LIVITIKO 12 - BIVHILI KHETHWA Mafhungo Madifha

U kumulula vhasadzi musi vho no vhofholowa

¹ Muṋe washu o ṋea Mushe ndayo hedzino

² dza Vhaisraele: Arali musadzi a beba ṅwana wa mutuka u fhedza maḓuvha maṱanu na mavhili o kumala, u ḓi nga musi o vhona ṅwedzi.

³ Nga ḓuvha ḽa vhuṱanu na vhuraru uyo ṅwana nga a fumbiswe.

⁴ Zwenezwo hu ḓo vha ho sala maḓuvha a 33 u swika musadzi uyo a tshi kumululwa nge malofha a ḓo vha o phopha oṱhe; a songo kwama tshithu tshikhethwa kana a dzhena denndeni ya u ṱangana na Mudzimu tshifhinga tsha u kumululwa hawe tsha vhuya tsha khunyelela.

⁵ Arali musadzi a beba ṅwana wa musidzana u fhedza maḓuvha a 14 o kumala, u ḓi nga a tshi khou vhona ṅwedzi. Zwenezwo hu ḓo vha ho sala maḓuvha a 66 u swika a tshi kumuluwa nge malofha a ḓo vha o phopha oṱhe.

⁶ Musi tshifhinga tshawe tsha u kumululwa tsho khunyelela, tshi nga vha tshi tsha ṅwana wa mutukana kana wa musidzana, o fanela u ḓisa ngwana ya ṅwaha muthihi ya tshiṱhavhelo tshi fhiswaho na ḽiivha ḽa tshiṱhavhelo tsha tshipfumelo a zwi swikise ha tshifhe muṋangoni wa dennde ya u ṱangana na Mudzimu.

⁷ Tshifhe u ḓo ṋekedza Muṋe washu nduvho ya uyo musadzi a khunyeledza maitele a u mu kumulula, ndi hone a tshi ḓo vha o ṱamba dzitshika. Hezwo ndi zwine musadzi a fanela u zwi ita musi o beba ṅwana.

⁸ Arali musadzi uyo a si na ngwana, nga a ḓise maivha mavhili, ḽiṅwe ḽi vhe ḽa tshiṱhavhelo tshi fhiswaho ḽiṅwe ḽi vhe ḽa tshiṱhavhelo tsha tshipfumelo, tshifhe u ḓo khunyeledza maitele a u mu pfumelela, ndi hone a tshi ḓo vha o kumuluwa.