JOBO 32 - BIVHILI KHETHWA Mafhungo Madifha

Maipfi a Elihu (32:1 – 37:24)

¹ Vhunga Jobo o vha a tshi ḓipfa a si na mulandu, vhaḽa vhanna vhararu a vho ngo tsha kona u mu fhindula.

² Hone muṅwe we a vha o ima henefho, a no pfi Elihu, a si tsha kona u konḓelela nga mbiti, nge Jobo a vha a tshi vhona o khakhaho e Mudzimu, ene a si na mulandu. Onoyo Elihu o vha e ṅwana wa Barakhele, wa lutsinga lwa Busi, wa mutupo wa Ramu.

³ A sinyutshela na khonani dza Jobo dziḽa tharu, nge vha kundwa ḽa u fhindula Jobo, ha vho nga ho khakha Mudzimu.

⁴ Hezwi vha tshi khou amba na Jobo, Elihu a lindela vhoṱhe vha tshi fhedza u amba, nge a vha e muṱuku khavho.

⁵ A tshi vhona uri vhaḽa vhanna vhararu a vha koni u fhindula Jobo, a sinyuwa,

⁶ a thoma u amba – ene Elihu ṅwana wa Barakhele, wa lutsinga lwa Busi, wa mutupo wa Ramu – a ri, Nṋe ndi muṱuku, inwi no tshena mmvi, ndi zwe nda vha ndi tshi khou ofha u ni vhudza zwi re mbiluni yanga,

Elihu: “Ṱhoho thema i laya ṱhoho tshena.”

⁷ nda ri, nga hu ambe vha kale; vho no vhaho vha maḓuvha nga vha funze a vhuṱali.

⁸ Mathina Muya wa Ramaanḓaoṱhe a re ngomu ha vhathu ndi Ene a vha ṋeaho ṱhalukanyo.

⁹ Vhulala a si u bebwa kale; a si vha kale fhedzi vha no ṱalukanya zwi re zwone.

¹⁰ Ndi zwine nda ri ni nthetshelese-vho; litshani ndi ni vhudze zwi re mbiluni yanga.

¹¹ Ndo ni lindela ndi sa fheli mbilu ni tshi khou amba, nda thetshelesa ndi tshi nanga maipfi a vhuṱali.

¹² Ndo tou kolongonya nḓevhe ni tshi amba – a hu na na muthihi waṋu we a ladza Jobo na khani, kana a kona u fhindula zwe a amba.

¹³ Ni songo ri ndi hone no wana vhuṱali ni tshi fhedza nga ḽa u ri, “Muthu a nga si mu kone, u ḓo konwa nga Mudzimu fhedzi.”

¹⁴ Vho-Jobo vho vha vha sa athu ṱaṱa khani na nṋe; nṋe a thi nga mu fhinduli unga inwi.

¹⁵ Vho-Jobo, havha vhathu vho ḓaḓa, a vha tsha kona u fhindula, a vha tshee na tshine vha amba;

¹⁶ zwino vhó fhumula, na nṋe ndi fhumule naa, vhó sokou tshenzhemala vha sa fhinduli tshithu?

¹⁷ Zwino nṋe-vho ndi ḓo amba, nda ni vhudza-vho zwi re mbiluni yanga.

¹⁸ Zwino a thi tsha kona u fhumula; mbiluni yanga ho ḓala maipfi.

¹⁹ Mbilu yanga i nga waini yo shatelwa; i nga mukumba wa waini muswa, une wa ḓo ṱuwa u tshi thuthuba.

²⁰ A tshi tsha kona u konḓelela, ndi fanela u amba; ndo fanela u fhindula.

²¹ A thi nga imi na muthu, a thi nga hoyi muthu;

²² ngavhe ndi ite zwa muhoyo, Muvhumbi wanga o vha a sa nga lengi u nndozwa.