LIVITIKO 6 - BIVHILI KHETHWA Mafhungo Madifha

¹ Muṋe washu o ṋea Mushe ndayo hedzino:

² Muthu o fanela u ṋekedza nduvho arali a khakhela Muṋe washu nga u hana u humisa tshe Muisraele wa hawe a sia tsha vha mbetshedzelo kana nga u mu tswela tshiṅwe tshithu kana nga u mu fhura

³ kana nga u zwifha a tshi amba nga tshithu tsho xelaho, a ana a ri ho ngo tshi wana.

⁴ Arali munna a tshinya nga u ralo a ovha mulandu, o fanela u humisa tshe a tswa kana tshe a tshi wana nga vhufhura kana tshe a vha a tshi pfi a tshi fare kana thundu yo xelaho ye a i wana,

⁵ kana tshifhio na tshifhio tshe a tshi anela mazwifhi. O fanela u lifha zwoṱhe a dovhe a inge tshipiḓa tshithihi kha zwiṱanu tsha mutengo watsho, zwoṱhe a zwi ṋea muṋe wazwo musi wonoyo une a ṋekedza tshipfumelo tshawe.

⁶ Uyo munna nga a dzhie thutha kana mbokoṱo i si na badzi a i ise ha tshifhe i ṋekedzwe Muṋe washu i vhe nduvho yawe ya ndifho. Mutengo wayo u vhe wa muelo wo tendelwaho.

⁷ Tshifhe u ḓo ṋekedza Muṋe washu iyo nduvho ya vha tshipfumelo tsha uyo munna, a hangwelwa.

Nduvho ine ya fhiswa yoṱhe

⁸ Muṋe washu o laya Mushe

⁹ uri a ṋee Aroni na vhana vhawe ndayo hedzino dza nduvho i fhiswaho: Nduvho i fhiswaho nga i lale kha aḽiṱari i tshi khou swa vhusiku hoṱhe, mulilo u dzule u tshi khou duga.

¹⁰ Ndi hone tshifhe a tshi ḓo ambara phuraphura yawe ya lukhaha na vhurukhu hawe vhupfufhi, a bvisa milora ya mapfura yo khakhaṱhelaho kha aḽiṱari, a i vhea matungo a aḽiṱari.

¹¹ O no ralo a bvula izwo zwiambaro zwawe a ambara zwiṅwe, a dzhia iyo milora a i bvisa mishashani a i isa fhethu ho kumululwaho.

¹² Mulilo u re kha aḽiṱari wo fanela u dzula u tshi khou duga u si vhuye wa dzima. Musi muṅwe na muṅwe ḽi tshi tsha tshifhe a longe khuni muliloni a fhise mapfura a nduvho ya u konana na Mudzimu.

¹³ Mulilo wo fanela u dzula u tshi khou duga kha aḽiṱari, u songo vhuya wa dzima.

Nduvho ya thoro

¹⁴ Ndayo dza nduvho ya thoro ngeino: Muṅwe wa vhotshifhe vhana vha Aroni o fanela u ṋekedza Muṋe washu nduvho ya thoro e phanḓa ha aḽiṱari.

¹⁵ Tshifhe a ṱuse vhukhopfu na mapfura nga tshanḓa, khathihi na zwioro zwoṱhe zwa u ṋuṋedza nduvho ya thoro, a zwi fhise kha aḽiṱari tshi vhe tshiga tsha uri zwoṱhe zwo ṋekedzwa Muṋe washu. Iyo nduvho i nukhelelaho i takadza Muṋe washu.

¹⁶ Aroni na vhana vhawe vha ḽe yo salaho fhethu hukhethwa, hone i ḽiwe i si na mbilisa. Vha i ḽele muṱani wa dennde ya u ṱangana na Mudzimu.

¹⁷ I songo bagwa i na mbilisa; ndo vha ṋea uri i vhe mukovhe wavho wa nduvho ya Yahavee ya zwiḽiwa. Iyo nduvho ndi khethwa-khethwa, u ḓi nga nduvho ya tshipfumelo na nduvho ya ndifho.

¹⁸ Misi yoṱhe i ḓaho vhaḓuhulu vhoṱhe vha Aroni vha vhatuka vha nga ḓi i ḽa ya ḓi vha mukovhe wavho wa zwiḽiwa zwine zwa ṋekedzwa Yahavee. Ane a vhuya a kwama nduvho ya zwiḽiwa na ene u ḓo vha tshiila.

¹⁹ Muṋe washu o ṋea Mushe ndayo hedzino

²⁰ dza u vhumba vhotshifhe vhana vha Aroni: Ḓuvha ḽine tshifhe a vhumbwa, a ṋekedze Muṋe washu nduvho, khilogiramu nthihi ya vhukhopfu, ine ya eḓana na nduvho ya thoro ya nga misi, hafu nga matsheloni, iṅwe nga madekwana.

²¹ I vangiwe mapfura, i bagwe nga ludongo, i ṋekedzwe tshipiḓa nga tshipiḓa, i vhe nduvho ya thoro, nduvho i nukhelelaho i takadzaho Muṋe washu.

²² Misi yoṱhe i ḓaho nduvho hei i ṋekedzwe nga muḓuhulu muṅwe na muṅwe wa Aroni ane a shuma e tshifhe. Nga i fhiswe yoṱhe i vhe nduvho i ṋekedzwaho Muṋe washu.

²³ Hu songo vhuya ha ḽiwa na kupiḓa kwa nduvho ya thoro ine ya itwa nga tshifhe, i tou fhiswa yoṱhe.

Nduvho ya tshipfumelo

²⁴ Muṋe washu o laya Mushe

²⁵ uri a ṋee Aroni na vhana vhawe milayo heino ya nduvho ya tshipfumelo: Tshifuwo tsha nduvho ya tshipfumelo tshi ṱhavhelwe Muṋe washu sia ḽa devhula ḽa aḽiṱari, hune ha ṱhavhiwa zwifuwo zwa tshiṱhavhelo tshi fhiswaho. Heyo ndi nduvho khethwa-khethwa.

²⁶ Tshifhe ane a ṋekedza tshiṱhavhelo tsha tshifuwo nga a tshi ḽele fhethu hukhethwa, muṱani wa dennde ya u ṱangana na Mudzimu.

²⁷ Ane a vhuya a kwama ṋama ya itsho tshifuwo u ḓo vha tshiila. Arali tshipiḓa tsha tshiambaro tsha hashiwa nga malofha a itsho tshifuwo, nga tshi ṱanzwiwe fhethu hukhethwa.

²⁸ Khali iṅwe na iṅwe ya vumba ine iyo ṋama ya bikwa ngayo i pwashiwe, huno arali i khali ya tsimbi, i fhaliwe i ṱukiswe nga maḓi.

²⁹ Muthu wa tshinna muṅwe na muṅwe wa muṱa wa vhotshifhe a nga ḓi ḽa iyo nduvho; ndi khethwa-khethwa.

³⁰ Huno arali maṅwe malofha o ḓiswa denndeni ya u ṱangana na Mudzimu, a shumiswa hu tshi tevhedzwa maitele a u pfumelela vhathu, ṋama ya itsho tshifuwo i songo ḽiwa, nga i fhiswe.