JOBO 35 - BIVHILI KHETHWA Mafhungo Madifha

Elihu: “Vha nga ḓivhambedza na Mudzimu naa?”

^1-2 Vho-Jobo, nṋa ndi zwone vha tshi ri a vha na mulandu maṱoni a Mudzimu?

³ Vha vhudziselani Mudzimu vha ri, “Nda ita zwivhuya Iwe u wanani? A zwi fani na musi ndi tshi tshinya naa?”

⁴ Nṋe ndi ḓo vha fhindula, nda dovha nda fhindula na khonani dzavho.

⁵ Kha vha dzou sedza lutomboni: Kha vha vhone uri makole a kule hani.

⁶ Arali vha tshinya, Mudzimu zwi mu dina ngani? Naho vhutshinyi havho ha anda hani, Ene zwi mu itani?

⁷ Vhuvhuya havho vhu mu ṋeani? U wanani tshanḓani tshavho?

⁸ Vhuvhi havho vhu dina muthu a no nga vhone; vhuvhuya havho vhu tonda vhathu fhedzi.

⁹ Vhathu vha a gomela nga u kandeledzwa; vha lila u lamulelwa kha vha maanḓa,

¹⁰ hone a hu na ane a ya ha Mudzimu Muvhumbi wawe, Ene a no ita uri a fhululedze naho o tibwa nga swiswi.

¹¹ Ene o ri funza zwinzhi ra fhira phukha, a ri ṱalifhisa ra fhira zwiṋoni.

¹² Vhathu vha tshi ṱavha mukosi, ha fhinduli; vha a ḓihudza, ndi vhavhi.

¹³ A zwi farisi tshithu, Mudzimu ha vha thetshelesi; Ramaanḓaoṱhe ha zwi londi.

¹⁴ Vho-Jobo, vhone vha ri a vha koni u mu vhona; vha songo fhela mbilu, mafhungo avho o swika khae.

¹⁵ Vha vhona unga a sinyuwa ha lifhedzi, na vhutshinyi vhuhulu ha vhuyi a vhu londa,

¹⁶ ndi zwine vha sokou amba zwi sa farisi tshithu, vha sokou anza maipfi vha si na nḓivho.