JOBO 34 - BIVHILI KHETHWA Mafhungo Madifha

Elihu: “Mudzimu ha khakhi.”

^1-2 Inwi vhaṱali, ipfani zwine nda amba! Inwi no funzeaho, nthetsheleseni!

³ Hufha nḓevhe i tshi nanguludza maipfi unga lulimi lu tshi thetshela zwiḽiwa.

⁴ Riṋe kha ri khethe zwi re zwone, ri gude roṱhe zwi re zwavhuḓi.

⁵ Vho-Jobo vha ri, “A thi na mulandu; Mudzimu u khou tou nkundisa u wana zwo mpfanelaho!

⁶ Naho ndi ngohoni, ndi pfi ndi a zwifha; nangwe ndi songo tshinya, musevhe wawe u mpfula mbonzhe i sa lafhei.”

⁷ No no vhuya na vhona muthu a no nga Vho-Jobo, ane a tshi tamba nga Mudzimu, zwa nga ndi u nwa maḓi?

⁸ U konana na vhaitazwivhi, u ḓowelana na vhavhi.

⁹ Hufha a tshi ri, “Muthu a tshi lingedza u takadza Mudzimu ha wani tshithu.”

¹⁰ Zwino nthetsheleseni, inwi ni re na ṱhalukanyo! Mudzimu u a ita vhuvhi naa? Ramaanḓaoṱhe u a khakha naa?

¹¹ U pfufha muthu a tshi tevhedza mishumo yawe; u mu ita zwo teaho zwiito zwawe.

¹² Vhukumakuma Mudzimu ha khakhi; Ramaanḓaoṱhe ha haṱuleli muthu thungo.

¹³ Ndi nnyi o mu vheaho uri a vhuse ḽifhasi? Ndi nnyi we a ri a lange shango?

¹⁴ Arali o vha a tshi tou zwi funa, a humisa muya wawe na mufemo wawe,

¹⁵ vhathu vhoṱhe vho vha vha tshi ḓo lovha kathihi, muthu a humela buseni.

¹⁶ Zwino arali vhe na ṱhalukanyo, nga vha pfe, vha thetshelese zwine nda amba.

¹⁷ A sa funi ḽi tshi lala a nga vhusa naa? A no haṱula a sa ṱaluli, Ene wa maanḓa, ni nga mu vhea mulandu naa?

¹⁸ Kani-ha a si Ene a no vhudza mahosi a ri, “A ni tshithu!” a amba na vhahulwane a ri, “Ni vhavhi!”?

¹⁹ Ene u na tshiṱalula naa? Hu vhavhusi, hu vhapfumi, hu vhashai, ha vhoni vha tshi fana naa? Hufha o vha vhumba vhoṱhe.

²⁰ Muthu a nga ḓi fa kathihi fhedzi vhukati ha vhusiku; Mudzimu u lozwa vhathu, vha lovha; vha maanḓa u vha sudzulusa á songo vhuya a vusa nungo.

²¹ U dzula o vhea iṱo kha zwoṱhe zwine vhathu vha ita; u vhona hoṱhe hune vha kanda.

²² A hu na swiswi, na u swifhala haḽo, ḽine muitazwivhi a nga dzumbama khaḽo a si vhonwe nga Mudzimu.

²³ Ha vhuyi a ṱwa a tshi sengisa muthu a sa athu mu haṱula;

²⁴ vha maanḓa u vha tekula a songo ranga u vhudzisa, vhudzuloni havho a vhea vhaṅwe;

²⁵ u sedza zwine vha ita, a vha wisa vhusiku a vha kuyekanya:

²⁶ u vha rwela vhutshinyi havho, zwa vhonwa nga vhathu vhoṱhe.

²⁷ Ndi nge vha mu furalela, nḓila dzawe vha si dzi londe.

²⁸ Vha kandeledza vhashai vha lilela Mudzimu, Ene a pfa mukosi wa vhaheḓana.

²⁹ Huno naho a sokou fhumula, ndi nnyi ane a mu vhea mulandu? Arali a dzumba tshifhaṱuwo, ndi nnyi ane a nga mu vhona? Hu vhathu, hu dzitshakha, vha nga itani

³⁰ arali Ene a litsha muvhi a vhusa lushaka lwa tshipimbi?

³¹ Arali muthu onoyo a vhudza Mudzimu, a ri, “Ndi na mulandu, ndo laṱa!

³² Mpfunze, ndi vhone vhukhakhi hanga vhune nda si kone u vhu vhona; arali ndo khakha, ndi nga si tsha dovha” –

³³ zwino zwo ralo vhone vha kha ḓi funa Mudzimu a tshi mu rwa, vhunga vhone vho dzula vho haṱula naa? A hu khethi nṋe, hu khetha vhone: nga vha mmbudze zwine vha ḓivha.

³⁴ Vha re na ṱhalukanyo vha a tenda; vha re vhaṱali vha tshi mpfa, vha ḓo ri,

³⁵ “Jobo u ambiswa nga u shaya nḓivho; zwine a amba a zwi sumbi ṱhalukanyo.”

³⁶ Ngavhe Vho-Jobo vha tshi tou lingwa tshoṱhe nge vha fhindula unga muthu muvhi!

³⁷ Vha engedzedza vhutshinyi havho nga u dovha vha vutshela Mudzimu, vha ḓi tamba nga Mudzimu roṱhe ri tshi zwi pfa!