JOBO 8 - BIVHILI KHETHWA Mafhungo Madifha

Maipfi a khonani ya vhuvhili: “Ni vhone!”

¹ Bilidadi:

² Ni ḓo amba u swika lini, na fhedza nyambo yaṋu i no nga muya u tshi vumuludza?

³ Mudzimu a nga rwa muthu nga ṱhamu i songo mu teaho naa? Ramaanḓaoṱhe a nga shanda zwi re zwone naa?

⁴ Ngoho a hu shayi tshe vhana vhaṋu vha mu dina ngatsho, o tou vha rwa a tshi tevhedza vhutshinyi havho.

⁵ Zwino inwi ṱoḓani zwine Mudzimu Ramaanḓaoṱhe a zwi funa, ni mu luvhelele.

⁶ Arali no kuna, ni si na vhufhura, u ḓo takuwa a ni imelela, a ni pfufha nga zwo ni teaho.

⁷ Lupfumo lwaṋu lwe lwa fhalala a lu nga vhuyi lwa vha tshithu lu tshi vhambedzwa na zwine Mudzimu a ḓo ni ṋea.

⁸ Edzonu vhudzisa vhuṱali ha vha kale, ni pfe zwe vhokhotsi avho vha vhona.

⁹ Riṋe vhana vha mulovha, a ri ḓivhi tshithu; vhutshilo hashu fhano fhasi a vhu yi thambo, vhu fhira unga murunzi.

¹⁰ Litshani vhaṱali vha kale vha ni funze; thetshelesani zwine vha amba, vha ri,

¹¹ “Ṱhanga dzi nga mela hu si na maḓi? Madzhesi a nga wanala hu si na maṱafa?

¹² Maḓi a vhuya a xa, ndi dzone dzi no thoma u puta, dzi sa athu vhibva uri dzi hwivhiwe.”

¹³ Vha no hangwa Mudzimu vha nga ṱhanga dzenedzo: Vha no nyadza Mudzimu a vha wani zwe vha fulufhela.

¹⁴ Zwine vha fulufhela ndi mahandana fhedzi; zwi nga muḓali wa lubuvhi.

¹⁵ Vha ḓitika nga lubuvhi – lu nga vha tika naa? Vha farelela muḓali – vha nga gogoḓela ngawo naa?

¹⁶ Vhavhi vha navha unga ṱhanga tshedzani, minavhela ya ṱanganya tsimu,

¹⁷ midzi yayo ya tanda matombo, ya ṱoka lutomboni.

¹⁸ Edzou tupula – a hu na a no ḓo zwi ḓivha uri yo vhuya ya vha hone.

¹⁹ Vhonani, hoyo ndi wone muḓifho wa vhavhi: Hu ḓa vhaṅwe vha vha dzhiela vhudzulo.

²⁰ Hone vha sa solisei Mudzimu ha vha furaleli; vhaitazwivhi na vhone ha vha tiki.

²¹ U ḓo ita uri ni dovhe ni see, ni ṱavhe mukosi nga dakalo.

²² Vhane vha ni vhenga vha ḓo tou niwa nga ṱhoni; mahaya a vhavhi a ḓo nyamalala.