JOBO 37 - BIVHILI KHETHWA Mafhungo Madifha

¹ Hezwo zwi karusa mbilu yanga, ya tou sinḓa, ya fhufha ya bva vhudzuloni hayo.

² Noṱhe thetshelesani zwavhuḓi Mudzimu a tshi vhomba! Ipfani a tshi amba ha tou bvuma!

³ U vhofholola lupenyo lwa buḓekanya lutombo, lwa ri vhenge u bva vhusendekamisi u swika vhusendekamisi;

⁴ zwenezwo ha pfala ipfi ḽawe ḽi tshi vhomba, a ri ngindii, ha pfala ipfi ḽawe ḽa maanḓa, na lupenyo a sa lu humisi hezwi ipfi ḽawe ḽi tshi bvuma.

⁵ Ipfi ḽa Mudzimu ḽi tshi bvuma hu itea zwimangadzo; u ita mishumo mihulu ine ra si i ṱalukanye.

⁶ U amba na gabugu a ri, “Wela fhasi!” a amba na mvula a ri, “Shulutshela fhasi hu tou pwaṱa!”

⁷ U imisa mishumo yoṱhe ya vhathu, uri vhathu vhoṱhe vha ḓivhe mishumo yawe.

⁸ Phukha dza ḓaka dzi yo dzumbama, dza dzula vhulaloni hadzo.

⁹ Maḓumbu a vuwa a tshi bva tshisikuni tshao, muya wa ḓa na murotho u lumaho,

¹⁰ mufemo wa Mudzimu u khaṱhisa maḓi, a oma a tou te.

¹¹ U panga makole maḓi a tou pha, a ruma lupenyo lwa buḓekanya lutombo,

¹² a rembulusa makole, a a sumba hune a ya, a ita zwoṱhe zwine Mudzimu a amba hoṱhe shangoni ḽoṱhe.

¹³ A nga ḓi nisa mvula a tshi itela u lozwa vhathu, kana u vha sumbedza vhuthu hawe, kana u ḓitakadza.

¹⁴ Vho-Jobo, nga vha thetshelese ndi vha vhudze: nga vha dzou elekanya zwimangadzo zwi itwaho nga Mudzimu.

¹⁵ Vha a ḓivha uri Mudzimu u langa hani makole, na uri u penyisa hani lupenyo lu tshi bva khao?

¹⁶ Vha a ḓivha uri a nembelela hani lutomboni? Zwimangadzo hezwo zwi itwa nga Ene a re na nḓivho yo khunyelelaho.

¹⁷ Zwino vhone khezwi na zwiambaro zwi tshi vha bvisa mabiko nga biso musi shango ḽoṱhe ḽo netiswa nga muya u bvaho phangani!

¹⁸ Mudzimu a tshi ṱharamudza lutombo lwa tou oma unga tshivhoni tsha tsimbi, vha nga mu farisa naa?

¹⁹ Vhone nga vha ri funze zwine ra fanela u vhudza Mudzimu. Riṋe a ri koni u hanedzana nae, ri swiswini.

²⁰ A nga vhudzwa ha pfi ndi ṱoḓa u amba? Muthu a nga tou ri kha ndi govhedzwe?

²¹ Zwino ndi nnyi ane a nga sedza ḓuvha ḽi tshi kombodza nga u rali ḽi lutomboni, lwó swielwa nga muya?

²² U ḓa a tshi bva devhula, e kha vhugala ha musuku; Mudzimu u ḓa o fuka lupenyo lu ofhisaho.

²³ Maanḓa a Ramaanḓaoṱhe ha swikelwi nga muthu; u haṱula a sa ṱaluli, u na vhuthu vhuhulu, ha kandeledzi muthu.

²⁴ Ndi zwine vhathu vha mu ofha. Vhoṱhe vhane vha ḓiita vhaṱali u a vhuya a vha londa naa?