JOBO 39 - BIVHILI KHETHWA Mafhungo Madifha

¹ U a ḓivha uri ngululu dzi dzwala lini? U a vhuya wa sedza phala i tshi dzwala ṋamana yayo?

² U a vhala miṅwedzi u swika dzi tshi dzwala? Tshifhinga tshadzo u a tshi ḓivha naa?

³ Dzi a tumba dza dzwala vhana vhadzo, maṱungu a u dzwala a mbo ḓi vha o fhela.

⁴ Vhana vhadzo vha aluwa vho khwaṱha ngei ḓakani, vha ṱuwa vha si tsha vhuya.

Mbiḓi

⁵ Ndi nnyi we a litsha mbiḓi ya sokou ḓitshimbilela? Ndi nnyi we a vhofholola thambo dzo i vhofhaho?

⁶ Ndo i ṋea soga uri ḽi vhe hayani hayo, nda i ṋea mavu a muṋo uri i dzule hone.

⁷ I sea vilinga ḽi re muḓini; na mukosi wa musi dzo pana a i u pfi.

⁸ I rambalala mivhunduni uri i wane pfulo, ya ṱoḓa mafulo madala.

Ṋari

⁹ Ṋari i ḓo tenda u u shumela naa? I ḓo lala dangani ḽau naa?

¹⁰ U nga i fara nga muhala ya lima naa? I nga u limela miṱanga naa?

¹¹ Nungo dzayo dzi ḓo u ṋeani? U nga i kumedza mishumo yau i lemelaho naa?

¹² U nga fulufhela uri i ḓo u kaṋela mavhele naa? Ya a kuvhanganya hune wa fhula hone naa?

Mphwe

¹³ Mphwe i ḓiphiṋa nga u ṱongisa phapha dzayo, hone a i fhufhi unga gololwane.

¹⁴ I kudzela makumba ayo fhasi, ya a alamela muṱavhani,

¹⁵ i sa londi uri i nga a pwasha nga milenzhe, na uri phukha dza ḓaka dzi nga a kandekanya.

¹⁶ I itela vhana vhayo tshiṱuhu, vha nga a si vhayo, ya si londe uri zwe ya shuma o vha e mahandana.

¹⁷ Mudzimu ho ngo i ṋea vhuṱali, ho ngo i kovhela ṱhalukanyo.

¹⁸ Nangwe zwo ralo, ya ṱharamudza phapha i a gidima; i sea bere na munameli wayo.

Bere

¹⁹ Bere i ṋewa nungo nga iwe naa? Mudzedze yo ambadzwa nga iwe naa?

²⁰ Ndi iwe u no ita uri i fhufhe unga nzie? I tshi ṱonga nga u fumula, zwi a ofhisa.

²¹ I ḓiphiṋa nga maanḓa ayo i tshi pala fhasi, ya tou fhinini nga luvhilo yo livha nndwani.

²² I sea nyofho, yone i sa ofhi tshithu; a i shoni pfumo.

²³ Mukutu u lila matungo ayo, pfumo na banga zwe vhai.

²⁴ I ḽa mavu yo nyanyuwa; phalaphala i tshi lila a i tsha dumbelwa.

²⁵ I tshi pfa lufhalafhala i a lila ya ri, “Ahaa!” I pfa munukho wa nndwa i tshee kule, ya pfa ndaela na mukosi wa nndwa.

Zwiṋoni

²⁶ Kani lurwanzhivha lu fhufha nga vhuṱali hau lu tshi ṱharamudza phapha lwo livha tshipembe?

²⁷ Goni ḽi tshi fhufhela nṱha ḽi vhudzwa nga iwe naa? Ndi iwe u no vhudza ḽianga uri ḽi fhaṱe tshiṱaha tshaḽo nṱha ha luwa naa?

²⁸ Ḽi dzula luwani vhusiku; ḽi dzumbama muṱumbani wa luwa;

²⁹ u bva henefho ḽi ḓiṱoḓela zwiḽiwa; maṱo aḽo a zwi vhona ḽi kule.

³⁰ Mafhondo aḽo a ḓiphiṋa nga malofha; ha vhulawa phukha, ḽi henefho.