JOBO 36 - BIVHILI KHETHWA Mafhungo Madifha

Elihu: “Khaṱhulo ya Mudzimu a i khakhi.”

^1-2 Vha songo fhela mbilu, kha vha thetshelesenyana zwine nda ambela Mudzimu.

³ Nḓivho yanga a si ya zwino, ndi ḓo vha sumbedza uri Muvhumbi wanga ha khakhi.

⁴ Vhukuma, zwine nda vha vhudza, a hu na tshi si tshone; ane vha mu vhona phanḓa havho ndi munna wa vhuṱali ho khunyelelaho.

⁵ Naho maanḓa a Mudzimu e mahuluhulu, ha nyadzi muthu; u na maanḓa, ṱhalukanyo yawe ndi khulu.

⁶ Ha tendi vhavhi vha tshi ḓi tshila; vhashai u ḓi vha ṋea pfanelo dzavho;

⁷ u dzula a tshi londola vhavhuya. U ita uri mahosi a vhuse miṅwaha na miṅwaha, hone vhá vhuya vha ḓihudza,

⁸ vha farwa vha vhoxwa nga dzigeḓane, vha tandwa nga thambo, vha tambudzwa;

⁹ u vha sumbedza zwe vha ita – uri vho tshinya nga u ḓihudza;

¹⁰ u ralo ha vha u ita uri vha kolongonye nḓevhe vha tshi laiwa, a vha vhudza uri vha laṱe.

¹¹ Arali vha mu thetshelesa vha mu shumela, vha ḓo ḓi tshila nga mulalo, zwa ḓi vha nakela.

¹² Hone arali vha ita tshipimbi vha ḓo ḽiwa nga pfumo, vha fa nge vha sa fune u ḓivha Mudzimu.

¹³ Vha no nyadza Mudzimu vha dzulela u mu sinyusa; a tshi vha vhofha a vha ṱavhi mukosi.

¹⁴ Vha fa vha tshee vhaṱuku, unga phombwe dza vhanna dzi no dzula thembeleni dza midzimu.

¹⁵ Vha tambulaho u vha tshidza nga ḽone dambudzo, a ita uri maṱungu a vha bonyolose.

¹⁶ Na vhone Vho-Jobo o vha kunga uri a vha ponyokise mulomoni wa i ḽaho, a ita uri vha ḓiphiṋe vho tsireledzea ḓafula ḽavho ḽí na muṱumba wa zwiḽiwa zwa mapfura.

¹⁷ Hone zwino vha khou rwiwa nga ṱhamu yo fanelaho muvhi; vho haṱulwa hu sa itwi tshiṱalulo.

¹⁸ Vha vhone vha sa ḓo ri u sinyuwa vha vho ṱunga Mudzimu; vha vhone vha sa ḓo edzisa u pfumedzana na Mudzimu nga tshanḓanguvhoni.

¹⁹ Vha vhona unga lupfumo lwavho na maanḓa avho oṱhe zwi nga vha tika vha si wele khomboni naa?

²⁰ Vha songo tama vhusiku ha khaṱhulo vhu tshi swika; ndi tshifhinga tshine tshakha dza ḓo thubwa.

²¹ Vha vhone vha sa ḓo pambutshela vhutshinyini, vhune nda vhona vha tshi vhu takalela u fhira dambudzo.

Elihu: “Nga vha ofhe Mudzimu Ramaanḓa!”

²² Vha songo hangwa uri maanḓa a Mudzimu ndi mahulu; ndi nnyi mufunzi ane a nga Ene?

²³ Ndi nnyi ane a nga mu sengisa? Ndi nnyi ane a nga mu vhudza a ri, “Wo khakha”?

²⁴ U ḓi rendelwa zwine a ita; na vhone kha vha mu rende;

²⁵ vhathu vhoṱhe vha a zwi vhona, naho muthu a tshi zwi ṱalela e kule.

²⁶ Vhuhulu ha Mudzimu ndi khundaṱhalukanyo; a ri koni u vhala miṅwaha yawe.

²⁷ Ndi Ene a no kupula marotha a mvula, shango ḽa oma, a dovha a a ṱuḓa, a vha mvula, a ḓadza milambo.

²⁸ U shulula mvula i tshi bva kha makole, ya nela vhathu vhanzhi.

²⁹ A no ḓivha kutshimbilele kwa makole ndi nnyi? Ene a tshi ri ngindii, ngindii, e pfamoni yawe, zwi ṱalukanywa nga nnyi?

³⁰ U ita uri lutomboni lwoṱhe hu ri “vhenge”, hone vhudzivha ha lwanzhe a dzula o tiba.

³¹ U vhusa vhathu nga u ralo, a tshi vha ṋea zwiḽiwa, vha ḽa vha laṱa.

³² U puta lupenyo nga tshanḓa, a lu sumba hune lwa yo rwa;

³³ kholomo dzi ri u pfa mubvumo dza ḓivha uri maḓumbu a mvula a nḓilani, dza fembedza.