JOHANISI 5 - BIVHILI KHETHWA Mafhungo Madifha

Yesu a tshi fhodza muthu nga Sabatha

¹ Hu sa athu fhela tshifhinga tshilapfu ha vha na vhuṱambo ha Majuda, Yesu a gonya Jerusalema.

² Zwino Jerusalema hu na isha ḽi re na maguḓa maṱanu, henefho tsini ha khoro i no pfi Khoro ya Nngu. Ḽeneḽo isha nga luambo lwa Majuda ḽi pfi Bethesda.

³ Maguḓani eneo ho vha ho lala vhalwadze vhanzhi, hu tshi ri mabofu, he zwihole, na vho omaho miraḓo. [Vho vha vho lindela maḓi a tshi seluwa,

⁴ ngauri muruṅwa wa Muṋe washu o vha a tshi ḓi ḓa a dzhena ishani ḽeneḽo a ritha maḓi, huno mulwadze wa u thoma u dzhena maḓini o vha a tshi fhola naho e na vhulwadze vhufhio.]

⁵ Henefho ho vha hu na muṅwe munna we a vha o no fhedza miṅwaha ya 38 a tshi lwala.

⁶ Yesu a mu vhona o lala henefho, a ḓivha uri muthu uyo ho no fhela miṅwaha a tshi lwala. A amba nae a ri, “Ni a funa u fhola naa?”

⁷ Uyo mulwadze a fhindula a ri, “Muṋe wanga, ndi kundwa wa u nkhwalela maḓini musi a tshi seluwa; ndi tshi kha ḓi ri ndi a dzhena, muṅwe u vha o no dzhena kale.”

⁸ Yesu a ri, “Takuwani ni hwale thovho yaṋu ni tshimbile.”

⁹ Kathihi fhedzi uḽa munna a mbo ḓi fhola, a doba thovho yawe, a tshimbila. Ḽo vha ḽi ḓuvha ḽa Sabatha.

¹⁰ Vhahulwane vha lushaka vha vhudza uyo munna o fhodzwaho vha ri, “Ṋamusi ndi Sabatha, Mulayo a u tendi ni tshi hwala thovho yaṋu.”

¹¹ Ene a fhindula a ri, “Munna we a mphodza ndi ene we a ri ndi hwale thovho yanga ndi tshimbile.”

¹² Vha mu vhudzisa vha ri, “Nṋa ndi nnyi onoyo we a ri ni hwale thovho yaṋu ni tshimbile?”

¹³ Zwino uyo munna we a fhodzwa o vha a sa ḓivhi we a mu fhodza, ngauri ho vha hu na vhathu vhanzhi henefho, Yesu a xela-xela vhukati havho.

¹⁴ Ngavhuya Yesu a ṱangana nae thembeleni, a mu vhudza a ri, “Vhonani zwino no fhola, ni mbo ḓi laṱa vhutshinyi haṋu uri ni sa vho ḓo ḓelwa nga zwi fhiraho zwiḽa.”

¹⁵ Ndi hone uyo munna a tshi mbo ḓi ya a vhudza vhahulwane vha Majuda uri we a mu fhodza ndi Yesu.

¹⁶ Vhone vha mbo ḓi thoma u sala Yesu murahu nge a ḓi zwi ita nga Sabatha.

¹⁷ Yesu a vha vhudza a ri, “Khotsi anga u shuma tshifhinga tshoṱhe, na Nṋe ndi dzula ndi tshi shuma.”

¹⁸ A tshi ralo vhahulwane vha Majuda vha vho tou ṋaṋa kha ḽa uri vha a mu vhulaha; ngauri o thoma a nyadza Sabatha, a vho dovha a ri Mudzimu ndi Khotsi awe vhukuma, ha vha u ḓieḓanyisa na Mudzimu.

Maanḓa ane Murwa a vha nao

¹⁹ Yesu a vha vhudza a ri, “Zwino ipfani-ha: Murwa ha koni u ita tshithu nga eṱhe; u ita zwenezwo fhedzi zwine a vhona Khotsi awe a tshi ita. Murwa u ita zwenezwo zwine Khotsi a ita,

²⁰ ngauri Khotsi u funa Murwa nahone u mu sumbedza zwoṱhe zwine Ene a ita. U kha ḓi ḓo mu itisa zwihulu zwi fhiraho hezwi, inwi na ḓo sala no kanuka.

²¹ Ndi uri unga Khotsi a tshi vusa vhafu vha dovha vha tshila, na Murwa u ṋea vhutshilo onoyo ane a funa u mu ṋea.

²² Nahone Khotsi ha haṱuli muthu, maanḓa oṱhe a u haṱula o a kumedza Murwa

²³ uri vhoṱhe vha hulise Murwa nga hune vha hulisa Khotsi ngaho. A sa hulisi Murwa u nyadza Khotsi we a mu ruma.

²⁴ “Zwino ipfani-ha: ane a thetshelesa maipfi anga, a tenda zwa we a nthuma, u na vhutshilo vhu sa gumi. Onoyo ha tsha haṱulwa, o bva lufuni a pfukela vhutshiloni.

²⁵ Thetshelesani ndi ni vhudze: Hu ḓo ḓa tshifhinga – na zwino tsho no ḓi swika – tshine vhafu vha ḓo pfa ipfi ḽa Murwa wa Mudzimu, huno vhenevho vhane vha ḽi pfa vha ḓo tshila.

²⁶ Vhunga Khotsi e Muṋe wa vhutshilo, o ita uri na Murwa a vhe Muṋe wa vhutshilo.

²⁷ O kumedza Murwa maanḓa a u haṱula, ngauri Murwa ndi Ene Mubebwa-nga-muthu.

²⁸ Hezwi zwi songo ni kanukisa; tshifhinga tshi khou ḓa tshine vhafu vha ḓo pfa ipfi ḽawe

²⁹ vha bva zwaloni zwavho; vho itaho zwivhuya vha ḓo vuwa vha tshila, hone vho itaho zwivhi vha ḓo vutshela u laṱwa.

Zwi ṱanzilelaho Yesu

³⁰ “Nṋe a thi koni u ita tshithu nga ndoṱhe; ndi haṱula nga hune Mudzimu a ri ndi haṱule ngaho. Ndi tshi haṱula a thi na tshiṱalula, ngauri a thi iti zwine nda funa Nṋe muṋe, ndi ita zwi funwaho nga we a nthuma.

³¹ “Arali nda nga tou ḓiṱanzilela Nṋe muṋe, zwine nda amba zwi nga si kone u ṱanganedzwa vhu vhuṱanzi ha ngoho.

³² Hone ane a nṱanzilela u hone, huno ndi a ḓivha uri vhuṱanzi hawe ndi ha ngoho.

³³ Hufha inwi vhaṋe no ḓi vhuya na ruma vhaḓinḓa vhaṋu ha Johanisi, ene a ḓi ṱanzilela o imela ngoho!

³⁴ U ralo ndi sa ambi uri Nṋe ndi lila vhuṱanzi ha muthu; ndi itela uri inwi ni tshidzwe.

³⁵ Johanisi o vha luvhone lune lwa duga lu tshi vhonetshela, inwi na fhedza tshifhinganyana ni tshi kha ḓi takalela u vhonetshelwa ngae.

³⁶ Huno-ha Nṋe ndi na vhuṱanzi vhune ha fhira ha Johanisi: Mishumo ine nda ita ndi tshi khunyeledza zwe nda laedzwa nga Khotsi anga, ndi yone i nṱanzilelaho ya sumbedza uri ndi Ene o nthumaho.

³⁷ Na Ene Khotsi we a nthuma u a nṱanzilela. Inwi a ni athu vhuya na pfa ipfi ḽawe, na tshifhaṱuwo tshawe a ni athu tshi vhona,

³⁸ na ipfi ḽawe a ni ḽi vhulungi mbiluni dzaṋu; hufha ni sa tendi ipfi ḽa onoyo we Khotsi a mu ruma.

³⁹ Ni fhenḓa Maṅwalo ni tshi ri ni ḓo wana vhutshilo vhu sa gumi khao, ngeno eneo Maṅwalo a tshi amba Nṋe!

⁴⁰ Naho zwo ralo, a ni funi u ḓa kha Nṋe na wana vhutshilo.

⁴¹ “A thi khou lila u khoḓwa nga vhathu.

⁴² Ndi u tou ri inwi ndi a ni ḓivha; mbiluni dzaṋu u funa Mudzimu a zwiho.

⁴³ Nṋe ndo ḓa ndó rumiwa nga Khotsi anga, inwi na si nṱanganedze, hone ha ḓa muṅwe o tou ḓiḓisa, ni ḓo ṱanganedza ene.

⁴⁴ Vha no nga inwi ni nga tenda hani mafhungo a Mudzimu? Hufha ni tshi funa u khoḓana nga tshaṋu ni sa funi u khoḓwa nga Ene a re Mudzimu e eṱhe!

⁴⁵ Hone ni songo vhona unga Nṋe ndi ḓo ni hwelela ha Khotsi anga; ane a ni hwelela ndi Mushe, onoyo ane na pikisa ene.

⁴⁶ Ngavhe ni vhe no tenda zwe Mushe a amba ndi musi no tenda na zwanga; hufha ene o ṅwala nga Nṋe.

⁴⁷ Zwino vhunga ni sa tendi zwe a ṅwala, maipfi anga ni nga a tenda hani?”