JOSHUA 8 - BIVHILI KHETHWA Mafhungo Madifha

Muḓi wa Ai u tshi thubiwa wa lozwiwa

¹ Muṋe washu a vhudza Joshua a ri, “Dzhia vhahali vhoṱhe u gonye navho muḓini wa Ai. U songo ofha tshithu, u songo kulea nungo. Ndo u kumedza khosi ya Ai na vhathu vhayo na muḓi wayo na shango ḽayo.

² U ite muḓi wa Ai na khosi yawo zwenezwiḽa zwe wa ita muḓi wa Jerikho na khosi yawo, hone zwino, ni nga ḓi dzhia thundu dzawo na zwifuwo zwa vha zwaṋu. Ḓilugiseni uri ni lalele muḓi uyo vhá songo vhuya vha humbula, ni vha ḓe nga murahu.”

³ Ndi hone Joshua a tshi ḓilugisa uri a ye Ai na vhahali vhawe vhoṱhe vhomakone vha no swika 30 000, a ri vha ye vhusiku

⁴ a vha vhudza a ri, “Dzumbamani siani heḽiḽa ḽa muḓi, hone hu songo vha kule nawo, ni ḓilugisele u u tshoṱhela.

⁵ Nṋe na vhanna vhanga ri ḓo ya ro livha uyo muḓi. Musi vhanna vha Ai vha tshi bva uri vha lwe na riṋe, riṋe ri ḓo rembuluwa ra shavha, sa zwe ra ita zwiḽa u rangani.

⁶ Vha ḓo ri pandamedza ra vhuya ra vha kunga vha bva muḓini. Vha do vhona unga ri khou vha shavha sa zwe ra ita u rangani.

⁷ Ndi hone inwi ni tshi ḓo takuwa he na vha dzumbama, na thuba muḓi. Muṋe washu Mudzimu waṋu u ḓo ni kumedza wone.

⁸ Nó no thuba uyo muḓi ni u fhise nga mulilo, nga he Muṋe washu a ri laya. Ni ite nga u ralo.”

⁹ Ndi hone Joshua a tshi vha ruma, vha ya vhudzumbamoni havho, vha lindela vhe henefho, vhukovhela ha muḓi wa Ai, vhukati ha Ai na Bethele. Joshua a lala na mmbi iḽa iṅwe.

¹⁰ Ḽi tshi tsha Joshua a fhinduwa, a vhidza vhahali vhawe vha kuvhangana. Ene na vharangaphanḓa vha Israele vha vha ranga phanḓa vha ya Ai.

¹¹ Joshua na vhahali vha livha khoroni khulwane ya muḓi, vha ṱoka mishasha siani ḽa devhula, hú na govha vhukati havho na Ai.

¹² Joshua a dzhia vhanna vhane vha nga swika 5 000, a vha dzumba vhukovhela ha muḓi, vhukati ha Ai na Bethele.

¹³ Vhahali vha dzudzanyelwa u lwa, vhoṱhe vha re mishashani devhula ha muḓi na vho lalelaho vhukovhela hawo. Joshua a mbo tsela govhani a lala henefho.

¹⁴ Khosi ya Ai a tshi vhona vhanna vha Joshua, a si vhuye a lenga. Ene na vhanna vhawe vhoṱhe vha bva vha livha govhani ḽa Jorodani uri vha lwe na Vhaisraele henefhaḽa he vha lwa navho u rangani, a sa ḓivhi uri u khou ḓo tshoṱhelwa nga murahu.

¹⁵ Joshua na vhanna vhawe vha ḓiita unga vha khou humela murahu, vha vha shavha vha livha phangani.

¹⁶ Vhanna vhoṱhe vha uyo muḓi vha rambiwa uri vha vha pandamedze, huno vha tshi khou pandamedza Joshua, vha kungea vha swika kule na muḓi.

¹⁷ Vhanna vhoṱhe vha Ai na vha Bethele vha sala Vhaisraele murahu, muḓi wa sala wo vulea hu si na ane a u lwela.

¹⁸ Ndi hone Muṋe washu a tshi vhudza Joshua a ri, “Sumba muḓi wa Ai nga pfumo ḽau, ndi u kumedza wone.” Joshua a ita zwe a vhudza.

¹⁹ Hezwi a tshi tou imisa tshanḓa tshawe, vhanna vhe vha vha vho dzumbama vha mbo ḓi ri vukuluku vha tshoṱhela muḓi vha u thuba, vha mbo ḓi u funga nga mulilo.

²⁰ Musi vhanna vha Ai vha tshi sedza murahu, vha vhona hu tshi duba buluvhutsi. Vho vha vha si tshee na vhushavhelo ngauri na Vhaisraele vhe vha shavha vho livha phangani vho mbo ḓi rembuluwa vha lwa navho.

²¹ Musi Joshua na vhanna vhawe vha tshi vhona uri vhaḽa vhaṅwe vho no thuba muḓi na uri buluvhutsi ḽawo ḽi khou duba, vha mbo rembuluwa vha thoma u vhulaha vhanna vha Ai.

²² Vhaisraele vhe vha vha vhe ngomu muḓini zwino vha tsela fhasi vha ḓibaḓekanya na iyo mmbi. Zwenezwo vhanna vha Ai vha wana vho tangwa tshoṱhe nga Vhaisraele, vha vhulawa vhoṱhe. A hu na we a ponyoka, a hu na we a tshila,

²³ arali i si khosi ya Ai. Ene o tou thubiwa a iswa ha Joshua.

²⁴ Vhaisraele vho pandamedzelwaho phangani vha vhulaha maswina oṱhe henefhaḽa phangani he vha pandamedzelwa hone, vha konou humela Ai, vha vhulaha vhoṱhe vho salaho.

^25-26 Joshua a dzula o sumba muḓi wa Ai nga pfumo ḽawe, a si vhuye a ḽi vhea fhasi vhoṱhe vha re henefho vha sa athu vhulawa vhoṱhe. Vhathu vhoṱhe vha Ai vho mbo ḓi vhulawa musi wonoyo – vhanna na vhasadzi vha 12 000.

²⁷ Hone kholomo na thundu zwe zwa thubiwa henefho muḓini, Vhaisraele vho zwi dzhia nga he Muṋe washu a laya Joshua.

²⁸ Joshua a fhisa muḓi wa Ai a u sia u matumba. U tshee wo ralo na ṋamusi.

²⁹ Joshua a nembeledza khosi ya Ai murini, a litsha tshitumbu tshawe henefho ḽa vhuya ḽa kovhela, a konou ri tshitumbu tshi ṱuwisiwe, tsha kudzwa fhasi muṋangoni wa khoro ya muḓi. Vha khokha matombo khatsho a ita thulwi khulu, na ṋamusi i tshee hone.

Mulayo u tshi vhalwa thavhani ya Ebala

³⁰ Joshua a fhaṱela Muṋe washu Mudzimu wa Israele aḽiṱari thavhani ya Ebala.

³¹ A i fhaṱa a tshi tevhedza ndayo dze Mushe muḓinḓa wa Muṋe washu a ṋea Vhaisraele, nga kuambele kwa Mulayo wa Mushe hu tshi pfi, “I vhe aḽiṱari yo fhaṱwaho nga matombo a songo vhaḓwaho nga musendo wa tsimbi.” Vha ṋekedza Muṋe washu zwiṱhavhelo zwa u fhisa khayo, vha ṋekedza na nduvho dza u konana nae.

³² Henefho matomboni Joshua a ṅwalulula Mulayo we wa vha wo ṅwalwa nga Mushe, a u ṅwala Vhaisraele vha tshi khou sedza.

³³ Vhaisraele na vharangaphanḓa vhavho na vhakoma na vhahaṱuli khathihi na vhatsinda vha re navho, vha rwa muduba masia mavhili a mbulungelo ya mulanga ya Muṋe washu, vho livhana na vhotshifhe vha Vhalivi vho i hwalaho. Hafu ya vhathu vha ima vho furalela thavha ya Gerisimu, hafu iṅwe vha ima vho furalela thavha ya Ebala. Mushe muḓinḓa wa Muṋe washu o vha o vha laya uri vha ite nga u ralo musi tshifhinga tshavho tsha u ṱanganedza mashudu tshi tshi swika.

³⁴ Zwenezwo Joshua a vhala Mulayo woṱhe a tshi tou ambela nṱha, a tshi vhala a mashudu khathihi na a u teketela, nga he zwa ṅwalwa buguni ya Mulayo.

³⁵ A ho ngo vha na ndayo na nthihi ya Mushe ye Joshua a si i vhalele tshivhidzo tshoṱhe. Ḽo vha ḽo angaredza na vhasadzi na vhana na vhatsinda vhe vha vha vha tshi dzula navho.