LIVITIKO 19 - BIVHILI KHETHWA Mafhungo Madifha

Milayo ya vhukhethwa na khaṱhulombuya

¹ Muṋe washu o vhudza Mushe

² uri a vhudze Vhaisraele vhoṱhe a ri, “Ivhani vhakhethwa ngauri Nṋe Yahavee Mudzimu waṋu ndi mukhethwa.

³ Muṅwe na muṅwe nga a hulise mme awe na khotsi awe, nahone a vhulunge Sabatha sa zwe nda ni laya. Ndi Nṋe Yahavee Mudzimu waṋu.

⁴ “Ni songo nṱutshela na luvha midzimu i si tshithu, ni songo vhumba midzimu nga tsimbi na i luvha. Ndi Nṋe Yahavee Mudzimu waṋu.

⁵ “Musi ni tshi nṱhavhela tshifuwo tsha nduvho ya u konana na Mudzimu, tevhedzani ndayo dze nda ni ṋea, ndi hone ndi tshi ḓo ni ṱanganedza.

⁶ Ṋama yo fanela u ḽiwa ḓuvha ḽine itsho tshifuwo tsha ṱhavhiwa kana nga matshelo. Ṋama ine ya sala nga ḓuvha ḽa vhuraru yo fanela u fhisiwa,

⁷ ngauri yo no kumala, nahone ane a i ḽa a thi nga ṱanganedzi iyo nduvho.

⁸ Muthu ane a vhuya a i ḽa u na mulandu wa u dzhia zwe zwa kumedzwa Nṋe a zwi ita zwi si na mushumo, onoyo ha tsha ḓo vha muṅwe wa vhathu vhanga.

⁹ “Musi ni tshi kaṋa masimu aṋu, ni songo tshea mavhele a re lumemeni lwa masimu, nahone ni songo huma na yo tshea ṱhotshe dza mavhele o salelaho.

¹⁰ Ni songo huma na buḓekanya tsimu yaṋu ya nḓirivhe na yo kuvhanganya nḓirivhe dzo salaho kana na doba nḓirivhe dzo waho; dzi litsheni dzi salele vhashai na vhatsinda. Ndi Nṋe Yahavee Mudzimu waṋu.

¹¹ “Ni songo tswa kana na fhura kana na zwifha.

¹² Ni songo anela mazwifhi nga dzina ḽanga; hezwo zwi nyadzisa dzina ḽanga. Ndi Nṋe Yahavee Mudzimu waṋu.

¹³ “Ni songo fhura muṅwe kana na mu ṱangula. Ni songo vhuya na lala no fara muholo wa muthu we na mu rendela uri a ni shumele.

¹⁴ Ni songo teketela muthu wa dzinganḓevhe kana na vhea tshithu phanḓa ha muthu wa bofu uri a khukhulwe. Nnyofheni; ndi Nṋe Yahavee Mudzimu waṋu.

¹⁵ “Ivhani vha fulufhedzeaho, ni vhe na khaṱhulo mbuya musi ni tshi sengisa milandu; ni songo vha na tshiṱalula na imelela vhashai fhedzi kana na ofha vhapfumi.

¹⁶ Ni songo isela muṅwe phungo ya mazwifhi, nahone arali muṅwe a tshi khou sengiswa mulandu une wa nga mu ḽa ṱhoho, ambani arali vhuṱanzi haṋu vhu tshi nga mu farisa. Ndi Nṋe Yahavee.

¹⁷ “Ni songo fara muthu nga mbilu, pfumedzanani nae, ni sa ḓo tshinya nga mulandu wawe.

¹⁸ Ni songo lifhedza muṅwe muthu, kana na ḓi dzula ni tshi mu vhenga, funani vhaṅwe unga inwi vhaṋe. Ndi Nṋe Yahavee.

¹⁹ “Tevhedzani ndaela dzanga. Ni songo vanganya malofha a zwifuwo zwi si zwa lushaka luthihi. Ni songo zwala mbeu dza tshakha mbili tsimuni nthihi. Ni songo ambara zwiambaro zwo itwaho nga tshakha mbili dza masila.

²⁰ “Arali munna o fulufhedzisa u rengisela muṅwe munna phuli ya musidzana uri i vhe musadzi wawe wa phuli, hone muṋe wawe a mu dzhenisa nḓuni uyo muṅwe munna a sa athu bvisa mutengo wa musidzana, zwenezwo avho vhavhili vhe vha dzhenisana nḓuni vha songo vhulawa, vha ḓo tou lifhedzwa. Hufha musidzana a tshee phuli yawe.

²¹ Uyo munna nga a ḓise thutha muṋangoni wa dennde ya u ṱangana na Nṋe i vhe nduvho ya mulifho wawe,

²² tshifhe u ḓo i dzhia a ita ngayo nduvho ya u vha kumulula uri uyo munna a pfumelwe vhutshinyi hawe, ndi hone Mudzimu a tshi ḓo mu hangwela.

²³ “Musi ni tshi dzhena shangoni ḽa Kanana, na zwala miri ya mitshelo, ḓivhani uri iyo mitshelo i ḓo vha yo kumala miṅwaha miraru ya u thoma. Tshifhinga tshenetsho ni songo i ḽa.

²⁴ Nga ṅwaha wa vhuṋa mitshelo yoṱhe i ḓo kumedzwa ya vha nduvho ya mutendelo wa Nṋe Yahavee.

²⁵ Huno nga ṅwaha wa vhuṱanu ni nga ḓi ḽa iyo mitshelo. Arali na ita zwoṱhe hezwo, miri yaṋu i ḓo aṋwa mitshelo minzhi. Ndi Nṋe Yahavee Mudzimu waṋu.

²⁶ “Ni songo ḽa ṋama ine ya kha ḓi vha na malofha. Ni songo ita zwa vhungome na zwa manditi.

²⁷ Ni songo phula nḓobo ṱhohoni kana na ṱunya ndebvu

²⁸ kana na ḓiṅwala makolo kha lukanda kana na ḓitshea muvhili ni tshi lilela vhafu. Ndi Nṋe Yahavee.

²⁹ “Ni songo nyadzisa vhana vhaṋu vha vhasidzana nga u vha ita dziphombwe thembeleni dza midzimu, shango ḽi sa ḓo ḓala vhupombwe na vhuṱudzi.

³⁰ “Vhulungani Sabatha unga ndo ni laedza, ni hulise fhethu hune nda luvhiwa. Ndi Nṋe Yahavee.

³¹ “Ni songo ya u ṱoḓa nyeletshedzo kha vhoriaḓivha vhane vha vhudzisa mimuya ya vho faho. Arali na ita nga u ralo ni ḓo vha no kumala. Ndi Nṋe Yahavee Mudzimu waṋu.

³² “Hulisani vho no vhaho vha maḓuvha ni vha ṱhonifhe. Nṋe ni nnyofhe; ndi Nṋe Yahavee.

³³ “Ni songo tambudza vhatsinda vha no dzula shangoni ḽaṋu.

³⁴ Vha fareni unga Vhaisraele vha haṋu, ni vha fune unga inwi vhaṋe. Ni songo hangwa uri na inwi no vha ni vhatsinda shangoni ḽa Egipita. Ndi Nṋe Yahavee Mudzimu waṋu.

³⁵ “Ni songo fhura vhaṅwe nga u ela nga mielo kana tshikalo kana midzio i si yone.

³⁶ Elani nga zwikalo zwi re zwone na vhuleme vhu re hone na mielo i re yone. Ndi Nṋe Yahavee Mudzimu waṋu, ndo ni pfulusa shangoni ḽa Egipita.

³⁷ Tevhedzani milayo yanga yoṱhe na ndayo dzanga. Ndi Nṋe Yahavee.”