JOBO 6 - BIVHILI KHETHWA Mafhungo Madifha

Phindulo ya Jobo: “Ndo hanganea!”

¹ Jobo:

² Arali mbilaelo dzanga dzi tshi nga kaliwa, khombo dzanga dza kuvhanganywa dza vhewa nṱha ha tshikalo,

³ dzo vha dzi tshi ḓo lemela u fhira muṱavha wa lwanzhe; ndi zwine nda sokou amba ndi sa humbuli.

⁴ Ramaanḓaoṱhe o mpfula nga misevhe; vhutulu hayo ho ḓala muvhili wanga, ha nṱanganya ṱhoho; ndo thathedzwa nga zwi ofhisaho zwa Mudzimu.

⁵ Mbiḓi i nga kuma yo wana pfulo naa? Phulu yo fura i nga vhomba kani?

⁶ Huno ndi nnyi ane a nga ḽa zwiḽiwa zwi sa ḓifhi, zwí songo lungwa muṋo? Bwindi ḽitshena ḽa gumba ḽi ḓifhelafhi?

⁷ Nṋe zwine nda nuswa nga Mudzimu a thi zwi tami; zwoṱhe zwine nda kapudzwa zwi a nnengisa.

⁸ Ngavhe zwe nda humbela zwi tshi pfiwa, Mudzimu a nṋee zwe nda zwi lavhelela,

⁹ a mbo ḓi mphedzisa zwanga nandi! Khezwi a sa angaladzi tshanḓa a mbo ḓi nndozwa!

¹⁰ Ngavhe a tshi tou ralo, ndo vha ndi tshi ḓo fhufha nda ṋanzwa makole nga dakalo, nangwe vhuṱungu vhu sa konḓelelei, tenda maipfi a Ene Mukhethwa ndí songo vhuya nda a landula.

¹¹ Nungo dza u konḓelela ndi dzi wanafhi? Hufha ndo no ṱovhowa!

¹² Kani ndo vhumbwa nga tombo? Muvhili wanga ndi tshirongana kani?

¹³ A thi tshee na nungo dzine nda nga tshila ngadzo; na ane a nga ntika a hu na.

¹⁴ Khomboni yo raliho hu ṱoḓea khonani dzi fulufhedzeaho, uri muthu a sa ḓo ṱamba Ramaanḓaoṱhe,

¹⁵ hone inwi khonani dzanga ni a nndaṱedza; ni nga milambwana ine ya xa musi mvula i sa ni.

¹⁶ Gabugu na tshifhango zwi tshi ṋoka, zwi ḓadza milambwana ya tou fhalala;

¹⁷ hone ḽa fhisa zwi a nyamalala, magovha a sala e swoto, o oma.

¹⁸ Vhaendi vha pambuwa nḓilani dzavho vha yo ṱoḓa maḓi, vha gonya na milambwana, vha fa nga ḓora.

¹⁹ Vhaendi vha Thema vha ṱoḓa maḓi khayo; vhavhambadzi vha Saba vha sedza vho fulufhela,

²⁰ hone vha si wane tshithu; vha wana yo xa, vha ṱovhowa.

²¹ Inwi ndi vhona ni tshi nga milambwana yeneyo: ni ri u vhona khombo yo nngwela na huma nga tsha murahu nga nyofho.

²² Kani ndo ni humbela tshifhiwa? Ndo ri ni mmvisele tshanḓanguvhoni kani?

²³ Ndo vhuya nda ri, “Nndamuleleni kha swina ḽanga” naa? Kani ndo vhuya nda ri, “Nthengululeni kha ḽivemu”?

²⁴ Ndi zwone, mpfunzeni-ha! Mmbudzeni vhukhakhi hanga. Ndi ḓe tshete nda ni thetshelesa.

²⁵ Ngoho i a vhavha, hone zwine inwi na amba a zwi pfali.

²⁶ Kani ni ṱoḓa u nkaidzela zwe nda amba, maipfi a muthu o ṱovhowaho na a ita muya?

²⁷ Ni ḓo ṱuwa ni tshi itela tsiwana madeṅwa, na rengisa khonani yaṋu.

²⁸ Ntsedzeni tshifhaṱuwo: ngoho a thi zwifhi!

²⁹ Nkhumeleni, ni songo nkhaṱhulela u laṱwa ndi si na mulandu; nṋe ndi ngohoni!

³⁰ Ḽivhi ḽe nda vhuya nda ḽi amba ndi ḽifhio? Mulomo wanga wá amba vhuvhi ndi nga si zwi pfe naa?