza nduvho ya u konana na Mudzimu o fanela u ḓisa tshipiḓa tshayo i vhe nduvho ya Muṋe washu.

³⁰ Nga a tou ḓisa nga zwanḓa zwawe i vhe nduvho ya zwiḽiwa. Nga a ḓise mapfura a itsho tshifuwo na tshiakha tshayo, a zwi ṋekedze Muṋe washu nga u tou zwi imisela nṱha, ndi nduvho ya u imiselwa nṱha.

³¹ Tshifhe nga a fhise ayo mapfura kha aḽiṱari, hone tshiakha ndi tsha vhotshifhe.

³² Tshizwa tshauḽa tsha itsho tshifuwo tshi bviswe tshi vhe mukovhe

³³ une wa ṋewa tshifhe ane a khou ṋekedza ayo malofha na mapfura a nduvho ya u konana na Mudzimu.

³⁴ Tshiakha tsha itsho tshifuwo ndi tshifhiwa, tshizwa tshauḽa ndi tshi bviswaho tshine Muṋe washu a dzhiela Vhaisraele tsha ṋewa vhotshifhe. Hezwo ndi zwine Vhaisraele vha fanela u ṋea vhotshifhe misi yoṱhe.

³⁵ Hoyo ndi wone mukovhe wa zwiḽiwa zwi ṋekedzwaho Muṋe washu we wa ṋewa Aroni na vhana vhawe musi we vha vhumbwa vhutshifhe.

³⁶ Musi wonoyo Muṋe washu o laya Vhaisraele uri vha vha fhe mukovhe wonoyo wa nduvho ya zwiḽiwa. Ndi ndayo ine Vhaisraele vha fanela u i thetshelesa zwi tshi ya nga mirafho na mirafho.

³⁷ Hedzo zwino ndi dzone ndayo dza nduvho i fhiswaho na nduvho ya thoro na nduvho ya tshipfumelo na nduvho ya mulifho na nduvho ya musi hu tshi vhumbiwa vhotshifhe na nduvho ya u konana na Mudzimu.

³⁸ Ndi dzone ndayo dze Muṋe washu a ṋea Mushe nṱha ha thavha phangani ya Sinai, musi we a vhudza Vhaisraele uri vha ṋekedze nduvho dzavho.