JOSHUA 18 - BIVHILI KHETHWA Mafhungo Madifha

Hu tshi kovhiwa shango ḽo salaho

¹ Musi vho no kunda shango, vhathu vhoṱhe vha Israele vha kuvhangana Shilo, vha akha dennde ya u ṱangana na Muṋe washu.

² Ho vha hu tshi kha ḓi vha na matsinde maṱanu na mavhili a Vhaisraele vha sa athu kovhelwa mukovhe wavho wa shango.

³ Ndi hone Joshua a tshi amba na Vhaisraele a ri, “Ni ḓo lindela u swika lini ni sa dzheni na dzhia shango ḽe na ṋewa nga Muṋe washu Mudzimu wa vhomakhulukuku waṋu?

⁴ Mpheni vhararu vhararu kha tsinde ḽiṅwe na ḽiṅwe. Ndi ḓo vha ruma vha bva vha yo tandula shango iḽo ḽoṱhe vha ṅwale mukovho waḽo vha konou dovha vha vhuya kha nṋe.

⁵ Shango iḽo vha ḓo ḽi kovhekanya ḽa bva zwipiḓa zwiṱanu na zwivhili; Juda u ḓo dzula shangoni ḽawe thungo ya tshipembe, Josefa a dzula shangoni ḽawe thungo ya devhula.

⁶ Ni ṅwale mukovho wa khethekanyo hedzo ṱhanu na mbili ni u ḓise kha nṋe. Nṋe ndi ḓo konou ita madeṅwa nda ni vhudzisela ha Mudzimu Muṋe washu.

⁷ Vhalivi vhone iḽo shango vha nga si kovhekane na inwi, mukovhe wavho ndi wa u vha vhotshifhe vha Muṋe washu. Vha matsinde a Gadi na Rubeni na hafu ya tsinde ḽa Manase vho no ḓi wana shango ḽavho vhubvaḓuvha ha Jorodani, ḽe vha ṋewa nga Mushe muḓinḓa wa Muṋe washu.”

⁸ Avho vhanna vha takuwa vha fara lwendo u yo ola mapa wa shango, Joshua ó thoma u vha laya a ri, “Tandulani shango ḽoṱhe ni ole mapa waḽo, ni konou vhuya kha nṋe. Nṋe ndi ḓo ni vhudzisela ha Muṋe washu nga u ita madeṅwa henefhano Shilo.”

⁹ Ndi hone avho vhanna vha tshi yo tandula shango, vha dzula fhasi vha ola uri vha ḓo ḽi kovhekanya hani ḽa bva zwipiḓa zwiṱanu na zwivhili, vha ṅwala mutevhe wa miḓi, vha konou humela ha Joshua mishashani ya Shilo.

¹⁰ Joshua a ita madeṅwa a vha vhudzisela ha Muṋe washu, tsinde ḽiṅwe na ḽiṅwe ḽa Vhaisraele ḽo salaho a ḽi kovhela tshipiḓa tsha shango.

Benyamini

¹¹ Shango ḽa tsinde ḽa Benyamini ndi ḽone ḽe ḽa thoma u kovhiwa zwi tshi tevhedza miṱa yavho. Shango ḽavho ḽo vha vhukati ha ḽa matsinde a Juda na Josefa.

¹² Sia ḽa devhula masakha avho o thoma Jorodani, a gonyela devhula ha Jerikho, a livha vhukovhela a tshi buḓekanya shango ḽa mivhundu u vhuya u swika phangani ya Bethavene.

¹³ Masakha a gonya muvhundu tshipembe ha Lusi (hune ha dovha ha pfi Bethele), a tsela Atarotho Adara, nṱha ha thavha, tshipembe ha Bethe Horoni ḽa Fhasi.

¹⁴ Masakha zwino a ṱutshela kha ḽiṅwe sia, a livha vhukovhela a tshi bva tshipembe ha thavha yeneyo, a livha Kiriathi Baali (ndi Kiriathi Jiarimu), muṅwe muḓi wa tsinde ḽa Juda. Hayo ndi one masakha a thungo ya vhukovhela.

¹⁵ Masakha a thungo ya tshipembe o thoma lumemeni lwa Kiriathi Jiarimu a livha Zwisimani zwa Nefethua.

¹⁶ U bva henefho a tsela tsindeni ḽa thavha yo ingamelaho Govha ḽa Hinomu hune Govha ḽa Vharefai ḽa guma hone thungo ya devhula. Zwino a livha tshipembe a tshi buḓekanya Govha ḽa Hinomu, tshipembe ha muṱoḓo wa Vhajebusi a tshi ya Eni Rogele.

¹⁷ Zwino a livha devhula a tshi ya Eni Shemeshe, a konou livha Gelilotho, u lavhelesana na Phara ya Adumimu. Ayo masakha zwino a tsela Tomboni ḽa Bohani (Bohani ndi ṅwana wa Rubeni),

¹⁸ a fhira nga thungo ya devhula ya muṱoḓo wo ingamelaho govha ḽa Jorodani. U bva henefho a tsa a dzhena govhani,

¹⁹ a fhira thungo ya devhula ya muṱoḓo wa Bethe Hogola, a fhelela mulomoni wa devhula wa Lwanzhe lwa Muṋo, hune mulambo wa Jorodani wa shela hone. Ndi one masakha a thungo ya tshipembe.

²⁰ Jorodani wo vha one masakha a vhubvaḓuvha. Ndi one masakha a shango ḽe ḽa kovhelwa miṱa ya tsinde ḽa Benyamini uri ḽi vhe ḽavho, zwi tshi tevhedza miṱa yavho.

²¹ Miḓi ya miṱa ya tsinde ḽa Benyamini yo vha i Jerikho na Bethe Hogola na Govha ḽa Ketsitsi

²² na Bethe Araba na Tsemaraimi na Bethele

²³ na Avimu na Phara na Ofra

²⁴ na Kuḓi kwa Amoni na Ofini na Geba. Ndi miḓi ya 12, khathihi na ḓorobo dzo i tangaho.

²⁵ Ha dovha ha vha na Gibioni na Rama na Bierotho

²⁶ na Mitsipha na Khefira na Motsa

²⁷ na Rekeme na Iriphiele na Tharala

²⁸ na Tsela na Haelefe na Jebusi (ndi Jerusalema) na Gibia na Kiriathi Jiarimu. Ndi miḓi ya 14, khathihi na ḓorobo dzo i tangaho. Ndi ḽone shango ḽe tsinde ḽa Benyamini vha kovhelwa ḽone uri ḽi vhe ḽavho, zwi tshi tevhedza miṱa yavho.