JOBO 30 - BIVHILI KHETHWA Mafhungo Madifha

Jobo: “Hone zwino ndo ṱovhowa.”

¹ Hone zwino vhanna vhane nda vha fhira vha vho tamba nga nṋe! Vhokhotsi avho vho vha vha si tshithu, lwe nda vha ndi sa nga vha tendeli u dzula na mmbwa dze dza vha dzi tshi lisa nngu dzanga.

² Nahone vho vha vha tshi ḓo kona u ntshumelani? Hufha vho vha vho fhela nungo.

³ Vho vha vhe vhashai vha tshi fa nga nḓala, vha tshi ṱafuna midzi yo omaho vhusiku, ngei sogani hu sa dzuli muthu,

⁴ vha ṱunya maṱari a dungaho vha tshi ḽa, vhuswa havho vhu midzi ya muṱhobi.

⁵ Vho thathwa nga vha havho vha tshi vha ṱavhela mukosi unga mafobvu,

⁶ vha kombetshedzwa u yo dzula miedzini, na milindini, na mapakoni,

⁷ henengei ḓakani vha dziḓa unga donngi, vha dzumba ṱhoho zwiṱakani.

⁸ Ndi vhathu vha songo bebeaho, vha si na madzina; vho thathwa shangoni.

⁹ Zwino vhana vhavho vha vho nngoḓa nga zwiimbo; ndi tou vha tshianeo.

¹⁰ Vha a nnyala, a vha funi u sendela tsini hanga, vha ita na u mpfa mare.

¹¹ Vha vho ita nga u funa nga u vhona Mudzimu o nṱangula a nṱungufhadza;

¹² zwikhokhonono hezwi zwi vho ḓiṋea maanḓa; zwi a mpiringedza, zwi a nngovhela;

¹³ vho nthivhela, vha ṱoḓa u nndozwa, a hu na ane a vha dzivhisa.

¹⁴ Vho zhakekanya luhura lwanga, vha dzhena; khombo yo nngwela, vha dzhena vha tshi tou kunguluwa;

¹⁵ ndo tsikeledzwa nga zwi ofhisaho; vhugala hanga ho fhufha na muya; mashudu anga o balangana unga gole.

¹⁶ Zwino ndi ḓo ṱuwa ndi tshi fa; ndo zhongondedzwa nga misi ya maṱungu;

¹⁷ vhusiku marambo anga a lala a tshi rema; vhuṱungu vhu nnduma vhu sa imi;

¹⁸ Mudzimu o mpfara nga mikulo nga maanḓa awe mahulu, a somba zwiambaro zwanga zwa onyana;

¹⁹ u mposa fhasi matopeni; ndi vho tou nga buse na milora.

²⁰ Mudzimu, ndi tshi u vhidzelela a u aravhi; ndi tshi rabela u sokou ṱanzwa maṱo wa lavhelesa;

²¹ u vho nnyitela tshiṱuhu; wa ntovhola nga nungo dzau dzoṱhe;

²² u a mphephera, muya wa mmbudzulela kule; u nkhwala nga maḓumbu, wa mphufhisela nṱha na fhasi.

²³ Ndi a ḓivha uri u khou nnyisa lufuni, henefho hune ha kuvhangana vhathu vhoṱhe.

²⁴ Ndó no vha shubi, ndi kha ḓi ḓo vuswa nga nnyi? Mudzimu ha mmvusi ndi sa athu wa tshoṱhe naa?

²⁵ Vha lilaho a tho ngo lila navho naa? Kani vha shayaho, a tho ngo vha pfela vhuṱungu?

²⁶ Ndo vha ndo lavhelela dakalo, ha ḓa khombo, nda lindela tshedza, ha ḓa zwiswi ḽa tou bodo.

²⁷ Ndi lala ndi tshi ḽa mbilu; ndi sokou dzula ndi maṱunguni;

²⁸ ndo swifhadzwa ndí songo swa nga ḓuvha. Ndi ima vhukati haṋu nda ṱavha mukosi.

²⁹ Ndo no tou vha shaka ḽa phunguhwe; khonani dzanga ndi mphwe.

³⁰ Lukanda lwanga lwo no swifhala; muvhili u khou swa nga dali.

³¹ Mbila dzanga dzi vho imba dza maṱungu fhedzi; tshiṱiringo tshi vho lidza dza zwililo.