LIVITIKO 13 - BIVHILI KHETHWA Mafhungo Madifha

Ndayo dza vhulwadze ha lukanda

¹ Muṋe washu o ṋea Mushe na Aroni ndayo hedzino:

² Arali muthu e na tshilonda kha lukanda lwawe kana tshitshimbili kana u zazamela hune ha nga vhanga vhulwadze ha lukanda vhu kumadzaho, nga a ḓiswe ha tshifhe Aroni kana ha muṅwe wa vhana vhawe a re tshifhe.

³ Tshifhe u ḓo sedza itsho tshilonda; arali mahaha a re khatsho o no shanduka matshena, itsho tshilonda tshi tshi nga tsho swika kha ṋama, u ḓo vha e na vhulwadze ha lukanda vhu kumadzaho, zwenezwo tshifhe u ḓo ri uyo muthu o kumala.

⁴ Huno arali itsho tshilonda tshi tshitshena tshi tshi nga tsho guma nga lukanda, nahone mahaha a re khatsho a songo shanduka matshena, tshifhe u ḓo vhea uyo muthu thungo maḓuvha maṱanu na mavhili,

⁵ a konou dovha a mu sedza nga ḓuvha ḽa vhuṱanu na vhuvhili. Arali a tshi vhona unga u kha ḓi nga zwenezwiḽa, itsho tshilonda a tsho ngo endelela, u ḓo dovha a mu vhea thungo ha dovha ha fhela maḓuvha maṱanu na mavhili.

⁶ Tshifhe u ḓo dovha a mu sedza nga ḓuvha ḽa vhuṱanu na vhuvhili. Arali tshilonda itsho tsho huma tshi songo endelela, u ḓo ri o kumuluwa, tsho vha tshi tshi tou vha tshilonda zwatsho. Uyo muthu u ḓo kuvha zwiambaro zwawe a vha o ṱamba dzitshika.

⁷ Huno arali tshifhe o no sedza uyo muthu a amba uri o ṱamba dzitshika, itsho tshilonda tsha sala tshi tshi endelela, o fanela u dovha a ya ha tshifhe.

⁸ Tshifhe u ḓo dovha hafhu a mu sedza, arali u huhumuwa ho endelela, u ḓo ri o kumala, ndi vhulwadze ha lukanda vhu kumadzaho.

⁹ Arali muṅwe muthu e na vhulwadze ha lukanda vhu kumadzaho, nga a iswe ha tshifhe

¹⁰ a mu sedze. Arali a wanala e na tshilonda tshitshena kha lukanda lwawe tshine tsha shandula mahaha a vha matshena, tsho ḓala vhulwa,

¹¹ ndi vhulwadze ha lukanda vhu no kumadza. Tshifhe u ḓo ri o kumala, ha tsha ṱwa a tshi vhewa thungo ngauri zwi khagala uri o kumala.

¹² Arali uho vhulwadze ha lukanda ha endelela ha ṱanganya muthu u bva ṋayoni u swika ṱhohoni,

¹³ tshifhe u ḓo dovha a mu sedza. Arali a wana uri ho ṱanganya muvhili woṱhe, u ḓo ri uyo muthu o kumululwa. Arali lukanda lwawe lwoṱhe lwo shanduka lutshena, o kumululwa.

¹⁴ Hone arali hu tshi tou vhonala tshilonda tsho phuleaho, o kumala.

¹⁵ Tshifhe u ḓo dovha a mu sedza, arali a vhona tshilonda tsho phulea, u ḓo ri o kumala. Tshilonda tsho phuleaho tshi sumba uri ndi vhulwadze ha lukanda vhu kumadzaho, muthu onoyo o kumala.

¹⁶ Hone arali tshilonda tshi tshi fhola tsha dovha tsha vha tshitshena, uyo muthu nga a ye ha tshifhe

¹⁷ a mu sedze. Arali itsho tshilonda tsho shanduka tshitshena, uyo muthu o kumululwa, tshifhe u ḓo ri o kumululwa.

¹⁸ Arali muthu e na tshitshimbili tsho fholaho,

¹⁹ ngavhuya tsha zwimba tsha vha tshitshena kana ha vhonala tshivhala tsha vhutshena kana vhutswuku he tshitshimbili tsha vha tshi hone, nga a ye ha tshifhe.

²⁰ Tshifhe u ḓo mu sedza, huno arali itsho tshivhala tsho swika ṋamani, mahaha a re khatsho o shanduka matshena, u ḓo ri o kumala. Ndi vhulwadze ha lukanda vhu kumadzaho ho simuwaho he ha vha hu na tshitshimbili.

²¹ Huno arali tshifhe a mu sedza a wana uri mahaha a re khatsho ho ngo shanduka matshena nahone a tsho ngo swika ṋamani, tsho haluluwa, tshifhe nga a mu vhee thungo maḓuvha maṱanu na mavhili.

²² Arali itsho tshivhala tsha endelela, tshifhe nga a ri o kumala, o farwa nga vhulwadze vhu no kumadza.

²³ Hone arali tsha ḓi dzula tsho ralo nahone tsha si endelele, ḽi tou vha vhadzi ḽo siwaho nga tshitshimbili, tshifhe nga a ri uyo muthu o kumululwa.

²⁴ Arali ha vha na muthu o swaho, ha vhonala tshivhala tsha vhutswuku kana tsha vhutshena kha ṋama,

²⁵ tshifhe nga a mu sedze. Arali mahaha a re kha itsho tshivhala a shanduka matshena, tsha vhonala tsho swika ṋamani yawe, ndi vhulwadze vhu kumadzaho, ho vhangwaho nga u swa, tshifhe nga a ri o kumala.

²⁶ Huno arali mahaha a re khatsho a songo shanduka matshena nahone tshi songo swika ṋamani, tshó haluluwa, tshifhe nga a mu vhee thungo hu fhele maḓuvha maṱanu na mavhili,

²⁷ a konou dovha a mu sedza nga ḓuvha ḽa vhuṱanu na vhuvhili. Arali tshi tshi khou endelela, ndi vhulwadze vhu pfukelaho nahone tshifhe nga a ḓivhadze uri o kumala.

²⁸ Huno arali itsho tshivhala tshi tshi ḓi dzula tsho ralo tshi sa endeleli nahone tsho haluluwa, uho a si vhulwadze vhu kumadzaho. Tshifhe nga a ḓivhadze uri o kumuluwa ngauri ḽi tou vha vhadzi ḽo vhangwaho nga u swa.

²⁹ Arali munna kana musadzi e na tshilonda kha ṱhoho kana kha luṱaha,

³⁰ tshifhe nga a tshi sedze. Arali tshi tshi nga tsho swika ṋamani yawe, mahaha a re khatsho e tshirulwane o ita na u sekena, ndi vhulwadze ha lukanda vhu kumadzaho, tshifhe nga a ḓivhadze uri uyo muthu o kumala.

³¹ Arali tshifhe a tshi mu sedza a vhona itsho tshilonda tshi songo swika ṋamani, hone a vhona mahaha a re khatsho o swifhala zwavhuḓi, nga a mu vhee thungo hu vhuye hu fhele maḓuvha maṱanu na mavhili

³² a konou dovha a sedza itsho tshilonda. Arali tshi songo endelela nahone hu si na mahaha a tshirulwane khatsho, tshí songo swika ṋamani,

³³ uyo munna nga a vheule u mona na tshilonda tshenetsho. Tshifhe nga a kone u mu vhea thungo hu dovhe hu fhele maṅwe maḓuvha maṱanu na mavhili.

³⁴ Nga ḓuvha ḽa vhuṱanu na vhuvhili tshifhe nga a dovhe a sedze itsho tshilonda, arali tshi songo endelela nahone tshi sa ngi tsho swika ṋamani, tshifhe nga a ḓivhadze uri o kumuluwa. Uyo muthu nga a kuvhe zwiambaro zwawe, u ḓo vha o kumuluwa.

³⁵ Huno arali itsho tshilonda tsha endelela ó no pfi o kumuluwa,

³⁶ tshifhe nga a dovhe a mu sedze. Arali tshilonda tsho endelela, a songo tsha ṱwa a tshi sedza u vhona arali mahaha e tshirulwane, zwi khagala uri uyo muthu o kumala.

³⁷ Huno arali tshifhe a tshi vhona unga tshilonda a tsho ngo endelela, ho ita na u mela mahaha maswa khatsho, zwenezwo tshilonda tsho fhola, tshifhe nga a ḓivhadze uri uyo muthu o kumuluwa.

³⁸ Arali muthu e na zwivhala zwitshena kha lukanda,

³⁹ tshifhe nga a sedze uyo muthu. Arali izwo zwivhala zwi na vhutshena ho rivhaho, lu tou vha luvhadzi lwo bvaho kha lukanda, uyo muthu ho ngo kumala.

⁴⁰ Arali munna o ṱhuvhea mavhudzi a vha na phanḓa, o kuna.

⁴¹ Arali o ṱhuvhea mavhudzi nga phanḓa a vha na phanḓa, o kuna.

⁴² Huno arali ha vhonala tshilonda tsha vhutshena vhutswukunyana fhethu hu re na phanḓa, ndi vhulwadze ha lukanda vhu pfukelaho.

⁴³ Tshifhe nga a mu sedze, arali hu na tshilonda tsha vhutshena vhutswukunyana,

⁴⁴ tshifhe nga a ḓivhadze uri o kumala nge a vha na vhulwadze ha lukanda vhu kumadzaho kha ṱhoho yawe.

⁴⁵ Muthu a re na vhulwadze ha lukanda vhu kumadzaho nga a ambare madzanganda, a litshe mavhudzi awe a songo gamiwa, a khurumele tshipiḓa tsha fhasi tsha tshifhaṱuwo tshawe, a ende a tshi huwelela a ri, “Ndo kumala, ndo kumala!”

⁴⁶ Arali a tshi kha ḓi vha o farwa nga vhulwadze honoho u ḓi dzula o kumala, nahone o fanela u dzula nnḓa ha mishasha, kule na vhaṅwe.

Ndayo dza muunda kha tshiambaro

⁴⁷ Arali kha tshiambaro tsha vhukuse kana tsha muḓali ha vhonala ho nambatela zwithu zwi no nga muunda,

⁴⁸ kana kha luvhemba lufhio na lufhio lwa lukhaha kana lwa vhukuse kana mukumba kana tshifhio na tshifhio tsho itwaho nga mukumba,

⁴⁹ arali tshi tshi nga tshidala kana tshitswuku, zwi fana na vhulwadze ha lukanda ho endelelaho, zwenezwo vhu sumbedzwe tshifhe.

⁵⁰ Tshifhe u ḓo sedza henefho, a vhea itsho tshiambaro thungo ha vhuya ha fhela maḓuvha maṱanu na mavhili.

⁵¹ U ḓo dovha a tshi sedza nga ḓuvha ḽa vhuṱanu na vhuvhili. Arali muunda wo endelela, itsho tshiambaro tsho kumala.

⁵² Tshifhe nga a fhise itsho tshiambaro ngauri tshi na muunda wo endelelaho, tshi fanela u fhiswa.

⁵³ Huno arali tshifhe a tshi sedza a wana uri uyo muunda a wo ngo endelela kha tshiambaro,

⁵⁴ u ḓo ri nga tshi kuvhiwe tshi vhewe thungo hu fhele maṅwe maḓuvha maṱanu na mavhili

⁵⁵ a konou dovha a tshi sedza. Arali muunda u songo shanduka muvhala, naho u songo endelela, tsho kumala; itsho tshiambaro tshi fhiseni nga mulilo, arali muunda uyo wo tshi kwama nga phanḓa kana nga murahu.

⁵⁶ Huno arali tshifhe a tshi dovha u tshi sedza a wana muunda wo haluluwa musi tsho kuvhiwa, u ḓo kherula tshipiḓa tshenetsho tsha sila kana mukumba tsho kwamiwaho nga vhulwadze.

⁵⁷ Huno arali uyo muunda wa dovha wa vhonala, u tshi khou dovha u endelela, muṋe watsho nga a tshi fhise.

⁵⁸ Arali a ri u kuvha itsho tshiambaro itsho tshivhala tsha si tsha vhonala, nga a dovhe u tshi kuvha, ndi hone tshi tshi ḓo vha tsho kumuluwa.

⁵⁹ Heyo ndi yone ndayo ya muunda kha zwiambaro, tshi nga vha tshi tshiambaro tsha vhukuse kana tsha lukhaha kana tsho hoṱiwaho kana sila ḽo lukiwaho kana tsho itwaho nga mukumba tshine ha pfi tsho kumuluwa kana tsho kumala.