JOBO 5 - BIVHILI KHETHWA Mafhungo Madifha

¹ Jobo, huwelelani, ni pfe arali hu na ane a fhindula. Kani hu na muruṅwa ane na ḓitika ngae?

² Ngoho mbilaelo dzi vhulaha a si na ṱhalukanyo; mbiti dzi vhulaha a si na nzhele.

³ Nṋe ndo no vhona tsilu ḽi tshi ṱoka midzi, hu si kale nnḓu yawe ya teketelwa.

⁴ Vhana vhawe a vha wani vhushavhelo, vha haṱulwa khoroni vha si vhe na mulamukisi.

⁵ Vha shayaho zwiḽiwa vha ḓo ḽa zwe a kaṋa; vha ḓo kaṋa na o tshotshelwaho nga mipfa; vha re na ḓora vha ḓo emula lupfumo lwawe vha tou lu phaga.

“Rembulutshela ha Mudzimu!”

⁶ Vhuvhi a vhu meli mavuni, na khombo a i rungi i tshi bva muṱavhani na kathihi;

⁷ muthu ene muṋe u ḓiovhela khombo, zwa nga ṱhase dzi tshi thamuwa dzi tshi bva muliloni.

⁸ Ngavhe i vhe nṋe ndi musi ndo rembulutshela ha Mudzimu, nda mu suma mafhungo anga.

⁹ A ri koni u ṱalukanya mishumo yawe mihulu; maḓembe awe ha fheli.

¹⁰ Shango u ḽi nisela mvula, a sheledza masimu.

¹¹ Ee, ndi Ene a no hulisa vha no ḓiṱukufhadza, vha lilaho a vha takadza.

¹² U piringanya maano a vha vhukwila, uri zwe vha luka zwi si pfumbe;

¹³ a fasha vhaṱali nga maano avho, vhunwa havho ha kumbiwa.

¹⁴ Vha welwa nga swiswi maṱavhelo, masiari tshivhangalala vha phuphudzika ha nga ndi vhusiku.

¹⁵ Mudzimu Ene u tinyisa vhaheḓana pfumo ḽa vhadziavhunwa, u tsireledza vhashai vha si kandeledzwe;

¹⁶ u ṋea vhatshinyali fulufhelo, vhavhi a vha vala milomo.

¹⁷ Wa mashudu ndi uyo ane a kaidzwa nga Mudzimu, ni songo lamba Ramaanḓaoṱhe a tshi ni laya;

¹⁸ ndi Ene a no phula mbonzhe, a dovha a dzi fhodza; tshanḓa tshawe tshi a huvhadza, tsha dovha tsha rindidza.

¹⁹ Naho khombo dza anda hani, u ḓo u lamukisa wa si huvhale;

²⁰ ha wa nḓala u ḓo u tshidza wa si fe; ha vuwa nndwa u ḓo u pilela pfumo.

²¹ Naho vha u sasaladza nga ndimi dzi no nga ṱhamu, u ḓo u tsireledza, ndozwo i tshi ḓa wa si ofhe tshithu.

²² Hú na ndozwo na nḓala, iwe u ḓo sokou sea, wa si ofhe zwivhanda zwa ḓaka.

²³ U tshi lima, matombo a ḓo u sendelela, wa tshila nga mulalo na zwivhanda zwa ḓaka.

²⁴ Ndi hone u tshi ḓo tshila nḓuni yau u sa ofhi tshithu, u tshi vhala thakha yau wa wana hu si na yo xelaho.

²⁵ U ḓo vha na vhana vhanzhi; vha ḓo anda unga hatsi mafuloni.

²⁶ U ḓo dzhena tshaloni wo ranga u lalama wa shulwa muṱoḓo, wa nga goroi ine ya kaṋiwa yo vhibva.

²⁷ Jobo, hezwo ro zwi ṱoḓesesa ra zwi ḓivha, ndi ngoho; na inwi ni tshi zwi pfa ni zwi dzhiele nzhele.