LIVITIKO 10 - BIVHILI KHETHWA Mafhungo Madifha

Vhutshinyi ha Nadaba na Abihu

¹ Vhana vha Aroni vha vhatuka, Nadaba na Abihu, vha dzhia ndongo dzavho dza mulilo, vha okela masimbe a mulilo nga ngomu, vha longa zwioro, vha dubisela Muṋe washu. Huno mulilo uyo wo vha u si mukhethwa ngauri Muṋe washu o vha a songo amba uri vha mu ṋekedze wone.

² Muṋe washu a mbo ḓisa mulilo, wa vha fhisa vha fa henefho maṱoni a Muṋe washu.

³ Ndi hone Mushe a tshi vhudza Aroni a ri, “Hezwi ndi zwe Muṋe washu a vha a tshi khou amba zwone musi a tshi ri, “ ‘Vhane vha nṋekedza nduvho vha fanela u hulisa vhukhethwa hanga; ndi ḓo dzumbululela vhathu vhugala hanga.’ ” Hone Aroni a sokou fhumula.

⁴ Mushe a vhidza Mishaele na Elitsafani, vhana vha vhatuka vha Uziele, khotsimunene wa Aroni, a vha vhudza a ri, “Iḓani hafha ni hwale zwitumbu zwa vhakomana vhaṋu zwi bve tsini ha dennde ya u ṱangana na Mudzimu, ni zwi vhee nnḓa ha mishasha.”

⁵ Vhone vha ḓa vha fara zwitumbu zwó ambara zwiambaro zwa vhutshifhe, vha zwi bvisela nnḓa ha mishasha, nga he Mushe a vha laya.

⁶ Ndi hone Mushe a tshi vhudza Aroni na vhana vhawe vha vhatuka Eliasara na Ithamara a ri, “Ni songo litsha u gama mavhudzi aṋu kana na kherukanya zwiambaro zwaṋu u sumbedza uri ni zwililoni. Arali na ralo ni ḓo fa nahone Muṋe washu u ḓo sinyutshela vhathu vhoṱhe. Hone Vhaisraele vha haṋu vhoṱhe vha a tendelwa u lilela avha vhafu vho faho nga mulilo we wa ḓiswa nga Muṋe washu.

⁷ Inwi ni songo ṱuwa muṋangoni wa dennde ya u ṱangana na Mudzimu, ni sa ḓo fa, ngauri no kumedzwa Muṋe washu nga mapfura awe a u ḓodza.” Vhone vha ita zwe Mushe a amba.

Milayo ya vhotshifhe

⁸ Muṋe washu a amba na Aroni a ri,

⁹ “Iwe na vhana vhau ni songo dzhena denndeni ya u ṱangana na Mudzimu no nwa waini kana halwa; arali na ralo ni ḓo fa. Hoyu ndi mulayo une wa fanela u vhulungwa nga mirafho yoṱhe i kha ḓi ḓaho.

¹⁰ Ni fanela u fhambanya zwikhethwa na zwi shumiswaho nga vhathu, na zwo kumalaho na zwo kumululwaho.

¹¹ Ni funze Vhaisraele milayo yoṱhe ye nda ni ṋea nga Mushe.”

¹² Mushe a vhudza Aroni na vhana vhawe vho salaho, Eliasara na Ithamara, a ri, “Dzhiani nduvho ya thoro yo salaho kha zwiḽiwa zwi ṋekedzwaho Muṋe washu, ni i ḽe i si na mbilisa ni tshi i ḽela tsini na aḽiṱari, ngauri iyo nduvho ndi khethwa-khethwa.

¹³ I ḽeleni fhethu hukhethwa; ndi mukovhe waṋu na vhana vhaṋu u no bva kha zwiḽiwa zwo ṋekedzwaho Muṋe washu. Hezwo ndi zwe Muṋe washu a nndaya.

¹⁴ Huno inwi na miṱa yaṋu ni nga ḓi ḽa tshiakha tshe tsha imiselwa nṱha na tshizwa tshe tsha ṋekedzwa Muṋe washu. Ni nga zwi ḽela fhethu ho kumululwaho. Nduvho hedzo dzo ṋewa inwi na vhana vhaṋu, ndi mukovhe waṋu u no bva kha nduvho ya Vhaisraele ya u konana na Mudzimu.

¹⁵ Nga vha ḓise tshizwa na tshiakha tshi imiselwaho nṱha musi mapfura a tshi ṋekedzwa Muṋe washu a vha nduvho i imiselwaho nṱha. Miraḓo heyo ndi yaṋu na vhana vhaṋu lini na lini, ye Muṋe washu a laya.”

¹⁶ Mushe a vhudzisa mbudzi ya nduvho ya tshipfumelo a pfa upfi yo no fhiswa. Hezwo zwa ita uri a sinyutshele Eliasara na Ithamara, a vhudzisa a ri,

¹⁷ “Khezwi ni songo ḽela nduvho ya tshipfumelo fhethu hukhethwa? Ndi khethwa-khethwa, Muṋe washu o ni ṋea yone uri i pfumelele vhathu.

¹⁸ Vhunga malofha ayo a songo ḓiswa fhethu hukhethwa, iyo nduvho no vha no fanela no i ḽela henefho, nga he nda ni laya.”

¹⁹ Aroni a fhindula a ri, “Zwino arali ndo vha ndo ḽa nduvho ya tshipfumelo ṋamusi? Muṋe washu o vha a tshi ḓo vhona zwi zwone naa? Vhathu vho ṋekedza Muṋe washu nduvho ya tshipfumelo ṋamusi, vha ḓisa nduvho yavho i fhiswaho, naho zwo ralo ndo ḓi welwa nga zwithu hezwi zwi ofhisaho.”

²⁰ Mushe a ri u pfa zwenezwo a rudza mbilu.