JOSHUA 4 - BIVHILI KHETHWA Mafhungo Madifha

Hu tshi imiswa matombo a tshihumbudzo

¹ Musi lushaka lwoṱhe lwo no wela Jorodani, Muṋe washu a amba na Joshua a ri,

² “Khetha vhanna vha 12, muthihi kha tsinde muthihi kha tsinde,

³ u vha vhudze vha dzhie matombo a 12 vhukati ha mulambo wa Jorodani, henefhaḽa he vhotshifhe vha vha vho ima hone, vha ṱuwe vho a hwala, vha a vhee fhasi hune na ḓo lala hone vhusiku ha ṋamusi.”

⁴ Ndi hone Joshua a tshi vhidza vhaḽa vhanna vha 12 vhe a vha o vha khetha,

⁵ a vha vhudza a ri, “Dzhenani mulamboni wa Jorodani ni fhire phanḓa ha mbulungelo ya mulanga ya Muṋe washu Mudzimu waṋu, muṅwe na muṅwe a hwale tombo nga shaḓa ḽawe, zwi tshi tevhedza mbalo ya matsinde a Vhaisraele.

⁶ Matombo hayo a ḓo humbudza vhathu zwe Muṋe washu a ita. Misi i ḓaho, arali vhana vhaṋu vha ni vhudzisa zwine ayo matombo a amba,

⁷ ni vha vhudze uri maḓi a mulambo wa Jorodani o litsha u ela musi mbulungelo ya mulanga wa Yahavee i tshi wela uyu mulambo. Matombo hayo a ḓo dzula a tshi humbudza Vhaisraele zwe zwa itea hafhano.”

⁸ Vhanna avho vha tevhedza zwe Joshua a amba. Vha dzhia matombo a 12 a tshi bva vhukati ha mulambo wa Jorodani, vha tshi tevhedza mbalo ya matsinde a Vhaisraele, vha a hwala vha a isa hune vha ḓo lala hone, vha a vhea fhasi henefho, nga he Muṋe washu a vhudza Joshua.

⁹ Joshua na ene a imisa matombo a 12 vhukati ha mulambo wa Jorodani, henefhaḽa he ha vha ho ima vhotshifhe vho hwalaho mbulungelo ya mulanga. Matombo hayo a kha ḓi vha henefho na ṋamusi.

¹⁰ Vhotshifhe vho ima vhukati ha Jorodani ha vhuya ha itwa zwoṱhe zwe Muṋe washu a vhudza Joshua uri a vhudze vhathu vha zwi ite. Hezwo ndi zwe Mushe a ri zwi itwe. Vhathu vha wela mulambo nga u ṱavhanya.

¹¹ Musi vhoṱhe vho no vha seli na luḽa, vhotshifhe vho hwalaho mbulungelo ya mulanga wa Muṋe washu vha dovha vha ranga vhathu phanḓa.

¹² Vhanna vha tsinde ḽa Rubeni na ḽa Gadi na hafu ya vha tsinde ḽa Manase vho vha vho ḓilugisela nndwa, vha vha vhone vho rangaho vhathu phanḓa vha tshi wela mulambo, nga he Mushe a vha vhudza.

¹³ Vhe vha vha vho shomela nndwa vha nga vha vho swika 40 000; vhenevho vha wela seli phanḓa ha Muṋe washu vha ya mudavhini wa Jerikho.

¹⁴ Zwe Muṋe washu a ita uyo musi zwo ita uri Vhaisraele vha vhone Joshua e munna muhulwane, vha mu hulisa vhutshilo hawe hoṱhe, zwa nga vha tshi hulisa Mushe.

¹⁵ Ndi hone Muṋe washu a tshi vhudza Joshua

¹⁶ uri a vhudze vhotshifhe vho hwalaho mbulungelo i na Mulayo uri vha bve mulamboni wa Jorodani.

¹⁷ Joshua a ita nga u ralo,

¹⁸ musi vhotshifhe vho hwalaho mbulungelo ya mulanga wa Muṋe washu vha tshi bva mulamboni, hezwi vha tshi tou kanda bamani, mulambo wa dovha u ela, wa dovha wa ḓala wa ita na u fhalala.

¹⁹ Vhathu vho wela mulambo wa Jorodani nga ḓuvha ḽa fumi ḽa ṅwedzi wa u thoma, vha yo ṱoka mishasha Giligala, vhubvaḓuvha ha Jerikho.

²⁰ Henefho Joshua a imisa matombo aḽa a 12 e a dzhiwa mulamboni wa Jorodani.

²¹ Joshua a vhudza Vhaisraele a ri, “Misi i ḓaho, arali vhana vhaṋu vha ni vhudzisa zwine ayo matombo a amba,

²² ni vha vhudze zwa musi Vhaisraele vha tshi wela mulambo wa Jorodani wo oma.

²³ Ni vha vhudze uri Muṋe washu Mudzimu waṋu o xisa maḓi a Jorodani a tshi itela inwi na vhuya na wela seli, sa zwe a xisa maḓi a Lwanzhe lwa Dziṱhanga ra lu wela.

²⁴ Muṋe washu o ita hezwo uri tshakha dzoṱhe dza ḽifhasi dzi ḓivhe uri u na maanḓa, inwi ni hulise Muṋe washu Mudzimu waṋu misi yoṱhe.”