JOSHUA 12 - BIVHILI KHETHWA Mafhungo Madifha

Mahosi e a kundwa nga Mushe

¹ Vhaisraele vho vha vho no ḓi kunda shango ḽa vhubvaḓuvha ha Jorodani vha dzula khaḽo, u bva govhani ḽa Arinoni u gonya na govha ḽa Jorodani, u swika thavhani ya Heremoni thungo ya devhula.

² Mahosi e vha kunda ndi mavhili, muṅwe o vha Sihoni, khosi ya Vhaamori we a vha a tshi vhusa Hesheboni. Muvhuso wawe wo vha wo angaredza na hafu ya Giliadi: u bva Aruere, lumemeni lwa govha ḽa Arinoni, na muḓi u re vhukati ha govha ḽeneḽo, u vhuya u swika mulamboni wa Jaboko, masakhani a Amoni;

³ wa angaredza govha ḽa Jorodani u bva dzivhani ḽa Khinirethe tshipembe, u swika Bethe Jeshimotho, vhubvaḓuvha ha Lwanzhe lwa Muṋo, u livha tsindeni ḽa thavha ya Phisiga.

⁴ Vha kunda na Ogo khosi ya Bashani. Ndi ene wa u fhedza wa Vharefai; o vha a tshi vhusa Ashtharotho na Edrei.

⁵ Muvhuso wawe wo vha u tshi angaredza na thavha ya Heremoni na Salekha na ḽoṱhe ḽa Bashani u swika mikanoni ya Geshuru na Maakha, khathihi na hafu ya Giliadi u swika shangoni ḽa Sihoni khosi ya Hesheboni.

⁶ Mahosi hayo mavhili o kundwa nga Mushe na Vhaisraele. Mushe muḓinḓa wa Muṋe washu o dzhia mashango avho a a ṋea matsinde a Rubeni na Gadi na hafu ya tsinde ḽa Manase uri ḽi vhe ḽavho.

Mahosi e a kundwa nga Joshua

⁷ Joshua na Vhaisraele vhone vho kunda mahosi oṱhe shangoni ḽa vhukovhela ha Jorodani, u bva Baali Gadi govhani ḽa Libanoni u swika thavhani ya Halaka thungo ya tshipembe tsini ha Seiri. Joshua iḽo shango o ḽi kovhekanya matsinde a Israele, a vha ṋea uri ḽi dzule ḽi ḽavho.

⁸ Mukovhe hoyo wo vha u tshi angaredza na shango ḽa mivhundu na midavhini i re tsini ha lwanzhe na govha ḽa Jorodani na midavhi yaḽo na Negeve. Shango heḽo ḽo vha ḽi tshi dzula Vhahithi na Vhaamori na Vhakanana na Vhapherisi na Vhahivi na Vhajebusi.

⁹ Vhaisraele vho kunda mahosi a miḓi hei: Jerikho na Ai tsini ha Bethele

¹⁰ na Jerusalema na Hebroni

¹¹ na Jaramuthu na Lakhishi

¹² na Egiloni na Gezere

¹³ na Debiri na Gedere

¹⁴ na Horoma na Aradi

¹⁵ na Libina na Adulamu

¹⁶ na Makeda na Bethele

¹⁷ na Thaphua na Hefere

¹⁸ na Afeke na Lasharoni

¹⁹ na Madoni na Hatsoro

²⁰ na Shimironi Meroni na Akhashafu

²¹ na Thaanakha na Megido

²² na Kedeshe na Jokoniamu kha ḽa Kharamele,

²³ na Doro tsini ha lwanzhe, na Goimi kha ḽa Galelia

²⁴ na Thiritsa. Mahosi vhoṱhe vho ṱangana ndi 31.