JOSHUA 21 - BIVHILI KHETHWA Mafhungo Madifha

Miḓi ya Vhalivi

¹ Vharangaphanḓa vha miṱa ya Vhalivi vha ya ha tshifhe Eliasara na ha Joshua ṅwana wa Nunu na ha vhaṋe vha miṱa ya matsinde oṱhe a Israele.

² Henefho Shilo shangoni ḽa Kanana vha vha vhudza vha ri, “Muṋe washu o laya nga mulomo wa Mushe uri riṋe ri ṋewe-vho miḓi ri dzule khayo, khathihi na shango ḽa pfulo ya kholomo dzashu, u mona na iyo miḓi.”

³ Vhaisraele vha mbo ṋea Vhalivi miṅwe miḓi na mashango a pfulo shangoni ḽavho, vha tshi tevhedza zwe Muṋe washu a laya.

⁴ Miṱa ya Vhalivi vha mutupo wa Kehathi vho vha vhone vha u thoma u kovhelwa miḓi. Miṱa ya lutsinga lwa tshifhe Aroni vha kovhelwa miḓi ya 13 i re shangoni ḽa Juda na Simioni na Benyamini.

⁵ Vhaṅwe vha mutupo wa Kehathi vho salaho vho kovhelwa miḓi ya fumi i re shangoni ḽa Efraimi na Dani na Manase wa vhukovhela.

⁶ Vha mutupo wa Gerisoni vha kovhelwa miḓi ya 13 shangoni ḽa Isakhara na Ashere na Nafuthali na Manase ḽa vhubvaḓuvha ḽi re Bashani.

⁷ Miṱa ya mutupo wa Mirari vho kovhelwa miḓi ya 12 shangoni ḽa Rubeni na Gadi na Zebuloni.

⁸ Vhaisraele vho kovhela Vhalivi miḓi heyo na mashango ayo a pfulo nga u ita madeṅwa nga he Muṋe washu a laya nga mulomo wa Mushe.

⁹ Khea madzina a miḓi ya shangoni ḽa Juda na Simioni yo kovhelwaho

¹⁰ vhaḓuhulu vha Aroni vha mutupo wa Kehathi, wa lutsinga lwa Livi. Vhenevho ndi vhone vho thomaho u wana mukovhe.

¹¹ Vho kovhelwa Muḓi wa Araba (Araba ndi khotsi a Anaka), une zwino wa pfi Hebroni, mivhunduni ya Juda, khathihi na pfulo ḽawo.

¹² Hone masimu a uyo muḓi, khathihi na ḓorobo dzawo, zwo vha zwo no ḓi ṋewa Khalebe ṅwana wa Jefune uri zwi vhe zwawe.

¹³ U engedza muḓi wa Hebroni (muṅwe wa miḓi ya vhushavhelo), kheino miḓi ye ya kovhelwa vhaḓuhulu vha tshifhe Aroni: Libina

¹⁴ na Jathiri na Eshthemua

¹⁵ na Holoni na Debiri

¹⁶ na Aini na Juta na Bethe Shemeshe, khathihi na mashango ayo a pfulo. Ndi miḓi miṱanu na miṋa ya matsinde a Juda na Simioni.

¹⁷ Shangoni ḽa Benyamini vho ṋewa miḓi miṋa: Gibioni na Geba

¹⁸ na Anathotho na Alimoni, khathihi na mashango ayo a pfulo.

¹⁹ Miḓi yoṱhe yo ṱangana ndi 13 khathihi na mashango ayo a pfulo, zwo kovhelwa vhotshifhe vhaḓuhulu vha Aroni.

²⁰ Vhaṅwe vha miṱa vha Vhalivi vha mutupo wa Kehathi vho kovhelwa miṅwe miḓi i re shangoni ḽa Efraimi.

²¹ Vho kovhelwa miḓi miṋa: Shikheme na mashango awo a pfulo mivhunduni ya Efraimi (ndi muṅwe wa miḓi ya vhushavhelo), na Gezere

²² na Kibitsaimi na Bethe Horoni, khathihi na mashango ayo a pfulo.

²³ Shangoni ḽa Dani vho kovhelwa miḓi miṋa: Elitheke na Gibithoni

²⁴ na Ayaloni na Gathi Rimoni, khathihi na mashango ayo a pfulo.

²⁵ Shangoni ḽa Manase ḽa vhukovhela vho kovhelwa miḓi mivhili: Thaanakha na Gathi Rimoni, khathihi na mashango ayo a pfulo.

²⁶ Miṱa heyo ya mutupo wa Kehathi vho kovhelwa miḓi ya fumi yo ṱangana, khathihi na mashango ayo a pfulo.

²⁷ Vha tshiṅwe tshigwada tsha Vhalivi vha mutupo wa Gerisoni, shangoni ḽa Manase ḽa vhubvaḓuvha vho kovhelwa miḓi mivhili: Golani u re Bashani (Ndi muṅwe wa miḓi ya vhushavhelo) na Ashtharotho, khathihi na mashango ayo a pfulo.

²⁸ Shangoni ḽa Isakhara vho kovhelwa miḓi miṋa: Kishioni na Daberatha

²⁹ na Jaramuthu na Eni Ganimu, khathihi na mashango ayo a pfulo.

³⁰ Shangoni ḽa Ashere vho kovhelwa miḓi miṋa: Mishala na Abudoni

³¹ na Helekatha na Rehobo, khathihi na mashango ayo a pfulo.

³² Shangoni ḽa Nafuthali vho kovhelwa miḓi miraru: Kedeshe u re Galelia, khathihi na mashango awo a pfulo (ndi muṅwe wa miḓi ya vhushavhelo), na Hamotho Doro na Karathani, khathihi na mashango ayo a pfulo.

³³ Miṱa yo fhambanaho ya mutupo wa Gerisoni yo kovhelwa miḓi ya 13 yo ṱangana, khathihi na mashango ayo a pfulo.

³⁴ Vhaṅwe Vhalivi vho salaho vha mutupo wa Mirari, shangoni ḽa Zebuloni vho kovhelwa miḓi miṋa: Jokoniamu na Karitha

³⁵ na Dimina na Nahalali, khathihi na mashango ayo a pfulo.

³⁶ Shangoni ḽa Rubeni vho kovhelwa miḓi miṋa: Betsere na Jahatsa

³⁷ na Kedemotho na Mifaathi, khathihi na mashango ayo a pfulo.

³⁸ Kha tsinde ḽa Gadi vho kovhelwa miḓi miṋa: Ramotho u re Giliadi, khathihi na mashango awo a pfulo (ndi muṅwe wa miḓi ya vhushavhelo), na Mahanaimi

³⁹ na Hesheboni na Jazere, khathihi na mashango ayo a pfulo.

⁴⁰ Vha mutupo wa Mirari vho kovhelwa miḓi ya 12 yo ṱangana yoṱhe.

^41-42 Shangoni ḽe ḽa vha ḽi ḽa Vhaisraele, Vhalivi vho kovhelwa miḓi ya 48 yoṱhe yo ṱangana, khathihi na mashango ayo a pfulo.

Vhaisraele vha tshi dzhia shango

⁴³ Zwo tou ralo Muṋe washu a tshi ṋea Vhaisraele shango ḽoṱhe ḽe a vha o fulufhedzisa vhomakhulukuku wavho nga muano uri u ḓo vha ṋea. Huno vha ḽi dzhia, vha dzula henefho.

⁴⁴ Muṋe washu a ladza shango ḽavho ḽoṱhe, nga he a fulufhedzisa vhomakhulukuku wavho. Ho vha hu si na na muthihi wa maswina avho oṱhe we a vha a tshi kona u imedzana navho, ngauri Muṋe washu o vha kumedza maswina avho oṱhe.

⁴⁵ Muṋe washu a khunyeledza zwivhuya zwoṱhe zwe a fulufhedzisa Vhaisraele, a hu na ipfi na ḽithihi ḽe ḽa wela fhasi.