LIVITIKO 22 - BIVHILI KHETHWA Mafhungo Madifha

Vhukhethwa ha nduvho

¹ Muṋe washu o laya Mushe

² uri a vhudze Aroni na vhana vhawe a ri, “Ni songo nyadzisa dzina ḽanga ḽikhethwa, ṱhonifhani nduvho khethwa dzine Vhaisraele vha dzi kumedza Nṋe. Ndi Nṋe Yahavee.

³ Arali muṅwe wa vhaḓuhulu vhaṋu a ri o kumala a sendela tsini na nduvho dze Vhaisraele vha dzi kumedza Nṋe, a songo tsha dovha a ntshumela thembeleni. Hezwo ndi zwa misi yoṱhe. Ndi Nṋe Yahavee.

⁴ “Muḓuhulu wa Aroni ane a vha na vhulwadze ha lukanda kana a rothisa vhulwa a songo ḽa nduvho khethwa u swika a tshi kumuluwa. Tshifhe ane a kwama tshithu tsho kumalaho nga u kwamana na tshitumbu, na ene o kumala, kana o shulula vhunna,

⁵ kana o kwama phukha yo kumalaho kana muthu o kumalaho.

⁶ Tshifhe o kumalaho u ḓo vha o kumala ḽa vhuya ḽa kovhela, nahone a songo ḽa nduvho khethwa a vhuya a ṱamba muvhili.

⁷ Ḽa kovhela o kumuluwa, zwenezwo a nga ḓi ḽa nduvho khethwa, ndi zwiḽiwa zwawe.

⁸ A songo ḽa tshidu kana yo pondiwaho nga zwivhanda, i ḓo mu kumadza. Ndi Nṋe Yahavee.

⁹ “Vhotshifhe vhoṱhe nga vha vhulunge ndayo dze nda vha ṋea. Zwa sa ralo vha ḓo vha na mulandu vha fa nge vha nyadza ndayo khethwa. Ndi Nṋe Yahavee, ndi vha ita vhakhethwa.

¹⁰ “Nduvho khethwa i ḽiwa nga vha muṱa wa tshifhe fhedzi, hu songo vha na muṅwe-vho ane a dzi ḽa – mutsinda ane a dzula na tshifhe kana we a rendelwa nga tshifhe a songo dzi ḽa.

¹¹ Huno phuli ya tshifhe we a rengwa nga tshelede ya tshifhe kana o bebwa muṱani wawe, a nga ḓi ḽa zwiḽiwa zwi re mukovhe wa tshifhe.

¹² Ṅwananyana wa tshifhe o dzewaho nga muthu ane a si vhe tshifhe a songo ḽa nduvho khethwa.

¹³ Hone ṅwana wawe wa tshilikadzi kana ṅwananyana o ṱaliwaho a si na vhana a dzulaho muṱani wa khotsi awe, ene a nga ḓi ḽa zwiḽiwa zwi re mukovhe wa tshifhe khotsi awe unga zwiḽa e musidzana, tenda zwi sa ḽiwi nga muthu a si wa muṱa wa tshifhe.

¹⁴ “Arali muthu ane a si vhe wa muṱa wa vhotshifhe a ḽa nduvho khethwa á songo humbula, o fanela u lifhela tshifhe mutengo wayo woṱhe a engedze nga tshipiḓa tshithihi kha zwiṱanu tsha uyo mutengo.

¹⁵ Nduvho khethwa dze Vhaisraele vha ṋekedza Yahavee, vhotshifhe vha songo dzi kumadza

¹⁶ nga u litsha muthu a songo tendelwaho a tshi dzi ḽa; hezwo zwi nga ḓisela uyo muthu mulandu na ṱhamu. Ndi Nṋe Yahavee, vhotshifhe ndi vha ita vhakhethwa.”

¹⁷ Muṋe washu o laya Mushe

¹⁸ uri a ṋee Aroni na vhana vhawe na Vhaisraele vhoṱhe ndayo hedzino: Arali Muisraele kana mutsinda ane a dzula kha ḽa Israele a tshi ṋekedza nduvho i fhiswaho, i nga vha i ya u khunyeledza muano kana i nduvho ine muthu a tou bvisa nga u funa hawe,

¹⁹ tshifuwo itsho tshi songo vha na luvhadzi, nga tshi vhe tshine Muṋe washu a nga tshi ṱanganedza. Ni nga ṋekedza mbohwana kana thutha.

²⁰ Arali na ṋekedza tshifuwo tshi re na luvhadzi, Muṋe washu a nga si tshi ṱanganedze.

²¹ Arali muthu a tshi ṋekedza Muṋe washu nduvho ya u konana nae, i nga vha i ya u khunyeledza muano kana nduvho ine muthu a bvisa nga u tou funa, itsho tshifuwo tshi songo vha na luvhadzi arali a tshi ṱoḓa uri tshi ṱanganedziwe.

²² Ni songo ṋekedza Muṋe washu tshifuwo tsha bofu kana tshi ṱudzaho kana tsho huvhadzwaho kana tshi re na tshilonda tshi no bvuḓa malofha kana tshi re na gwembe kana tshi re na magovho a malofha. Zwifuwo zwo raloho ni songo zwi ṋekedza aḽiṱarini zwa vha nduvho ya zwiḽiwa.

²³ Ni nga ḓi ṋekedza tshifuwo tshi songo aluwaho tsha vhina kana tshi si na tshivhumbeo tshavhuḓi tsha vha nduvho ine muthu a ṋekedza nga u tou funa, hone a tshi nga ṱanganedziwi arali tshi tsha u khunyeledza zwe muthu a ana.

²⁴ Ni songo ṋekedza Muṋe washu tshifuwo tsho fhahulwaho nga nḓila ifhio kana ifhio. Hezwo a zwi tendelwi shangoni ḽaṋu.

²⁵ Ni songo ṋekedza tshifuwo tshine tsha bva kha mutsinda tsha vha nduvho ya zwiḽiwa. Zwifuwo zwo raloho zwi pfi zwi na luvhadzi, a zwi ṱanganedzwi.

²⁶ Muṋe washu o amba na Mushe a ri,

²⁷ “Arali ṋamana kana ngwana kana mbudzana yo dzwaliwa, nga i thome u dzula na mme ayo maḓuvha maṱanu na mavhili, ndi hone i tshi nga ṱanganedzwa ya vha nduvho ya zwiḽiwa.

²⁸ Ni songo ṱhavha kholomo na ṋamana yayo kana nngu na ngwana yayo kana mbudzi na mbudzana yayo ya vha tshiṱhavhelo nga ḓuvha ḽithihi.

²⁹ Arali ni tshi ṋekedza Muṋe washu tshiṱhavhelo tsha ndivhuho, tevhedzani ndayo uri ni ṱanganedzwe;

³⁰ tshi ḽeni nga ḓuvha ḽeneḽo, ni songo tshi sia u swika nga matshelo ḽi tshi tsha.”

³¹ Muṋe washu o ri, “Vhulungani ndayo dzanga ni dzi tevhedze, ndi Nṋe Yahavee.

³² Ni songo nyadzisa dzina ḽanga ḽikhethwa, Vhaisraele vhoṱhe vho fanela u ḓivha uri Nṋe ndi mukhethwa. Nṋe ndi Yahavee, ndi ni ita vhakhethwa;

³³ ndo ni pfulusa shangoni ḽa Egipita uri ndi vhe Mudzimu waṋu. Ndi Nṋe Yahavee.”