JOBO 33 - BIVHILI KHETHWA Mafhungo Madifha

Elihu: “Mudzimu ha fhumuli, u a amba.”

¹ Zwino-ha Vho-Jobo, nga vha thetshelese zwine nda amba, vha kolongonye nḓevhe, vha pfe zwoṱhe zwine nda bula.

² Zwino ndi hone ndi tshi vho ṱoḓou amba; maipfi anga a tou vha ṱhodzini ya lulimi lwanga;

³ zwine nda amba zwi bva mbiluni i si na vhufhura; ndi khou amba ngoho ndi sa dzumbi zwine nda ḓivha.

⁴ Ndo vhumbwa nga Muya wa Mudzimu; mufemo wa Ramaanḓaoṱhe u nṋea vhutshilo.

⁵ Nga vha mphindule arali vha tshi kona, vha nkhanedze!

⁶ Nṋe na vhone ri a fana maṱoni a Mudzimu; roṱhe ro ṅwatiwa kha vumba ḽithihi;

⁷ zwenezwo vha songo ntetemela; vha songo tenda ndi tshi vha kunda nga u vha shushedza.

⁸ Ndo tou zwi pfa zwavhuḓivhuḓi vha tshi amba; maipfi avho a kha ḓi pfala nḓevheni dzanga,

⁹ vha tshi ri, “A thi na mulandu, a tho ngo tshinya tshithu, ndo ṱamba, a thi na tshivhi,

¹⁰ Mudzimu u tou ita swiswimbadise uri a mmvutshele, a nnyita swina.

¹¹ U mpata milenzhe nga zwipato, a londa vhuṱala hanga hoṱhe.”

¹² Huno ndi a vha vhudza ndi ri, vha tshi ralo vho khakha; Mudzimu ndi muhulwane, u fhira muthu.

¹³ Ndi mini vha tshi mu gungulela, vha ri ha fhinduli maipfi a muthu?

¹⁴ Mudzimu u a ḓi amba a dovha; vhathu vha ro sa mu thetshelesa.

¹⁵ Vhusiku, muthu ó eḓela e mbwanda nga khofhe, ó lala vhulaloni hawe, Mudzimu u amba nae nga miloro na mabono.

¹⁶ U a mu nuṅunedza nḓevheni, a mu kaidza a ofha.

¹⁷ U itela uri a laṱe vhuvhi hawe, a si ḓihudze,

¹⁸ ha vha u mu tshidza uri a si lovhe, a si wetshele vhudzulavhafu.

¹⁹ U mu laṱisa nga u mu ladza thovhoni i fhisaho, marambo a rema,

²⁰ a si tsha tama zwiḽiwa, na mapfura a si tsha mu ḓifhela,

²¹ muvhili wa ṱahala wa fhelela, ha sala marambo fhedzi,

²² a sendela tshaloni, ó livha kha vhaḓinḓa vha lufu.

²³ Khamusi muruṅwa wa Mudzimu a nga ḓa a mu tika – muṅwe wa vhaḓinḓa vha zwigidigidi, a ḓivhadza muthu zwine a fanela u ita,

²⁴ a mu pfela vhuṱungu a ri, “Kha a vhofhololwe, a si tsele dindini, tshipfumelo ngetshi!”

²⁵ Ndi hone muvhili wawe u tshi ḓo dovha wa vha muswa, wa khwaṱha, zwa nga zwiḽa a tshee muṱuku.

²⁶ A tshi rabela, Mudzimu u ḓo mu takalela; u ḓo vhona Mudzimu a pembela, Mudzimu a sumbedza uri u a fulufhedzea, a mu nakisela zwoṱhe.

²⁷ Ndi hone a tshi ḓo imba vhathuni, a ri, “Ndo tshinya, a tho ngo ita zwi re zwone, hone Mudzimu o nthwa nga ṱhamu ṱhukhu-ṱhukhu;

²⁸ o ntshidza nda si dzhene tshaloni, zwino ndi kha ḓi tshila.”

²⁹ Zwoṱhe hezwo Mudzimu u zwi itela muthu, a dovha a ḓi dovha,

³⁰ a tshi itela u humisa muthu dindini, uri a tshile.

³¹ Zwino Vho-Jobo, nga vha thetshelese zwine nda amba, vha ri tshete ndi ambe.

³² Hone arali vhe na zwine vha ṱoḓa u amba, kha vha ambe; ndi nga takala arali vha tshi wanala vha si na mulandu.

³³ Arali vha sa nkhanedzi, vha ri tshete vha thetshelese, ndi ḓo vha funza vhuṱali.