JOBO 40 - BIVHILI KHETHWA Mafhungo Madifha

¹ Muṋe washu:

² Jobo, u funa u imedzana na Ramaanḓaoṱhe wa mu khakhulula naa? U funa u hanedzana na Mudzimu naa? Ndi zwone, mphindule!

³ Jobo a tshi fhindula:

⁴ A zwo ngo mpfanela. Ndi ḓo fhindula nda ri mini? Zwo ntsomela.

⁵ Hufha ndo no ḓi amba nda pfukisa, a thi tsha dovha.

Muṋe washu a tshi isa phanḓa u sumbedza Jobo maanḓa awe na vhuṱali hawe

⁶ Ndi hone Muṋe washu a tshi dovha a amba na Jobo e kha ḓumbu. Muṋe washu:

⁷ Edzou takuwa u ime wo khwaṱha sa munna: Nṋe ndi ḓo u vhudzisa mbudziso, iwe u mphindule.

⁸ Kani-ha u khou ṱoḓa u sumbedza uri a wo ngo khakha, mukhakhi ndi Nṋe, u ralo ha vha u thutha khaṱhulo yanga?

⁹ Maanḓa au a nga a Mudzimu naa? Ipfi ḽau ḽi nga bvuma unga ḽawe naa?

¹⁰ Ndi zwone, ḓiṱame nga vhuhulu na vhurena, u ambare vhugala na lupenyo.

¹¹ Edzou vhona vhadzia-u-ḓihudza: vha sinyutshele, u vha balanganye u vha ṱukufhadze.

¹² Edzou sedza vhadzia-u-ḓiḓivha, u vha nyadzise, he vha ima hone u mbo ḓi vha kuya!

¹³ Vha swiṱe vhoṱhe buseni; tiba zwifhaṱuwo zwavho tshaloni,

¹⁴ ndi hone na Nṋe ndi tshi ḓo u khoḓa, nda ri wo kunda nga maanḓa au.

Zwiṅwe zwiga zwa maanḓa a Mudzimu: Mvuvhu

¹⁵ Edzou vhona mvuvhu ye nda i vhumba u ḓi nga ndo vhumba iwe: I fula hatsi unga phulu.

¹⁶ Edzou vhona uri muṱoḓo wayo wo khwaṱha hani! Misipha ya thumbu yayo i na maanḓa mangafhani!

¹⁷ Mutshila wayo wo tou tswititi unga mukedara; tsinga dza tshizwa tshayo dzo tou tandekana;

¹⁸ marambo ayo ndi phaiphi dza musinaseṱha; mbabvu dzayo dzi nga mabaphathi a tsimbi.

¹⁹ I fhira miṅwe mishumo ya Mudzimu; i nga kundwa nga Muvhumbi wayo fhedzi.

²⁰ Hatsi vhune ya fula vhu mela mivhunduni, hune ha tamba phukha dza ḓaka.

²¹ I shuvhama fhasi ha mukhalu, ya dzumbama ṱhangani maṱafani.

²² I dzumbama henefho mirunzini yo tangiwa nga miṋengeledzi.

²³ Mulambo u tshi ḓala a i shavhi; yo tsireledzea naho maḓi a Jorodani a tshi nga i hambela.

²⁴ Ndi nnyi ane a nga phuphudza maṱo ayo, a i fara a i phulela muhala?

Ngweṋa

²⁵ U nga fasha ngweṋa nga tshilazwulo tsha khovhe naa? U nga vhofha lulimi lwayo nga thambo naa?

²⁶ U nga i longa muhala wa muṱaṱe naa? U nga phula ṱhaha dzayo nga huka ya mupfa naa?

²⁷ U vhona unga i ḓo dzula i tshi u luvhelela? I ḓo amba na iwe nga vhulenda naa?

²⁸ I ḓo pfana na iwe ya tenda uri i ḓo vha phuli yau tshoṱhe naa?

²⁹ U nga i fuwa unga tshiṋoni naa? U nga i hunga wa takadza ngayo vhasidzana naa?

³⁰ Vhavhambadzi vha ḓo i renga nga muṱaṱisano naa? Vha nga i kovhekanya vharengisi naa?

³¹ Misevhe ya huka i nga pfula mukumba wayo naa? Pfumo ḽa khovhe ḽi nga phula ṱhoho yayo naa?

³² Edzou vhea tshanḓa tshau khayo: I ḓo vha nndwa khulu; u nga si tsha dovha!