LIVITIKO 11 - BIVHILI KHETHWA Mafhungo Madifha

Phukha dzine dza nga ḽiwa na dzine dza ila u ḽiwa

¹ Muṋe washu a ṋea Mushe na Aroni ndayo hedzino

² dza Vhaisraele: Ni nga ḓi ḽa phukha dza shango

³ dzi re na khwanḓa dzo fhandekanaho dza dovha dza dzeula.

⁴ Hone hu na dziṅwe phukha dzine dza tou dzeula fhedzi, kana dza tou vha na khwanḓa dzo fhandekanaho fhedzi, dzenedzo dzi a ila u ḽiwa. Gamela nangwe i tshi dzeula, khwanḓa dzayo a dzo ngo fhandekana, yeneyo ni i vhone uri i a ila u ḽiwa.

⁵ Mbila naho i tshi dzeula, khwanḓa dzayo a dzo ngo fhandekana, yeneyo ni i ile.

⁶ Muvhuḓa naho u tshi dzeula, khwanḓa dzawo a dzo ngo fhandekana, ni u ile.

⁷ Nguluvhe naho khwanḓa dzayo dzo fhandekana, a i dzeuli, yeneyo ni i ile.

⁸ Phukha idzo ni songo ḽa ṋama yadzo, na u kwama tshitumbu tshadzo ni songo tshi kwama, dzi a ila u ḽiwa.

⁹ Ni nga ḓi ḽa tshakha dzoṱhe dza khovhe dzi re na mudzedze na makwanda,

¹⁰ hone zwoṱhe zwi dzulaho maḓini zwi si na mudzedze na makwanda ni songo zwi ḽa.

¹¹ Zwivhumbwa zwo raloho a zwo ngo kuna. Ni zwi ile, na u kwama tshitumbu tshazwo ni songo tshi kwama.

¹² Zwoṱhe zwi dzulaho maḓini zwi si na mudzedze na makwanda ni zwi ile.

¹³ Hu na zwiṋoni zwine na fanela u zwi nengwa na zwi ila ngauri zwi a nengisa, ndi goni na ḽianga na goni ḽitswu,

¹⁴ na lurwanzhivha na tshakha dzoṱhe dza lurwanzhivha lutswu,

¹⁵ na tshakha dzoṱhe dza mahunguvhu,

¹⁶ na mphwe na muswoo na ṱhambalwanzhe na tshakha dzoṱhe dza lurwanzhivha

¹⁷ na kukhwitha na dandila na gwitha ḽihulu

¹⁸ na gwitha ḽitshena na gwitha ḽa phangani na ḽiṋulakhovhe

¹⁹ na gololwane na tshakha dzoṱhe dza maovhelwa na khororo na mulemalema.

²⁰ Zwikhokhonono zwoṱhe zwi na phapha zwa dovha zwa tshimbila nga milenzhe ni zwi ile,

²¹ hu sa katelwi zwine zwa thamuwa.

²² Nzie ni nga ḓi dzi ḽa na ṱhonono kana vhuukhula.

²³ Hone zwiṅwe zwikhokhonono zwi re na phapha zwa dovha zwa kokovha a zwo ngo kuna.

²⁴ Zwine zwa nga ni kumadza ngezwi: Ane a vhuya a kwama zwitumbu zwazwo u ḓo kumala ḽa vhuya ḽa kovhela.

²⁵ Ane a vhuya a takula tshitumbu tshazwo o fanela u ṱanzwa zwiambaro zwawe nahone u ḓo kumala ḽa vhuya ḽa kovhela.

²⁶ Tshifuwo tshiṅwe na tshiṅwe tsha khwanḓa dzo fhandekanaho dzí songo litshanaho tshoṱhe kana zwine zwa si dzeule a zwo ngo kuna, ane a vhuya a kwama tshitumbu tsha tshiṅwe tshazwo u ḓo kumala.

²⁷ Kha phukha dzoṱhe dza milenzhe miṋa, dzine dza kanda nga mashimba adzo a dzo ngo kuna, ane a vhuya a kwama zwitumbu zwadzo u ḓo kumala ḽa vhuya ḽa kovhela.

²⁸ Muthu ane a takula zwitumbu zwadzo o fanela u ṱanzwa zwiambaro zwawe nahone u ḓo kumala ḽa vhuya ḽa kovhela. Hezwo ndi tshika kha inwi.

²⁹ Kha zwipuka zwine zwa tshimbila fhasi, zwi songo kunaho ndi hezwino: lukhohe na mbevha na tshakha dzoṱhe dza tswina

³⁰ na mbulu na tshivhululu na gwavhavha na mbulumaḓi na luaviavi.

³¹ Kha zwoṱhe zwine zwa tshimbila fhasi hezwo a zwo ngo kuna. Ane a vhuya a zwi kwama zwo fa u ḓo kumala ḽa vhuya ḽa kovhela.

³² Arali tshiṅwe tshazwo tsha fa tsha wela nṱha ha tshithu, itsho tshithu tshi nga vha tshi tshi shuma mushumo ufhio na ufhio, tshi ḓo vha tsho kumala, tshi nga vha tshi tsha thanda kana sila kana mukumba kana sila ḽa saga. Nga tshi lovhewe maḓini, tshi ḓo kumala ḽa vhuya ḽa kovhela, ndi hone tshi tshi ḓo kumululwa.

³³ Arali tshiṅwe tshazwo tsha wela khalini ya vumba, zwoṱhe zwi re ngomu hayo zwi ḓo vha zwo kumala nahone iyo khali ni i pwashe.

³⁴ Zwiḽiwa zwe zwa vha zwi tshi nga ḽiwa, hone zwa wanala zwi na maḓi a no bva khalini yeneyo, zwo kumala, na maḓi e a vha a tshi nga nwiwa o kiwa khayo o kumala.

³⁵ Tshiṅwe na tshiṅwe tshine tshitumbu tshazwo tsha wela khatsho tsho kumala, ṋanḓo kana khali ya u bika zwo fanela u pwashiwa. Zwó kumala na inwi no fanela u zwi vhona zwo kumala.

³⁶ Huno tshisimani kana bidzini hune ha kiwa maḓi hu ḓi dzula ho kuna, hone muthu ane a kwama tshiṅwe tsha zwitumbu zwadzo o kumala.

³⁷ Arali tshitumbu tsha phukha tsha wela nṱha ha mbeu ine ya fanela u zwaliwa, yone a i kumali.

³⁸ Huno arali iyo mbeu yo shelwa maḓi, tshitumbu tsha phukha tsha wela nṱha hayo, yo kumala.

³⁹ Arali phukha i sa ili u ḽiwa ya fa, ane a kwama tshitumbu tshayo u ḓo kumala ḽa vhuya ḽa kovhela.

⁴⁰ Muthu ane a ḽa ṋama ya itsho tshitumbu o fanela u kuvha zwiambaro zwawe, nahone u ḓo kumala ḽa vhuya ḽa kovhela. Ane a takula itsho tshitumbu o fanela u kuvha zwiambaro zwawe, nahone u ḓo kumala ḽa vhuya ḽa kovhela.

⁴¹ Zwivhumbwa zwoṱhe zwine zwa kokovha zwi a nengisa, zwi a ila u ḽiwa.

⁴² Ni songo ḽa tshivhumbwa tshine tsha kokovha, tshi nga vha tshi kokovhaho nga thumbu kana tshi tshimbilaho nga milenzhe miṋa kana nga milenzhe minzhi, tshi a nengisa.

⁴³ Ni songo ḓishata dzitshika nga tshiṅwe tsha izwo zwivhumbwa. Ni songo ḓikumadza nga u zwi ḽa.

⁴⁴ Ndi Nṋe Yahavee Mudzimu waṋu, ḓikumedzeni Nṋe ni vhe vhakhethwa ngauri Nṋe ndi mukhethwa. Ni songo ḓishata dzitshika nga zwivhumbwa zwi kokovhaho.

⁴⁵ Ndi Nṋe Yahavee we a ni pfulusa Egipita uri ndi vhe Mudzimu waṋu, zwenezwo ivhani vhakhethwa ngauri Nṋe ndi mukhethwa.

⁴⁶ Ndi dzone ndayo dzi ambaho nga dziphukha na zwiṋoni na zwoṱhe zwi tshilaho, zwi tshimbilaho maḓini na zwivhumbwa zwoṱhe zwi kokovhaho fhasi.

⁴⁷ Ni ṱalule zwivhumbwa zwo kunaho kha zwi songo kunaho, na zwivhumbwa zwi tshilaho zwine zwa nga ḽiwa na zwi no ila.