JOBO 31 - BIVHILI KHETHWA Mafhungo Madifha

Jobo: “Nṋe ndo amba, Ramaanḓaoṱhe nga a fhindule!”

¹ Ndo langana na maṱo anga, nda ri a thi nga vhuyi nda ri u sedza musidzana nda mu emula.

² Zwino Mudzimu e makoleni, u ḓo mpfufha nga mini? Mukovhe wanga u no bva ha Ramaanḓaoṱhe ngei ṱaḓulu ndi ufhio?

³ Khombo a yo ngo fanela u wela vhavhi naa? Phanzi a i weli vhaitazwivhi kani?

⁴ Mudzimu u vhona zwoṱhe zwine nṋe nda ita, hufha maga anga oṱhe a tshi a vhala.

⁵ Ndi a ana ndi ri, a thi athu vhuya nda ita vhumbulu, a thi athu vhuya nda fhura muthu.

⁶ Mudzimu nga a mmbee tshikaloni tshi sa fhuri – u ḓo wana ndi sa solisei.

⁷ Arali nda pambuwa nḓilani ya ngoho, mbilu yanga ya kungwa nga maṱo anga, arali zwanḓa zwanga zwo ḓala tshika dza zwivhi,

⁸ izwo mavhele anga nga a ḽiwe nga muṅwe, zwe nda lima zwi tupulwe nga vhaṅwe.

⁹ Arali mbilu yanga yo kungwa nga musadzi wa muṅwe, nda mu lindela ndo vhandalala tsini ha vothi ḽawe,

¹⁰ izwo musadzi wanga, nga a bikele muṅwe munna, a mu dzhenise nḓuni.

¹¹ Zwo vha zwi tshi ḓo shonisa hani! Wo vha u tshi ḓo vha mulandu u iswaho tsengoni.

¹² Ndi mulilo u lozwaho hoyo; wo vha u tshi ḓo vha wo fhisa zwoṱhe zwine nda vha nazwo.

¹³ Arali ndi songo thetshelesa muṅwe wa vhashumi vhanga a tshi nngungulela,

¹⁴ ndo vha ndi tshi ḓo livhana hani na Mudzimu? A tshi ḓa u ntsengisa ndo vha ndi tshi ḓo ri mini?

¹⁵ Onoyo Mudzimu o mmbumbaho muvhilini wa mme anga a si Ene o sikaho na vhashumi vhanga naa?

¹⁶ Ndo no vhuya nda lamba u farisa vhadziili naa? Ndo no vhuya nda thatha tshilikadzi dza ṱuwa na nḓala naa?

¹⁷ Ndo no vhuya nda litsha tsiwana dza ṱwa na nḓala nṋe ndó ḽa naa?

¹⁸ Hufha u bva hanani hanga ndo ḓi dzi lela unga khotsi. U bva tshee nda bebwa ndo ḓi endedza dzitshilikadzi.

¹⁹ Ndo vha ndi tshi ri u wana mushai a sa koni u ḓishavhedza, kana nda wana mutshinyali, a tshi tambula nga tsiku,

²⁰ nda mu fha zwiambaro zwo lukwaho nga vhukuse ha nngu dzanga, a konou ntenda nga u pfa vhududo.

²¹ Arali ndo vhuya nda khakhela tsiwana nga u vhona vhahaṱuli vha tshi nnyofha,

²² zwenezwo ngavhe zwanḓa zwanga zwi tshi vunḓwa, ngavhe zwi tshi paḓulwa kha mahaḓa anga.

²³ Zwo raloho ndo vha ndi sa nga zwi iti, hufha ndi tshi ofha ṱhamu ya Mudzimu na vhuhulu hawe.

²⁴ Arali ndo vhuya nda fulufhela musuku, kana nda u vhudza nda ri, “Ndi iwe vhushavhelo hanga”;

²⁵ arali ndo vhuya nda takalela lupfumo lwanga luhulu lwe nda lu wana nga ṋala dzanga;

²⁶ arali ndo vhuya nda ri u vhona vhugala ha ḓuvha, kana u naka ha ṅwedzi u tshi tshimbila,

²⁷ nda tenda zwi tshi kunga mbilu yanga, nda zwi hulisa nga u khisa tshanḓa tshanga tshiphirini –

²⁸ vhuvhi ho raloho ndo vha ndi tshi ḓo vhu lifha nga u wana ṱhamu; ho vha hu tshi ḓo vha u landula Mudzimu a re ṱaḓulu.

²⁹ A thi athu vhuya nda takala swina ḽanga ḽi tshi tambula, kana nda fhululedza o welwa nga khombo;

³⁰ a thi athu vhuya nda tshinya nga u teketela swina ḽanga uri ḽi fe.

³¹ Vhashumi vhanga vhoṱhe ndi ṱhanzi: Ndi nnyi we a vhuya a ḽa ṋama ha Jobo a si fure?

³² Vhatshimbili ndo vha ndi tshi vha vhidza vha dzhena nḓuni yanga, nda si vhuye nda litsha vha tshi lala nnḓa.

³³ A thi athu vhuya nda tshinya, nda tiba vhutshinyi hanga, nda dzumba mulandu wanga mbiluni sa vhaṅwe

³⁴ nga u ofha uri vhathu vha ḓo ri mini; a thi athu vhuya nda fhumula kana nda dzumbama nḓuni nga u ofha uri vha ḓo nnyadza.

³⁸ Arali tsimu yanga ya nṱavhela mukosi i tshi mpomoka, ya ri ndo i tswa, maḓinga ayo oṱhe a ṋukala nga miṱodzi, a ri ndo i dzhiela muṋe wayo;

³⁹ arali ndo ḽa zwiḽiwa zwe nda zwi kaṋa, nda si lifhe tshithu, vhe nda i wana khavho nda litsha vha tshi fa nga nḓala,

^40a izwo-ha i songo mela mavhele, nga i mele mipfa; i songo mela mufhoho, nga i mele tsheṋe.

³⁵ A hu na a no thetshelesa zwine nda amba naa? Ndi a ana, tshiga ngetshi: Ramaanḓaoṱhe nga a fhindule! Ngavhe mupomoki wanga a tshi tou ṅwala milandu yanga, nda i vhona!

³⁶ Ndo vha ndi tshi ḓo i atha kha mahaḓa, nda i ambara unga tshiala.

³⁷ Ndo vha ndi tshi ḓo vhudza Mudzimu zwoṱhe zwe nda ita, nda livhana nae ndi si na luvalo.

^40b Maipfi a Jobo a fhelela henefha.