JOBO 7 - BIVHILI KHETHWA Mafhungo Madifha

Mukosi wa Jobo: “Ndi mini Mudzimu a sa nkhumeli?”

¹ Vhutshilo ha muthu ndi nndwa ya mukumuṱelo, ndi mushumo u lemelaho wa pfarela-u-lila;

² vhu nga phuli i no swa nga ḓuvha ya si dzule murunzini, vhu nga mushumi o lindela malamba awe.

³ Na nṋe ndo kovhelwa zwo raloho: Miṅwedzi i tshi ḓi ṱanḓulukana a thi tshileli tshithu; vhusiku vhu tshi ḓi tevhekana vhu ḓisa maṱungu fhedzi.

⁴ Ndi tshi yo lala ndi ri, “Ḽi tsha lini?” A ḽi tshi, ndi lala ndi tshi vhumbuluwa, mapfuvhi a vhuya a tswuka.

⁵ Muvhili wanga wo ḓala mbungu, wo phapha makwanda, lukanda lwanga lu bva vhulwa.

⁶ Maḓuvha anga a gidima u fhira nzhara ya muluki; a fhela ndo fulufhuwa.

⁷ Mudzimu, u songo hangwa uri vhutshilo hanga vhu tou vha mufemo, a thi tsha ḓo dovha nda vhona zwivhuya.

⁸ Zwino u a mmbona, a u tsha ḓo mmbona: u tshi nṱoḓa u ḓo wana ndi si tsheeho.

⁹ Muthu a fa ha tsha vhuya; u nga gole ḽine ḽa balangana, ḽa mbo ḓi nyamalala;

¹⁰ ha tsha humela nḓuni yawe; u a hangwiwa.

¹¹ Ndi zwine nda nga si fhumule! Ndi amba ndi tshi pfa vhuṱungu; ndi gungula ndi tshi ḽa mbilu.

¹² Mudzimu, ndi mini u tshi dzula wo nndinda? Kani ndi nṋe lwanzhe u tshi mmbetshela mukano? Ndi nṋe buka ḽa lwanzhe kani?

¹³ Ndi tshi ri ndi lale ndi awele, vhuṱungu vhu dzike,

¹⁴ u ntshushedza nga miloro, wa nnyofhisa nga mabono.

¹⁵ Ngavhe ndi tshi tshipwa zwanga nda fa, u fhira u tshila nda tambula.

¹⁶ Ndo ṱovhowa, vhutshilo ho nnetisa; nnditshe, hufha vhutshilo hanga vhu tshi tou vha mufemo.

¹⁷ Muthu ndi mini u tshi vhuya wa ḓidina ngae? Ndi mini u tshi mu dzhenisa mbiluni?

¹⁸ Ḽi tshi tsha u a mu ṱola, wa dzulela u mu linga.

¹⁹ A u edzou lavhelesa thungo nda mila-vho mare?

²⁰ Arali ndo tshinya, Iwe ndo u itani? Ndi amba Iwe mulindi wa vhathu! Ndi mini u tshi nnyita tshipfulwa tshau? Kani ndo no vha muhwalo wau?

²¹ A thi hangwelwi zwanga vhutshinyi hanga naa? Vhuvhi hanga a u tsinyi iṱo wa vhu hangwa naa? Hufha ndi tshi ḓo ṱuwa ndi tshi yo lala mavuni; u ḓo nṱoḓa, nda vha ndi si tsheeho!