JOBO 41 - BIVHILI KHETHWA Mafhungo Madifha

¹ U songo vhuya wa fulufhela uri u nga i kona; u tou i vhona fhedzi zwi kula nungo.

² A hu na muthu a re na tshiṱuhu tsha u thoma itsho tshivhumbwa tshanga, zwino ane a nga imedzana na Nṋe ndi nnyi?

³ Ndi nnyi ane a ri ndo ḽa mulandu wawe? Hufha zwoṱhe zwi re fhasi ha lutombo zwi zwanga.

⁴ A thi nga litshi u amba miraḓo ya ngweṋa, na nungo dzayo, na u naka ha tshivhumbeo tshayo:

⁵ Ane a nga i sutula mukumba ndi nnyi? Ndi nnyi ane a nga i longa ḓomo?

⁶ Mulomo wayo wo ḓala maṋo a ofhisaho; ndi nnyi ane a nga u ganulula?

⁷ Muṱana wayo wo phapha ngwasa dza makwanda a no nga zwiṱangu, zwo tou lukekana zwoṱhe,

⁸ makwanda a ṱumana lune muya wa si dzhene;

⁹ o nambatelana a tou kwakwana, ha fhandekanywi nga tshithu.

¹⁰ I tshi atsamula hu fhufha ṱhase; maṱo ayo o tswuka unga mapfuvhi;

¹¹ mulomoni wayo hu duga khavhu dza mulilo, ha thamuwa ṱhase;

¹² ningoni dzayo hu duba vhutsi, zwa nga hu khou vhila khali i no vhasedzwa nga ṱhanga;

¹³ i tshi fema hu bva masimbe, ha duga khavhu mulomoni wayo.

¹⁴ Nungo dzayo dzi mutsingani; vhoṱhe vha a i ofha vha tou tetemela;

¹⁵ ṋama dzayo dzo tou vhofhekana; dzo tou te, a dzi sudzuluwi;

¹⁶ khana yayo yo khwaṱha unga tombo, i nga lwala.

¹⁷ Ya vuwa, vha maanḓa na vhone vha a ofha; ya ritha maḓi vha huma nga tsha murahu.

¹⁸ Pfumo ḽa poswa ḽi nga itani? Hu banga, hu tsanga, hu musevhe, a zwi i iti tshithu.

¹⁹ I vunḓa tsimbi unga ṱanga, musinaseṱha i vhona ḽi vongori;

²⁰ i tshi vhona musevhe a i shavhi, matombo a gatho ya vhona e mathukhwi;

²¹ mugopi i vhona u tshi nga ṱanga; vhathu vha tshi posa mafumo, i a sea;

²² makwanda a re thumbuni yayo a nga zwipali zwa khali, a sia mutalo matopeni unga tshilei;

²³ i selusa mativha unga khali i tshi vhila, a nga khali ya mapfura i tshi xaxara;

²⁴ ya tala, i sia mutalo u penyaho, wa vhona unga mativha a na mmvi.

²⁵ A hu na tshi no vhambedzwa nayo fhano fhasi; ndi tshisikwa tshi sa ofhi tshithu;

²⁶ i nyadza na phukha dzoṱhe khulwane; ndi yone khosi ya mabuka oṱhe.