LIVITIKO 4 - BIVHILI KHETHWA Mafhungo Madifha

Nduvho ya tshipfumelo

¹ Muṋe washu o laya Mushe a ri

² a vhudze Vhaisraele uri nnyi na nnyi we a tshinya a pfuka muṅwe wa milayo ya Muṋe washu a sa iti nga khole, a tevhedze milayo heino:

³ Arali e tshifhe muhulu ane a tshinya, nga u ralo a ovhisa vhathu mulandu, nga a ṋekedze mbohwana i si na badzi a i ṱhavhele Muṋe washu tshi vhe tshipfumelo tsha vhutshinyi hawe.

⁴ Nga a ḓise iyo mbohwana muṋangoni wa dennde ya u ṱangana na Mudzimu, a vhee tshanḓa tshawe kha ṱhoho yayo, a i ṱhavhe henefho phanḓa ha Muṋe washu.

⁵ Zwenezwo uyo tshifhe muhulu a dzhie maṅwe malofha a iyo mbohwana a dzhene nao denndeni ya u ṱangana na Mudzimu.

⁶ Nga a ṋange ayo malofha nga munwe wawe a a shashe phanḓa ha pesa ḽa lupila lukhethwa kaṱanu na kavhili.

⁷ Ndi hone a tshi ḓo dzhia maṅwe malofha a handulula ṋanga dzi re khuḓani dza aḽiṱari ya u fhisela Muṋe washu zwioro, ngomu ha dennde ya u ṱangana na Mudzimu. Malofha o salaho u ḓo a shululela tsindeni ḽa aḽiṱari ine ha fhiselwa zwiṱhavhelo khayo, iyo i re muṋangoni wa dennde ya u ṱangana na Mudzimu.

⁸ Kha mboho heyo a bvise mapfura oṱhe na mapfura a pilaho miraḓo ya nga ngomu,

⁹ na tswio na mapfura a re khadzo na phudwane ya tshivhindi.

¹⁰ Uyo tshifhe a dzhie mapfura ayo a a fhise kha aḽiṱari ya zwiṱhavhelo zwi fhiswaho, sa zwine a ita nga mapfura a tshifuwo tshine tsha ṱhavhiwa tsha vha nduvho ya u konana na Mudzimu.

¹¹ Hone a dzhie mukumba wayo na ṋama yayo yoṱhe na ṱhoho yayo na khwanḓa dzayo na miraḓo yayo ya nga ngomu khathihi na vhula,

¹² zwoṱhe a zwi hwalele nnḓa ha mishasha a zwi ise fhethu ho kumululwaho hune ha thuphiwa milora, iyo mboho i fhiswe henefho.

¹³ Arali ho tshinya vhathu vhoṱhe vha Israele, vha ovha mulandu nga u pfuka muṅwe wa milayo ya Muṋe washu vhá songo ita nga khole,

¹⁴ zwenezwo musi uho vhutshinyi vhu tshi vho ḓivhea, vhathu vhoṱhe vha ṋekedze mbohwana i vhe tshipfumelo tsha vhutshinyi. Nga vha i ḓise denndeni ya u ṱangana na Mudzimu.

¹⁵ Vharangaphanḓa vha vhathu vha vhee zwanḓa zwavho kha ṱhoho yayo phanḓa ha Muṋe washu, i ṱhavhiwe henefho.

¹⁶ Tshifhe muhulu a dzhie maṅwe malofha a iyo mboho a dzhene nao denndeni ya u ṱangana na Mudzimu,

¹⁷ a a ṋange nga munwe, a a shashe kaṱanu na kavhili phanḓa ha Muṋe washu, phanḓa ha pesa ḽa lupila.

¹⁸ Maṅwe malofha a handulule ngao ṋanga dzi re khuḓani dza aḽiṱari ya u fhisela Muṋe washu zwioro ngomu ha dennde ya u ṱangana na Mudzimu, o salaho a a shululele tsindeni ḽa aḽiṱari ine ha fhiselwa zwiṱhavhelo, ine ya vha muṋangoni wa dennde ya u ṱangana na Mudzimu,

¹⁹ a konou dzhia mapfura ayo oṱhe a a fhise kha iyo aḽiṱari.

²⁰ A ite nga iyo mboho zwine a ita nga mboho ine ya ṋekedzwa ya vha tshipfumelo, ngauralo u ḓo vha o ṋekedza tshipfumelo, vhathu vha konou hangwelwa vhutshinyi havho.

²¹ O no ralo a bvisele iyo mboho nnḓa ha mishasha, a i fhise, u ḓi nga a tshi fhisa mboho ine ya ṋekedzelwa vhutshinyi hawe. Hetsho ndi tshipfumelo tsha vhathu.

²² Arali ho tshinya muvhusi, a ovha mulandu nga u pfuka muṅwe wa milayo ya Muṋe washu Mudzimu wawe á songo ita nga khole,

²³ huno hezwi a tshi vho zwi ḓivha uri o tshinya, a ḓise nduvho ya mbokoṱo i si na luvhadzi.

²⁴ Nga a vhee tshanḓa tshawe kha ṱhoho yayo, a i ṱhavhe sia ḽa devhula ḽa aḽiṱari, hune ha ṱhavhiwa zwifuwo zwa nduvho i fhiswaho phanḓa ha Muṋe washu. Ndi tshipfumelo.

²⁵ Uyo tshifhe a ṋange malofha a itsho tshifuwo nga munwe wawe, a handulule ngao ṋanga dzi re khuḓani dza aḽiṱari, o salaho a a shululele tsindeni ḽa aḽiṱari ya zwiṱhavhelo zwi fhiswaho,

²⁶ a konou fhisa mapfura ayo oṱhe kha aḽiṱari, u ḓi nga a tshi fhisa mapfura a zwifuwo zwine zwa ṱhavhelwa u vha nduvho ya u konana na Mudzimu. Ngauralo tshifhe u ḓo vha o ṋekedza tshipfumelo tsha muvhusi, a konou hangwelwa.

²⁷ Arali ho tshinya muthu zwawe, a ovha mulandu wa u pfuka muṅwe wa milayo ya Muṋe washu á songo ita nga khole,

²⁸ hezwi a tshi vho zwi ḓivha uri o tshinya, nga a mbo ḓi ḓisa nduvho ya mbudzi ya tsadzi i si na badzi.

²⁹ Nga a vhee tshanḓa tshawe kha ṱhoho yayo, a i ṱhavhe sia ḽa devhula ḽa aḽiṱari, hune ha ṱhavhiwa zwifuwo zwa tshiṱhavhelo tshi fhiswaho.

³⁰ Tshifhe nga a ṋange malofha a itsho tshifuwo nga munwe wawe, a ḓodze ngao ṋanga dzi re khuḓani dza aḽiṱari, o salaho a a shululele tsindeni ḽa aḽiṱari.

³¹ O no ralo a bvise mapfura ayo oṱhe, u ḓi nga a tshi bvisa mapfura a tshifuwo tshine tsha ṱhavhelwa u vha nduvho ya u konana na Mudzimu, a a fhise kha aḽiṱari uri a nukhelele a takadze Muṋe washu. Ngauralo tshifhe u ḓo vha o ṋekedza tshipfumelo tsha uyo munna, a hangwelwa.

³² Arali muthu a ḓisa nngu uri i vhe nduvho ya tshipfumelo, nga i vhe phwidzi i si na badzi.

³³ Nga a vhee tshanḓa tshawe kha ṱhoho yayo, a i ṱhavhe sia ḽa devhula ḽa aḽiṱari, hune ha ṱhavhiwa zwifuwo zwa nduvho i fhiswaho.

³⁴ Tshifhe nga a ṋange malofha a itsho tshifuwo nga munwe wawe, a ḓodze ṋanga dzi re khuḓani dza aḽiṱari, o salaho a a shulele tsindeni ḽa aḽiṱari.

³⁵ O no ralo a kone u bvisa mapfura ayo oṱhe, u ḓi nga a tshi bvisa mapfura kha nngu ye ya ṱhavhelwa u vha nduvho ya u konana na Mudzimu, a a fhise kha aḽiṱari khathihi na nduvho ya zwiḽiwa zwi ṋekedzwe Muṋe washu. Ngauralo tshifhe u ḓo vha o ṋekedza tshipfumelo tsha uyo munna, a hangwelwa.