LIVITIKO 21 - BIVHILI KHETHWA Mafhungo Madifha

Vhukhethwa ha vhotshifhe

¹ Muṋe washu o laya Mushe uri a vhudze vhotshifhe vhana vha Aroni a ri, “Hu songo vha na tshifhe ane a ḓikumadza nga u longa tshanḓa kha maitele a u swiṱa mufu musi ho fa shaka,

² arali e si mme awe kana khotsi awe kana ṅwana wawe kana mukomana kana murathu vhana vha khotsi

³ kana khaladzi awe a sa athu dzewa a no dzula muṱani wawe.

⁴ A songo ḓikumadza lufuni lwa vhomakhulu mubebamusadzi.

⁵ “Hu songo vha na tshifhe ane a vheula ṱhoho yawe kana a ṱunya ndebvu dzawe kana a ḓitshea muvhili wawe u sumbedza uri u zwililoni.

⁶ Nga a vhe mukhethwa, a songo nyadzisa dzina ḽanga. U nṋekedza tshiṱhavhelo tsha zwiḽiwa, nga a vhe mukhethwa.

⁷ Tshifhe a songo dzea phombwe kana musadzi a si musidzana kana o ṱalwaho; ene ndi mukhethwa, o ḓikumedza Yahavee.

⁸ Vhathu nga vha vhone tshifhe e mukhethwa ngauri u nṋekedza tshiṱhavhelo tsha zwiḽiwa. Ndi Nṋe Yahavee, ndi mukhethwa, ndi ni ita vhakhethwa.

⁹ Arali ṅwananyana wa tshifhe a tshi ḓinyadzisa nga u tshila nga vhupombwe, u nyadzisa na khotsi awe, nga a fhiswe a fe.

¹⁰ “Tshifhe muhulu o shelwa mapfura a u mu ta ṱhohoni yawe, nahone o kumedzwa Mudzimu uri a ambare zwiambaro zwa vhutshifhe, zwenezwo a songo litsha mavhudzi awe á songo gamiwa kana a kherukanya zwiambaro zwawe u sumba uri u zwililoni.

^11-12 O khethelwa thungo a kumedzwa Nṋe nga mapfura e a ḓodzwa ngao; a songo ḓikumadza, a songo kumadza fhethu hanga hukhethwa nga u bva hone a dzhena nḓuni ho faho muthu, naho vhe khotsi awe kana mme awe.

¹³ Nga a dzee musidzana fhedzi,

¹⁴ a songo dzea tshilikadzi kana musadzi o ṱalwaho kana phombwe. Nga a dzee musidzana wa lushaka lwa hawe.

¹⁵ Zwa sa ralo, vhana vhawe vha ḓo vha vho kumala. Ndi Nṋe Yahavee, ndo mu khethela thungo a vha tshifhe muhulu.”

¹⁶ Muṋe washu o laya Mushe

¹⁷ uri a vhudze Aroni a ri, “Hu songo vha na muḓuhulu wau wa tshihole ane a nga nṋekedza nduvho ya zwiḽiwa. Misi yoṱhe zwi ḓi ralo.

¹⁸ Hu songo vha na muthu wa tshihole ane a nga ṋekedza nduvho: wa bofu kana wa tshihole kana o kongonyalaho kana a si na tshivhumbeo tshavhuḓi,

¹⁹ kana o kongonyalaho tshanḓa kana lwayo,

²⁰ kana a re na thunda kana mupfufhisa kana a lwalaho maṱo kana lukanda, kana o luvhedzwaho.

²¹ Hu songo vha na muḓuhulu wa tshifhe Aroni a re tshihole ane a nga nṋekedza nduvho ya zwiḽiwa.

²² Munna o raloho a nga ḓi ḽa zwiḽiwa zwine nda ṋekedzwa, nduvho ya zwiḽiwa zwikhethwa na nduvho ya zwiḽiwa zwikhethwakhethwa,

²³ hone ngauri ndi tshihole tsha muvhili, a songo sendela tsini ha lupila lukhethwa kana a swika aḽiṱarini. Izwo zwithu zwikhethwa a songo zwi kumadza, ngauri ndi Nṋe Yahavee, ndi vha ita vhakhethwa.”

²⁴ Hezwo ndi zwe Mushe a vhudza Aroni na vhana vha Aroni na Vhaisraele vhoṱhe.