JONASI 3 - BIVHILI KHETHWA Mafhungo Madifha

Jonasi a tshi vho ya Ninive

¹ Muṋe washu a dovha a amba na Jonasi a ri,

² “Takuwa, iya muḓini uḽa muhuluhulu wa Ninive, u vha ḓivhadze zwine nda u vhudza.”

³ Jonasi a thetshelesa ipfi ḽa Muṋe washu a takuwa a livha Ninive. Zwino Ninive wo vha u muḓi muhuluhulu, muthu a tshi tshimbila a fhedza maḓuvha mararu a konou u buḓekanya.

⁴ Jonasi a dzhena muḓini, a tshimbila lwendo lwa ḓuvha ḽithihi. A ḓivhadza a ri, “Ho sala maḓuvha a 40 fhedzi muḓi wa Ninive u tshi phusukanywa.”

⁵ Vhathu vha Ninive vha tenda Mudzimu. Vha ḓivhadza uri vhathu vha ḓidzime, vha ambare madzanganda, u thoma nga muhuluhulu u swika nga muṱukuṱuku.

⁶ Mafhungo ayo a swika ha khosi ya Ninive; a tsa kha khuluṋoni yawe, a bvula khanzu yawe, a ambara madzanganda, a dzula milorani.

⁷ Khosi ya ḓivhadza hoṱhe Ninive ya ri, “Hoyu ndi mulayo wa khosi na magota awe: Vhathu na phukha, masambi a kholomo na a nngu, zwi songo vhuya zwa thetshela tshithu, hu songo ḽiwa, hu songo nwiwa maḓi.

⁸ Vhathu na phukha zwoṱhe zwi ambare madzanganda. Muṅwe na muṅwe a rabele Mudzimu nga hune a kona, muṅwe na muṅwe a laṱe maitele awe mavhi na vhutshinyi hoṱhe he a ita.

⁹ Khamusi Mudzimu a nga kha ḓi ri litsha a ri khathutshela, a si tsha ri sinyutshela zwingafhangafha, ra si lovhe. Zwi ḓihwa nga nnyi?”

¹⁰ Mudzimu a vhona u ḓidina havho vha tshi laṱa maitele mavhi, a vha khathutshela, a si tsha vha phusukanya unga o amba.