JOSHUA 14 - BIVHILI KHETHWA Mafhungo Madifha

U kovhekanywa ha shango vhukovhela ha Jorodani

¹ Ngovhu vhuṱanzi ha musi shango ḽa Kanana vhukovhela ha Jorodani ḽi tshi kovhekanywa Vhaisraele: Vhathu vho kovhekanywa nga tshifhe Eliasara na Joshua ṅwana wa Nunu na vhahulwane vha miṱa ya matsinde a Vhaisraele.

² Mashango a matsinde maṱanu na maṋa na hafu vhukovhela ha Jorodani o kovhiwa nga u ita mamvaṱe, nga he Muṋe washu a laya Mushe.

^3-4 Shango ḽa vhubvaḓuvha ha Jorodani Mushe o vha o no ḓi ḽi ṋea matsinde maṅwe mavhili na hafu yao. Vhaḓuhulu vha Josefa vho bva matsinde mavhili, Manase na Efraimi. Vhalivi vhone Mushe ho ngo vha ṋea mukovhe wa shango. Vhone vho tou ṋewa miḓi ya u dzula na pfulo ya kholomo na nngu dzavho.

⁵ Vhaisraele vho kovhekana shango nga he Muṋe washu a laya Mushe.

Khalebe a tshi thuba Hebroni

⁶ Muṅwe musi vhaṅwe vhathu vha tsinde ḽa Juda vha ḓa ha Joshua e Giligala. Muṅwe wavho, Khalebe ṅwana wa Jefune wa Mukenisi, a mu vhudza a ri, “Vha a zwi ḓivha vhone vhaṋe zwe Muṋe washu a vhudza Mushe muḓinḓa wa Mudzimu musi ri Kadeshe Barania a tshi amba nṋe na vhone Vho-Joshua.

⁷ Ndo vha ndi na miṅwaha ya 40 zwiḽa Mushe muḓinḓa wa Muṋe washu a tshi nthuma ndi Kadeshe Barania uri ndi ye u ṱola shango heḽi. Ndo mu fha vhuṱanzi vhu fulufhedzeaho.

⁸ Vhanna vhe nda ṱuwa navho vhone vho shushedza vhathu vha hashu, hone nṋe nda thetshelesa Muṋe washu Mudzimu wanga ndi tshi fulufhedzea.

⁹ Nge nda ita nga u ralo, Mushe o mpfulufhedzisa uri nṋe na vhana vhanga vhukumakuma ri ḓo wana shango ḽe nda kanda khaḽo ḽa vha ḽashu lini na lini.

¹⁰ Huno zwino, nga vha vhone, ho no ḓi fhela miṅwaha ya 45 tshee Muṋe washu a zwi vhudza Mushe. Ndi zwiḽa Vhaisraele vha tshi khou buḓekanya phanga, Muṋe washu a ita uri ndi ḓi tshila sa zwe a fulufhedzisa. Kha vha ntsedze! Ndi na miṅwaha ya 85,

¹¹ ndi kha ḓi vha na nungo ṋamusi unga zwiḽa Mushe a tshi nthuma. Ndi kha ḓi vha na nungo dza u kona u ya nndwani kana dza u ita tshiṅwe na tshiṅwe.

¹² Zwino-ha, nga vha mphe shango heḽo ḽa muvhundu ḽe Muṋe washu a mpfulufhedzisa musi houḽa we nṋe na vhanna vhanga ra ḓisa vhuṱanzi. Ro vha vhudza zwenezwo ra ri lushaka lwa miswonḓa lune lwa pfi Vhaanaki vha henefho, nahone miḓi yo tangedzwa nga mitsheṱo. Khamusi Muṋe washu u ḓo vha na nṋe, nda vha thatha vha ṱuwa, nga he Muṋe washu a amba.”

¹³ Joshua a shudufhadza Khalebe ṅwana wa Jefune a mu ṋea muḓi wa Hebroni wa vha wawe.

¹⁴ Hebroni u tshee wa vhaḓuhulu vha Khalebe ṅwana wa Jefune wa Mukenisi, nge a thetshelesa Muṋe washu Mudzimu wa Israele a tshi fulufhedzea.

¹⁵ Kale Hebroni wo vha u tshi pfi Muḓi wa Araba. Araba o vha e ene munna muhulwane kha Vhaanaki. Zwenezwo henefho shango ḽa lala.