JOBO 4 - BIVHILI KHETHWA Mafhungo Madifha

Phindulano ya u thoma (4:1 – 14:22) Maipfi a khonani ya u thoma: “Mudengu ḓidengule!”

¹ Ndi hone Elifasi wa Themana a tshi fhindula. Elifasi:

² Jobo, arali nda amba zwi ḓo ni dina? Hone ndi nnyi ane a nga sokou konḓelela a si ambe tshithu?

³ Inwi no laya vhathu vhanzhi, na khwaṱhisa vho kuleaho nungo.

⁴ Maipfi aṋu o vha a tshi tika vha no wa, na khwaṱhisa magona a tepaho.

⁵ Zwino inwi nó welwa nga khombo a ni koni u konḓelela; yo ni tsikeledza na hanganea.

⁶ Hufha no vha ni tshi ofha Mudzimu ni sa solisei, zwino ni kundwa ngani u fulufhela uri u ḓo ni lamulela?

Muvhuya a nga welwa nga khombo naa?

⁷ Edzonou elekanya zwiṱuku: Ho no vhuya ha lovha a si na mulandu naa? A si na vhufhura o no vhuya a lozwiwa?

⁸ Nṋe ndi tshi sedza ndo vhona uri vhane vha lima vhuvhi, vha zwala khombo, vha kaṋa zwenezwo.

⁹ Mudzimu u vha lozwa o sinyuwa, vha lovha nga mbiti dzawe.

¹⁰ Vhavhi vha vhomba vha kuma unga dzindau, hone Mudzimu a vha vunḓa maṋo,

¹¹ vha fa unga ndau i tshi shaya tshine ya ponda, vhana vhavho vhoṱhe vha balangana.

Nzumbululo ya uri maṱoni a Mudzimu a hu na muvhuya

¹² Ndo dzumbululelwa ipfi tshiphirini; nḓevheni dzanga ho pfala tshihevhehevhe.

¹³ Vhukati ha vhusiku, vhathu vho ya nga khofhe vho tou mbwandaa, nṋe nda tshenuswa nga mabono,

¹⁴ nda farwa nga nyofho na u tetemela, marambo anga oṱhe a dzinginyea.

¹⁵ Khofheni hanga ha fhira muya, mavhudzi anga a takuwa nga nyofho.

¹⁶ Nda vhona tshiṅwe tshithu tsho ima henefho, nda ṱalela nda si ḓivhe uri ndi mini. Zwenezwo hu tshee he tshete, nda pfa ipfi ḽi tshi ri,

¹⁷ “Muthu a nga vha muvhuya maṱoni a Mudzimu naa? U hone ane a nga vhonala o ṱamba maṱoni a Muvhumbi wawe naa?

¹⁸ Hufha na vhalanda vhawe vha ṱaḓulu a sa vha fulufhedzi; na vharuṅwa u vhona vha tshi ṱahedza.

¹⁹ Ni vhona unga a nga fulufhedza tshivhumbwa tsha vumba, tshithu tshi no bva buseni, tshine tsha pwaṱuwa unga tshisusu?

²⁰ Muthu a nga ḓi vuwa a tshi khou tshila nga matsheloni, ḽi sa athu kovhela a mbo ḓi fa, a hangwiwa a si tsha humbulwa,

²¹ nnḓu yawe ya thuthwa, a fa a songo guda tshithu.”