JOBO 3 - BIVHILI KHETHWA Mafhungo Madifha

Jobo a tshi teketela ḓuvha ḽe a bebwa ngaḽo

¹ Ndi hone Jobo a tshi thoma u amba, a teketela ḓuvha ḽe a bebwa ngaḽo. Jobo:

^2-3 Yawee Mudzimu, teketela ḓuvha ḽe nda bebwa ngaḽo! Teketela vhusiku he ha amba ha ri, “Ho mela mutukana muvhilini wa musadzi.”

⁴ Ḓuvha ḽeneḽo nga ḽi shanduke swiswi. U songo tsha ḽi elelwa, u songo tsha ḽi penyisela tshedza.

⁵ Ngavhe ḽi tshi dovha ḽa milwa nga swiswi ha tou bodo, ḽa tibwa nga makole, tshedza tshaḽo tsha dzima.

⁶ Ngavhe vhusiku honoho vhu tshi milwa nga swiswi, ha sudzuluswa kha maḓuvha a ṅwaha, ha si tsha vhalwa kha maḓuvha a ṅwedzi.

⁷ Vhusiku honoho hu songo tsha bebwa muthu, hu songo pfala mifhululu.

⁸ Vhaloi vhane vha kona u phuphudza na yone Liviathani nga vha ḽi teketele,

⁹ Masase yaḽo i si tsha penya, ngavhe vhu tshi lindela mutsho ḽi si tshe, vhu si vhone mapfuvhi!

¹⁰ Ndi mini vhu songo shatela mulomo wa mbumbelo, ndi si bebwe, maṱo anga a si vhone maṱungu mangafha?

¹¹ Ngavhe ndo fela thumbuni ya mme anga, kana ndi ri u bebwa ndi mbo ḓi fa.

¹² Khefha mme anga vho vhuya vha ntakula marumbini avho? Ndi mini vho vhuya vha mmamisa?

¹³ Ngavhe ndi fe zwenezwiḽa, ndo vha ndi tshi ḓo vha ndo awela zwino, nda lala tshaloni, nde tshete,

¹⁴ ndó fama na mahosi na magota vhe vha ḓifhaṱela pfamo, dza sala dzi matumba.

¹⁵ Ndo vha ndi tshi ḓo vha ndo fama, unga vhavhusi vhe vha ḓadza pfamo dzavho nga musuku na siliva.

¹⁶ Ndi mini ndi songo mbo ḓi swiṱwa unga mafhelelanḓuni, nda nga ṅwana we a si vhuye a vhona tshedza.

¹⁷ Tshaloni vhavhi a vha tsha luka vhunwa, vhashumi vho netaho vha a awela,

¹⁸ na zwivhotshwa a zwi tsha shuma, a zwi tsha kaidzekanywa.

¹⁹ Vhoṱhe vhá henengei, vha na bvumo na vha sa ḓihwi; phuli dzi fhedza nga u vhofhololwa.

²⁰ Ndi mini Mudzimu a tshi litsha vha no tambula vha tshi ḓi tshila? Ndi mini tshedza tshawe tshi tshi ḓi vhonetshela vha ḽaho mbilu?

²¹ Vha lindela lufu lwa si ḓe, vha funa tshalo u fhira lupfumo;

²² vha tshi elekanya tshalo vha a takala; vha tshi humbula thulwi ya mavu vha a fhululedza.

²³ Hufha muthu a tshi tshila a sa ḓivhi hune a ya, Mudzimu ó mu vhetshela luhura.

²⁴ Tshigomelo ndi zwone zwiḽiwa zwanga, tshinwiwa tshanga ndi miṱodzi.

²⁵ Zwoṱhe zwine nda zwi ofha zwi a nngwela; tshine nda tshi tetemela a tshi litshi u ḓa.

²⁶ A thi na mulalo, a thi rudzi mbilu, a thi aweli, tshanga ndi nyofho.