JOSHUA 16 - BIVHILI KHETHWA Mafhungo Madifha

Efraimi na Manase Vhukovhela

¹ Masakha a tshipembe a shango ḽe ḽa kovhelwa vhaḓuhulu vha Josefa o thoma Jorodani tsini ha Jerikho, vhubvaḓuvha ha zwisima zwa Jerikho, a ya phangani. A ṱuwa Jerikho a gonya mabama a swika Bethele.

² U bva Bethele a livha Lusi, a fhirela Atarotho, he ha vha hu tshi dzula Vhaarakhi.

³ U bva henefho a livha vhukovhela, shangoni ḽa Vhajafulethi, u swika shangoni ḽa Bethe Horoni ḽa Fhasi. U bva henefho a livha Gezere a guma Lwanzheni lwa Phandamashango.

⁴ Vhaḓuhulu vha Josefa, vha matsinde a Efraimi na Manase, vho kovhelwa shango ḽeneḽo ḽa vha ḽavho.

Efraimi

⁵ Shango ḽa Efraimi ḽo vha heḽi zwi tshi tevhedza miṱa yavho: Masakha avho o thoma Atarotho Adara a livha vhubvaḓuvha a swika Bethe Horoni ḽa Nṱha,

⁶ u bva henefho a livha Lwanzheni lwa Phandamashango. Mikhimithathi vho vha vha tshi hu sumbela devhula. Vhubvaḓuvha ha henefho masakha a kombamela Thaanathi Shilo, a hu fhira nga vhubvaḓuvha a livha Janua.

⁷ Zwino a tsa a tshi bva Janua a livha Atarotho na Naara, a swika Jerikho a guma mulamboni wa Jorodani.

⁸ Masakha a livha vhukovhela u bva Thaphua a tshi ya Kudamboni kwa Kana a guma Lwanzheni lwa Phandamashango. Ndi ḽone shango ḽe ḽa kovhelwa tsinde ḽa Efraimi uri ḽi vhe ḽavho zwi tshi tevhedza miṱa yavho,

⁹ zwa katela na dziṅwe ḓorobo na miḓana ye ya vha i ngomu ha masakha a Manase, ye ya vha yo kovhelwa vha Efraimi.

¹⁰ Huno a vho ngo thatha Vhakanana vhe vha vha vha tshi dzula Gezere, avho Vhakanana vho ḓi dzula na vha Efraimi u swika na ṋamusi, vho tou kombetshedzwa u shuma vhe phuli.